'ബ്രിട്ടീഷ് കള്‍ച്ചറിന്' മോദിയുടെ ചെക്ക്... ഇത്തവണ ബജറ്റ് നേരത്തേ, ജനുവരി 31ന്?

ദില്ലി: ബ്രിട്ടീഷുകാരുടെ കാലം മുതലുള്ള ബജറ്റ് അവതരണത്തിന്റെ സമയം നരേന്ദ്ര മോദി സര്‍ക്കാര്‍ മാറ്റിപ്പിടിക്കാന്‍ ഒരുങ്ങുന്നു. ജനുവരി 31നായിരിക്കും അടുത്ത വര്‍ഷം മുതല്‍ ബജറ്റ് അവതരണം എന്നാണ് റിപ്പോര്‍ട്ടുകള്‍. കലണ്ടര്‍ ഇയര്‍ തുടങ്ങുന്ന ജനുവരിയില്‍ ബജറ്റ് അവതരിപ്പിക്കാനുള്ള സാധ്യതകള്‍ മോദി സര്‍ക്കാര്‍ ആരാഞ്ഞ് വരികയാണ് എന്ന് ദില്ലിയില്‍ നിന്നുള്ള സൂചനകള്‍ പറയുന്നു.

കാലങ്ങളായി ബജറ്റ് അവതരിപ്പിക്കാറുള്ളത് ഫെബ്രുവരി മാസത്തിലാണ്. ഇത്തവണ ബജറ്റ് ജനുവരി അവസാനത്തേക്ക് മാറ്റാന്‍ സര്‍ക്കാര്‍ ആലോചിക്കുകയാണ്. ബജറ്റ് അവതരിപ്പിക്കാന്‍ വേണ്ടി പ്രത്യേകിച്ച് ഏതെങ്കിലും ഒരു ദിവസം ഭരണഘടനയും മുന്നോട്ട് വെക്കുന്നില്ല. ബജറ്റ് നടപടികളില്‍ സമൂല മാറ്റമാണ് കേന്ദ്രം ഭരിക്കുന്ന ബി ജെ പി സര്‍ക്കാര്‍ പരിശോധിക്കുന്നത്.

വരുന്ന സാമ്പത്തിക വര്‍ഷം മുതല്‍ പ്രത്യേക റെയില്‍വേ ബജറ്റ് ഉണ്ടാകില്ലെന്ന് കേന്ദ്രം നേരത്തെ തന്നെ വ്യക്തമാക്കിയിരുന്നു. ഏപ്രില്‍ 1ന് പുതിയ സാമ്പത്തിക വര്‍ഷം ആരംഭിക്കുന്ന സാഹചര്യത്തില്‍ സര്‍ക്കാരിന്റെ രണ്ട് മാസത്തെ ചെലവുകള്‍ വോട്ട് ഓണ്‍ അക്കൗണ്ട് വഴിയാണ് പാസാക്കി എടുക്കാറുള്ളത്. കേന്ദ്ര ബജറ്റ് ജനുവരിയില്‍ തന്നെ അവതരിപ്പിച്ചാല്‍ വോട്ട് ഓണ്‍ അക്കൗണ്ട് ഒഴിവാക്കാമെന്നാണ് സര്‍ക്കാര്‍ കണക്കുകൂട്ടുന്നത്.

92 വര്‍ഷത്തെ കീഴ് വഴക്കം അവസാനിപ്പിച്ചാണ് കേന്ദ്ര സര്‍ക്കാര്‍ റെയില്‍വേ ബജറ്റ് പൊതു ബജറ്റിന് കീഴില്‍ കൊണ്ടുവരുന്നത്. റെയില്‍വേ ബജറ്റ് പൊതുബജറ്റിന്റെ കീഴിലാക്കണമെന്ന നിര്‍ദേശവുമായി കേന്ദ്ര റെയില്‍വേ മന്ത്രി സുരേഷ് പ്രഭു ധനമന്ത്രി തന്നെയാണ് അരുണ്‍ ജെയ്റ്റ്‌ലിക്ക് കത്തയച്ചത്. പൊതു ബജറ്റിന് കീഴിലാക്കുന്നത് സംബന്ധിച്ച നടപടിക്രമങ്ങള്‍ പഠിക്കുന്നതിന് വേണ്ട് ധനവകാര്യ വകുപ്പ് അഞ്ചംഗ സംഘത്തെ നിയോഗിച്ചിരുന്നു.

English summary

Union Budget may be advanced to 31 January