വനിതാ ജേര്ണലിസ്റ്റിനെ അപമാനിച്ച യുബര് ഡ്രൈവറെ അറസ്റ്റ് ചെയ്തു
കൊല്ക്കത്ത: മെട്രോ നഗരമായ കൊല്ക്കത്തയില് ഡ്രൈവര്മാര് യുബറിന് വീണ്ടും തലവേദനയാകുന്നു. വനിതാ ജേര്ണലിസ്റ്റിനോട് അപമര്യാദയായി പെരുമാറിയ യുബര് ഡ്രൈവറെയാണ് പോലീസ് അറസ്റ്റ് ചെയ്തത്. പ്രമുഖ ഇംഗ്ലീഷ് ദിനപ്പത്രത്തിലെ ജേര്ണലിസ്റ്റായ യുവതിക്കാണ് ഡ്രൈവറില് നിന്നും അപമാനമേല്ക്കേണ്ടി വന്നത്.
കാമക് സ്ട്രീറ്റില് നിന്നും സര്വ്വേ പാര്ക്കിലുള്ള വീട്ടിലേക്ക് പോകാനായി ടാക്സി എടുത്തതായിരുന്നു യുവതി. യാത്രയ്ക്കിടെ ഡ്രൈവറായ മുഹമ്മദ് ഖുര്ബാന് യുവതിയോട് അപമര്യാദയായി പെരുമാറുകയായിരുന്നു. ശാരീരിക പീഡനം ഉണ്ടായിട്ടില്ല എന്ന് പരാതിക്കാരി പോലീസിനോട് പറഞ്ഞിരുന്നു. ഐ പി സി 504, 506, 509 തുടങ്ങിയ വകുപ്പുകള് പ്രകാരമാണ് മുഹമ്മദ് ഖുര്ബാന് എതിരെ പോലീസ് കേസെടുത്തത്.
കഴിഞ്ഞ മാസം യാത്രക്കാരിയെ നോക്കി സ്വയംഭോഗം ചെയ്ത യുബര് ഡ്രൈവറെ പോലീസ് അറസ്റ്റ് ചെയ്തിരുന്നു. കൊല്ക്കത്തയില് വെച്ചാണ് ഉബര് ടാക്സി ഡ്രൈവര് യാത്രക്കാരിയെ നോക്കി സ്വയംഭോഗം ചെയ്തത്. ജൂലൈ എട്ടിനായിരുന്നു ഇത്. ആറ് മാസങ്ങള്ക്ക് മുമ്പ് ദില്ലിയില് ഉബര് ടാക്സിയില് വെച്ച് മള്ട്ടിനാഷണല് കമ്പനി ജീവനക്കാരിയെ ഡ്രൈവര് പീഡിപ്പിച്ചിരുന്നു. ബെംഗളൂരുവില് യാത്രക്കാരിയുടെ കരണത്തടിച്ച ഡ്രൈവറെ ഓല കാബ് പിരിച്ചുവിട്ടിരുന്നു.