ലഖ്‌നൗവില്‍ കണ്ടത് പറക്കും തളികയോ....?

ലഖ്‌നൗ: ലഖ്‌നൗവില്‍ പറക്കും തളികയെ കണ്ടതായി റിപ്പോര്‍ട്ട്. പറക്കും തളികയുടേതെന്ന് കരുതുന്ന ചിത്രങ്ങളും ഇപ്പോള്‍ പ്രചരിക്കുന്നുണ്ട്.

ഇന്ത്യടുഡെ ഡോട്ട് ഇന്‍ ആണ് ഇപ്പോള്‍ വാര്‍ത്തയും ചിത്രങ്ങളും പുറത്ത് വിട്ടിരിക്കുന്നത്. ലഖ്‌നൗ സ്വദേശിയായ അമിത് ത്രിപാഠി എന്നയാളെടുത്ത ചിത്രങ്ങളാണ് ഇപ്പോഴത്തെ വാര്‍ത്തക്ക് ആധാരം.

രാജാജിപുരത്ത് തന്റെ ഫ്‌ലാറ്റിന്റെ ബാല്‍ക്കണിയില്‍ നിന്ന് സൂര്യാസ്തമയത്തിന്റെ ചിത്രങ്ങള്‍ പകര്‍ത്തുകയായിരുന്നു അമിത് ത്രിപാഠി. അപ്പോഴാണ് സൂര്യന് മുകളില്‍ ഒരു തിളങ്ങുന്ന സാധനം കണ്ടത്. പിന്നീട് അത് മുകളിലേക്ക് ഉയര്‍ന്ന് പോവുകയും ചെയ്തുവത്രെ. എന്തായും അമിത് ത്രിപാഠി ഇതിന്റെ ചിത്രങ്ങള്‍ കുറേ എടുത്തിട്ടുണ്ട്.

ഈ മാസം ഇതാദ്യമല്ല ഇന്ത്യയില്‍ പറക്കും തളിക കണ്ടതായുള്ള വാര്‍ത്ത പുറത്ത് വരുന്നത്. ജൂലായ് 11 ഗുവാഹട്ടിയിലും 12 ന് ഷംലിയിലും ജൂലായ് 14 ന് തുണ്ട്‌ലയിലും ഇത്തരത്തിലുള്ള പറക്കുംതളികകള്‍ ചിലര്‍ കണ്ടിട്ടുണ്ടത്രെ. എന്തായാലും ലഖ്‌നൗവില്‍ എല്ലാവരും പറക്കും തളികകളെ കുറിച്ചാണ് ഇപ്പോള്‍ സംസാരിക്കുന്നത്.

അന്യഗ്രഹ ജീവികള്‍ എല്ലാ കാലത്തും മനുഷ്യന്റെ ഒരു സംശയമാണ്. ഇക്കാര്യത്തില്‍ ഇതുവരെ ശാസ്ത്രീയമായ സ്ഥിരീകരണങ്ങളൊന്നും ഇല്ല. എന്നാല്‍ ഒരു വിഭാഗം ശാസ്ത്രജ്ഞര്‍ പോലും ഇപ്പോഴും അന്യഗ്രഹ ജീവികളില്‍ വിശ്വസിക്കുന്നുണ്ട്.

യുഎഫ്ഒ എന്നാണ് ഇംഗ്ലീഷില്‍ പറക്കും തളികകളെ പറയുന്നത്. അണ്‍ ഐഡന്റിഫൈഡ് ഫ്‌ലൈയിങ് ഒബ്ജക്ട്‌സ്. യുഎഫ്ഒ കളെ അടിസ്ഥാനമാക്കി ഒരുപാട് സിനിമകള്‍ നിര്‍മിക്കപ്പെട്ടിട്ടുണ്ട്.

English summary

UFO spotted flying over Lucknow: Report.