2024-25 ലെ കേന്ദ്ര ബജറ്റ് ജൂലൈ അവസാനത്തിൽ അവതരിപ്പിച്ചേക്കും; ജൂൺ 20 ന് പ്രീ ബജറ്റ് മീറ്റ്
ന്യൂഡൽഹി: 2024 - 25 സാമ്പത്തിക വർഷത്തേക്കുള്ള കേന്ദ്ര ബജറ്റ് ജൂലൈ അവസാന വാരം ധനമന്ത്രി നിർമ്മല സീതാരാമൻ അവതരിപ്പിക്കുമെന്ന് റിപ്പോർട്ട്. ജൂൺ 20- ന് വ്യവസായ ചേംബറുകളുമായി നിർമ്മല സീതാരാമൻ പ്രീ-ബജറ്റ് കൺസൾട്ടേഷനുകൾ നടത്തുമെന്ന് ഉറവിടങ്ങൾ പറയുന്നു. റവന്യൂ സെക്രട്ടറി സഞ്ജയ് മൽഹോത്രയുമായി നേരത്തെയുള്ള കൂടിക്കാഴ്ച ജൂൺ 18 ന് ഷെഡ്യൂൾ ചെയ്തിട്ടുണ്ട്.
പ്രധാ നയ പ്രഖ്യാപനങ്ങൾക്കൊപ്പം അടുത്ത അഞ്ച് വർഷത്തേക്കുള്ള സാമ്പത്തിക പദ്ധതികളും ധനമന്ത്രി അവതരിപ്പിച്ചേക്കും എന്നാണ് സൂചന. കൂടാതെ, ഉൽപ്പാദനം വർദ്ധിപ്പിക്കുന്നതിനുള്ള നടപടികൾ നടപ്പിലാക്കുന്നതിലൂടെ തൊഴിലില്ലായ്മ പരിഹരിക്കുന്നതിൽ കേന്ദ്രം ശ്രദ്ധ കേന്ദ്രീകരിച്ചേക്കും.
വരാനിരിക്കുന്ന ബജറ്റ് മോദി 3. 0 സർക്കാരിൻ്റെ സാമ്പത്തിക അജണ്ടയുടെ രൂപരേഖ നൽകും. ചെലവ് വർദ്ധിപ്പിക്കാതെ വളർച്ച വർദ്ധിപ്പിക്കുന്നതിലും സഖ്യത്തിൻ്റെ ആവശ്യങ്ങൾ നിറവേറ്റുന്നതിനുള്ള വിഭവങ്ങൾ കണ്ടെത്തുന്നതിലും ശ്രദ്ധ കേന്ദ്രീകരിക്കും. ഇന്ത്യയെ 5 ട്രില്യൺ ഡോളർ സമ്പദ്വ്യവസ്ഥയാക്കുന്നതിനുള്ള അതിവേഗ പരിഷ്കാരങ്ങളും 2047- ഓടെ 'വിക്ഷിത് ഭാരത്' കൈവരിക്കുകയുമാണ് പ്രധാന ലക്ഷ്യങ്ങൾ.
നടപ്പ് സാമ്പത്തിക വർഷം 7.2 ശതമാനം വളർച്ചയാണ് റിസർവ് ബാങ്ക് പ്രവചിക്കുന്നത്. ഗ്രാമീണ ഡിമാൻഡ് മെച്ചപ്പെടുത്തുകയും പണപ്പെരുപ്പം നിയന്ത്രിക്കുകയും ചെയ്യുന്നതാണ് ഈ വളർച്ചയെ നയിക്കുന്നത്. 2024 സാമ്പത്തിക വർഷത്തിൽ ആർ ബി ഐയുടെ എക്കാലത്തെയും ഉയർന്ന ലാഭവിഹിതമായ 2.11 ലക്ഷം കോടി രൂപയ്ക്ക് പിന്നാലെയാണ് ബജറ്റ് പ്രഖ്യാപനം.
മോദിയുടെ നേതൃത്വത്തിലുള്ള എൻ ഡി എ സർക്കാരിൻ്റെ മൂന്നാം ടേം കാർഷിക മേഖലയിലെ സമ്മർദ്ദം പരിഹരിക്കുക, തൊഴിലവസരങ്ങൾ സൃഷ്ടിക്കുക, മൂലധനച്ചെലവിൻ്റെ ആക്കം നിലനിർത്തുക, ധനപരമായ ഏകീകരണത്തിനായി വരുമാന വളർച്ച വർദ്ധിപ്പിക്കുക എന്നിവയിൽ ശ്രദ്ധ കേന്ദ്രീകരിക്കും.
മൊറാർജി ദേശായിയുടെ റെക്കോർഡ് മറികടന്ന് നിർമല സീതാരാമൻ്റെ തുടർച്ചയായ ഏഴാം ബജറ്റ് അവതരണമാണിത്. ആറ് പതിറ്റാണ്ട് മുമ്പ് തുടർച്ചയായി ആറ് ബജറ്റുകളാണ് ദേശായി അവതരിപ്പിച്ചത്. തുടർച്ചയായി രണ്ട് തവണ ധനമന്ത്രിയായ ഏക വനിത കൂടിയാണ് സീതാരാമൻ.
2024ലെ ഇടക്കാല ബജറ്റിൽ, മൂലധനച്ചെലവ് ലക്ഷ്യം 11.1 ശതമാനം വർധിപ്പിച്ച് 11.11 ലക്ഷം കോടി രൂപയായി, ഇന്ത്യയുടെ ജി ഡി പിയുടെ 3.4 ശതമാനം വരും. രാജ്യത്തിൻ്റെ സാമ്പത്തിക കുതിപ്പ് നിലനിർത്താനാണ് ഈ വർദ്ധനവ് ലക്ഷ്യമിടുന്നത്.
Click it and Unblock the Notifications
Sign in with Google