കേന്ദ്ര ബജറ്റ് 2025: കാർഷിക മേഖലയ്ക്കായി ധൻധാന്യ കൃഷി യോജന; കർഷകരുടെ വായ്പാ പരിധി 5 ലക്ഷമാക്കി ഉയർത്തി

ഡൽഹി: കേന്ദ്രബജറ്റിൽ കര്‍ഷകര്‍ക്കായി വിപുലമായ പദ്ധതികള്‍ പ്രഖ്യാപിച്ച് ധനമന്ത്രി നിർമല സീതാരാമൻ. സംസ്ഥാനങ്ങളുമായി ചേർന്ന് പ്രധാനമന്ത്രി ധൻധാന്യ കൃഷി യോജന നടപ്പാക്കുമെന്ന് ധനമന്ത്രി അറിയിച്ചു. 1.7 കോടി കർഷകർക്ക് പദ്ധതി സഹായകരമാകും. കാർഷിക ഉത്പാദന ക്ഷമത വർധിപ്പിക്കാനും പഞ്ചായത്ത് തലത്തിൽ സംഭരണം വർധിപ്പിക്കാനും ഇത് സഹായിക്കുമെന്നും ധമന്ത്രി വ്യക്തമാക്കി.

കർഷകർക്ക് വേണ്ടി നിരവധി അവസരങ്ങൾ വളർത്തിയെടുക്കാൻ ലക്ഷ്യമിടുന്നതാണ് പദ്ധതി. ആഗോള സമ്പ്രദായങ്ങൾ ഇതിൽ ഉൾപ്പെടും. പയറുവർഗങ്ങൾക്ക് വേണ്ടി മാത്രം പ്രത്യേക പദ്ധതികൾ ആരംഭിക്കും. തുവര, ഉഴുന്ന്, മൂസർ എന്നിവയിൽ പ്രത്യേക ശ്രദ്ധ ചെലുത്തു വരുമാനം ഉയർന്നതോടെ പഴവർഗങ്ങളുടെ ഉപഭോഗവും വർധിച്ചിട്ടുണ്ട്. സംസ്ഥാനങ്ങളുമായി ചേർന്ന് മേഖലയിലെ കർഷകരുടെ വരുമാനം ഉയർത്താനുള്ള നടപടി സ്വീകരിക്കും. മഖാന കർഷകരുടെ ഉന്നമനത്തിനായി ബിഹാറിൽ മഖാന ബോർഡ് സ്ഥാപിക്കും. മഖാന കർഷകർക്കായി ബോർഡിന് കീഴിൽ പരിശീലനം സംഘടിപ്പിക്കുമെന്നും ധനമന്ത്രി വ്യക്തമാക്കി.

വിള വൈവിധ്യവല്‍ക്കരണം, ജലസേചന സൗകര്യങ്ങള്‍, വായ്പ ലഭ്യത എന്നിവയില്‍ ശ്രദ്ധ കേന്ദ്രീകരിക്കും. പിഎം കിസാന്‍ ആനുകൂല്യം വര്‍ധിപ്പിക്കും.അത്യുത്പാദനശേഷിയുള്ള വിത്തുകൾക്കായി പ്രത്യേക ദൗത്യം ആരംഭിക്കും. കൂടാതെ പരുത്തി ഉത്പാദനക്ഷമത വർധിപ്പിക്കാനും പദ്ധതികൾ തുടങ്ങും. ഇതിനായി പഞ്ചവത്സര പദ്ധതിയാണ് നടപ്പാക്കുക. കർഷകർക്ക് ഹ്രസ്വകാല വായ്പകൾ ലഭിക്കാൻ കിസാൻ ക്രെഡിറ്റ് കാർഡുകൾ നൽകും. വായ്പ പരിധി 3 ലക്ഷം രൂപയിൽ നിന്ന് 5 ലക്ഷം രൂപയായി ഉയർത്തുമെന്നും ധനമന്ത്രി വ്യക്തമാക്കി.

ആഗോളതലത്തിൽ മത്സ്യകൃഷിയിൽ രണ്ടാം സ്ഥാനത്താണ് ഇന്ത്യ. ആൻഡമാൻ നിക്കോബാർ, ലക്ഷദ്വീപ് ദ്വീപുകൾക്ക് ചുറ്റുമുള്ള മത്സ്യബന്ധനത്തെ പിന്തുണയ്ക്കുന്നതിന് സർക്കാർ പ്രത്യേക ചട്ടക്കൂട് സ്ഥാപിക്കും. സമുദ്രോത്പന്നങ്ങളുടെ കയറ്റുമതിക്കായി 60,000 കോടി വിലയിരുത്തും', ധനമന്ത്രി വ്യക്തമാക്കി.

അതേസമയം കനത്ത പ്രതിപക്ഷ ബഹളത്തോടെയായിരുന്നു ബജറ്റ് സമ്മേളനത്തിന് തുടക്കം കുറിച്ചത്. കുംഭമേള അപകടം അടക്കമുള്ള വിഷയങ്ങൾ ഉന്നയിച്ചായിരുന്നു പ്രതിഷേധം. പ്രതിപക്ഷാംഗങ്ങൾ നടുത്തളത്തിലും സീറ്റിലും ഇരുന്ന് പ്രതിഷേധിച്ചതോടെ സ്പീക്കർ ഇടപെട്ടു. വിഷയങ്ങൾ ചർച്ച ചെയ്യാൻ ബജറ്റ് അവതരണത്തിന് ശേഷം സമയം അനുവദിക്കുമെന്ന് വ്യക്തമാക്കിയെങ്കിലും പ്രതിപക്ഷം പ്രതിഷേധം തുടർന്നു. പിന്നാലെ പ്രതിപക്ഷം സഭയിൽ നിന്നും ഇറങ്ങിപോയി. അതേസമയം പ്രതിപക്ഷ ബഹളം വകവെയ്ക്കാതെ ധനനമന്ത്രി ബജറ്റ് അവതരണം തുടർന്നു. വികസനത്തിന് ഊന്നൽ നൽകിക്കൊണ്ടുള്ളതാണ് ഇത്തവണത്തെ ബജറ്റെന്ന് ധനമന്ത്രി പറഞ്ഞു.