ഉമര് ഖാലിദിന് വേണ്ടി ബോളിവുഡ് നടിയുടെ തുറന്ന കത്ത്!
ദില്ലി: ജവഹര്ലാല് നെഹ്റു യൂണിവേഴ്സിറ്റിയിലെ പ്രശ്നങ്ങളുമായി ബന്ധപ്പെട്ട് പോലീസ് തിരയുന്ന ഉമര് ഖാലിദിന് വേണ്ടി ബോളിവുഡ് നടിയായ സ്വര ഭാസ്കര് രംഗത്ത്. ജെ എന് യുവിലെ പൂര്വ്വ വിദ്യാര്ഥിയായ സ്വര ഭാസ്കര് അധികൃതര്ക്ക് അയച്ച തുറന്ന കത്തിലാണ് ഇക്കാര്യം പറഞ്ഞത്.
പാകിസ്താനിലേക്ക് 800 ഫോണ്കോള്; ജെഎന്യുവിലെ യഥാര്ഥ വില്ലന് ഇവനോ? ആരാണീ ഉമര് ഖാലിദ്?
യൂണിവേഴ്സിറ്റിയിലെ പ്രശ്നങ്ങള്ക്ക് തുടക്കമിട്ടത് എന്ന് കരുതപ്പെടുന്ന ഉമര് ഖാലിദിന് വേണ്ടി പോലീസ് ലുക്കൗട്ട് നോട്ടീസ് പുറപ്പെടുവിച്ച സാഹചര്യത്തിലാണ് നടിയുടെ കത്ത്. എന്ത് എവിടെ പറയണം എന്നറിയാത്ത ഒരു വിഡ്ഡിയാണ് ഉമര് ഖാലിദ് എന്നാണ് സ്വര ഭാസ്കര് പറയുന്നത്. എന്ന് കരുതി നിന്നെ ജയിലില് ഇടാനാവില്ല. നടിക്ക് പറയാനുള്ളത് കേള്ക്കൂ..
നീ തീവ്രവാദിയല്ല
അല്ല. നീയൊരു തീവ്രവാദിയല്ല. എന്ത് എവിടെ പറയണം എന്ന് നിശ്ചയമില്ലാത്ത ആളാണ് നീ. എന്ന് കരുതി നിന്നെ ജയിലില് ഇടാനോ പീഡിപ്പിക്കാനോ കൊല്ലാനോ ആകില്ല.
ഞാനും അവിടെ പഠിച്ചതാണ്
ഞാനും ജെ എന് യുവില് പഠിച്ചതാണ്. മാസ്റ്റേഴ്സ് ഡിഗ്രിക്ക് വേണ്ടി രണ്ട് വര്ഷം താന് അവിടെ ചെലവഴിച്ചതാണ് - ജെ എന് യു അലുമ്നിയായ സ്വര ഭാസ്കര് പറയുന്നു.
വോട്ട് ഇടതിന്
താന് പഠിക്കുന്ന കാലത്ത് ഒരു രാഷ്ട്രീയ പാര്ട്ടിയിലും ഉണ്ടായിരുന്നില്ല, എന്നാല് എപ്പോഴും വോട്ട് ചെയ്തിരുന്നത് ഇടതുപക്ഷത്തിനാണ്. താനൊരു ബോളിവുഡ് നടിയാണ് എന്നും കത്തില് സ്വര ഭാസ്കര് എടുത്തുപറയുന്നു.
ഉമര് ഖാലിദിനെതിരെ
അഖിലേന്ത്യാ മുസ്ലിം വ്യക്തിനിയമ ബോര്ഡ് മെമ്പറായ ഡോ. എസ് ക്യു ആര് ഇല്യാസിയുടെ മകനായ ഉമര് ഖാലിദിനെതിരെ പോലീസ് ലൂക്കൗട്ട് നോട്ടീസ് പുറപ്പെടുവിച്ചിട്ടുണ്ട്. അഫ്സല് ഗുരുവിനെ തൂക്കിലേറ്റിയതില് പ്രതിഷേധിച്ച് ജെ എന് യു കാംപസില് പരിപാടി നടത്തിയതിന് പിന്നാലെയാണ് ഇത്.
ഭീകരവാദവുമായി ബന്ധമോ
മഹാരാഷ്ട്ര സ്വദേശിയായ ഉമര് ഖാലിദിന് പാകിസ്താനിലെ ലഷ്കര് ഇ തൊയ്ബ, ജയ്ഷെ മുഹമ്മദ് തുടങ്ങിയ തീവ്രവാദ സംഘങ്ങളുമായി ബന്ധമുള്ളതായി ചില റിപ്പോര്ട്ടുകള് ഉണ്ടായിരുന്നു. ഉമര് ഖാലിദ് പാകിസ്താനിലേക്ക് പോയിരുന്നു എന്നും റിപ്പോര്ട്ടുകളുണ്ട്.