ഉദുമല്‍പേട്ട കൊലപാതകം; പ്രണയത്തിന് സമുദായം വിധിച്ചത് മരണം: കുറ്റക്കാര്‍ക്ക് വധശിക്ഷ നല്‍കി കോടതി

ചെന്നൈ: ഉയര്‍ന്ന ജാതിയില്‍പെട്ട യുവതിയെ പ്രണയിച്ച് വിവാഹം ചെയ്ത ദളിത് യുവാവ് ശങ്കറിനെ കൊലപ്പെടുത്തിയ കേസില്‍ ആറ് പേര്‍ക്ക് വധശിക്ഷ. കോളിളക്കം സൃഷ്ടിച്ച ഉദുമല്‍പേട്ട ദുരഭിമാന കൊലപാതക കേസിലാണ് തിരുപ്പൂര്‍ കോടതി വിധി പ്രഖ്യാപിച്ചത്. ഭാര്യാപിതാവ്, വാടക കൊലയാളികള്‍ എന്നിവരുള്‍പ്പെടെ ആറ് പേര്‍ക്കാണ് വധശിക്ഷ. കേസിലെ 11 പ്രതികള്‍ കുറ്റക്കാരാണെന്ന് കോടതി രാവിലെ കണ്ടെത്തിയിരുന്നു. മണിക്കൂറുകള്‍ കഴിഞ്ഞ ശേഷമാണ് ശിക്ഷാവിധി പ്രസ്താവിച്ചത്.

തേവര്‍ സമുദായത്തില്‍പ്പെട്ട കൗസല്യ എന്ന യുവതിയെ പ്രണയിച്ച് വിവാഹം ചെയ്തതാണ് ശങ്കറിന്റെ കൊലപാതകത്തിലേക്ക് നയിച്ചതെന്ന് പോലീസ് കണ്ടെത്തിയിരുന്നു. ദളിത് വിഭാഗത്തില്‍ പെട്ട ദിണ്ഡിഗല്‍ സ്വദേശി ശങ്കറിനെ കഴിഞ്ഞ വര്‍ഷം മാര്‍ച്ചിലാണ് ഉദുമല്‍പേട്ട നഗരത്തില്‍ വച്ച് വാടക കൊലയാളികള്‍ നിഷ്ഠൂരമായി വധിച്ചത്.

കൗസല്യയുടെ പിതാവ് ചിന്നസ്വാമി, മാതാവ് അന്ന ലക്ഷ്മി, അമ്മാവന്‍ പാണ്ടിദുരൈ എന്നിവരുടെ നിര്‍ദേശ പ്രകാരമാണ് കൊലപാതകം നടത്തിയത് എന്നായിരുന്നു എഫ്‌ഐആര്‍. അന്ന ലക്ഷ്മി ഉള്‍പ്പെടെയുള്ള മൂന്ന് പേരെ കോടതി വെറുതെവിട്ടു.

ദളിത് വിഭാഗത്തില്‍പ്പെട്ട അരുന്ധതിയാര്‍ സമുദായംഗമാണ് ശങ്കര്‍. കൗസല്യയുമായുള്ള വിവാഹം രഹസ്യമായാണ് നടന്നത്. പിന്നീട് വീട്ടുകാര്‍ വിവരം അറിഞ്ഞതോടെ കൗസല്യയെ പുറത്തിറങ്ങാന്‍ അനുവദിച്ചില്ല. വിദ്യാഭ്യാസവും അവസാനിപ്പിച്ചു. എങ്കിലും ദിവസങ്ങള്‍ക്ക് ശേഷം കൗസല്യ ശങ്കറിന്റെ വീട്ടിലെത്തി. വീട്ടുകാര്‍ അവളെ സ്വീകരിക്കുകയും ചെയ്തു. ഇതോടെയാണ് കൗസല്യയുടെ വീട്ടുകാരും സമുദായ നേതാക്കളും ഇതിനെതിരേ പരസ്യമായി രംഗത്തുവന്നത്.

സംഭവദിവസം ഉച്ചയ്ക്കായിരുന്നു കൊലപാതകം. വീട്ടിലേക്കുള്ള സാധനങ്ങള്‍ വാങ്ങാനെത്തിയതായിരുന്നു ദമ്പതികള്‍. ഉദുമല്‍പേട്ട നഗരത്തില്‍ ബേക്കറിയില്‍ കയറി ഭക്ഷണം കഴിച്ചു പുറത്തിറങ്ങിയ ഉടനെയാണ് ബൈക്കിലെത്തിയ സംഘം ശങ്കറിനെ വെട്ടിയത്. കൗസല്യയെയും വെട്ടി. അവള്‍ ഓടി. ശങ്കറിന്റെ മരണം ഉറപ്പാക്കുംവരെ വെട്ടുകയായിരുന്നു.

English summary

Udumlapet Shankar Murder; Six accused gives Death sentence