ജനാധിപത്യത്തിന്‍റെ ശിപായികൾ, ഇത് ജനങ്ങളുടെ തീരുമാനം: വോട്ടെണ്ണൽ ദിനത്തിൽ അഖിലേഷ്‌ യാദവ്

ലഖ്‌നൗ: സംസ്ഥാനത്ത് നിയമസഭ തെരഞ്ഞെടുപ്പിന്‍റെ വോട്ടെണ്ണൽ ദിനമായ ഇന്ന് തീരുമാനമെടുക്കാനുള്ള ദിവസമാണെന്ന് സമാജ്‌വാദി പാർട്ടി നേതാവ് അഖിലേഷ്‌ യാദവ്. വോട്ടർമാർക്കും പാർട്ടി പ്രവർത്തകർക്കും അഖിലേഷ്‌ നന്ദി അറിയിച്ചു. കൗണ്ടിങ് സെന്‍ററുകളിൽ രാത്രി മുഴുവൻ ജാഗ്രത പാലിച്ചതിന് സമാജ്‌വാദി പാർട്ടി പ്രവർത്തകർക്കും അദ്ദേഹം നന്ദി അറിയിച്ചു. പാർട്ടി പ്രവർത്തകരെ ജനാധിപത്യത്തിന്‍റെ ശിപായികൾ എന്നായിരുന്നു അദ്ദേഹം വിശേഷിപ്പിച്ചത്. ട്വിറ്ററിലൂടെയായിരുന്നു അദ്ദേഹത്തിന്‍റെ പ്രതികരണം.

വോട്ടിങ് മെഷീനുകളിൽ ഇടപെടൽ നടത്തിയെന്ന ആരോപണവുമായി കഴിഞ്ഞ ദിവസം അഖിലേഷ്‌ യാദവ് രംഗത്തെത്തിയിരുന്നു. അഖിലേഷ് യാദവിന്‍റെ ആരോപണങ്ങളെ ശരിവക്കുന്ന വീഡിയോ ദൃശ്യങ്ങളും സാമൂഹിക മാധ്യമങ്ങളിൽ പ്രചരിച്ചിരുന്നു. ട്രക്കുകളിലായി ഇവിഎം മെഷീനുകൾ കൊണ്ടുപോകുന്ന ദൃശ്യങ്ങളാണ് വൈറലായത്.

ഇവിഎം മെഷീനുകൾ ഒരു പ്രദേശത്ത് നിന്ന് മറ്റൊരു ഇടത്തേക്ക് കൊണ്ടുപോകുന്നതിനായുള്ള നടപടി ക്രമങ്ങൾ പാലിച്ചില്ലെന്നും ഈ നടപടിയിൽ ദുരൂഹതയുണ്ടെന്നുമായിരുന്നു അഖിലേഷ്‌ യാദവിന്‍റെ ആരോപണം. സ്ഥാനാർഥികളെ പോലും അറിയിക്കാതെ ഡി.എം ഇലക്‌ട്രോണിക് വോട്ടിങ് മെഷീനുകൾ കൊണ്ടുപോകുകയാണെന്നും വിഷയത്തിൽ തെരഞ്ഞെടുപ്പ് കമ്മിഷൻ ഇടപെടണമെന്നും അഖിലേഷ്‌ യാദവ് അഭ്യർഥിച്ചിരുന്നു. സംഭവത്തിൽ എഡിഎമ്മിനെ സസ്‌പെൻഡ് ചെയ്യുകയും മറ്റു രണ്ട് ഉദ്യോഗസ്ഥരെ തെരഞ്ഞെടുപ്പ് ചുമതലയിൽ നിന്ന് ഒഴിവാക്കുകയും ചെയ്‌തിട്ടുണ്ട്.

അതേ സമയം ഉദ്യോഗസ്ഥർക്ക് പരിശീലനത്തിനായി കൊണ്ടുപോകുന്ന ഇവിഎം ആയിരുന്നു ഇതെന്നാണ് തെരഞ്ഞെടുപ്പ് കമ്മിഷന്‍റെ വിശദീകരണം. ഉത്തർപ്രദേശിൽ 202 സീറ്റുകളിൽ നിലവിൽ ബിജെപി ലീഡ് ചെയ്യുന്നുണ്ട്. സമാജ് വാദി പാ‍ർട്ടി 110 സീറ്റുകളിലാണ് ലീഡ് ചെയ്യുന്നത്. 75 സീറ്റുകളിലെ ലീഡ് നിലയാണ് ഇനിയും വ്യക്തമാവാനുള്ളത്. ആദ്യ ഘട്ടത്തിൽ എസ്‌.പി ശക്തമായ പോരാട്ടം നടത്തിയിരുന്നു. രാവിലെ 9.10ഓടെ എസ്.പിയുമായുള്ള ലീഡ് വ്യത്യാസം നൂറ് സീറ്റോളമായി ഉയർന്നിരുന്നു.

ഉത്തർപ്രദേശിൽ ബിജെപിക്ക് ഭരണത്തുടർച്ചയുണ്ടാകുമെന്നായിരുന്നു എല്ലാ എക്‌സിറ്റ് പോളുകളുടെയും പ്രവചനം. 211 മുതൽ 217 വരെ സീറ്റുകൾ ബിജെപി നേടുമെന്നും എസ്‌.പിക്ക് 116 മുതൽ 165 സീറ്റുകൾ വരെ ലഭിക്കുമെന്നാണ് എക്‌സിറ്റ് പോളുകൾ പ്രവചിച്ചത്. യുപിയിൽ ബിജെപിയും സഖ്യത്തിന് 43 ശതമാനം വോട്ട് ഷെയർ ലഭിക്കുമെന്നാണ് ലോക്‌നീതി-സിഎസ്‌ഡിഎസ് സർവെയുടെ പ്രവചനം.

സംസ്ഥാനത്തെ മുഖ്യപ്രതിപക്ഷമായ സമാജ്‌വാദി പാർട്ടി 35 ശതമാനം വോട്ട് നേടുമെന്നും സർവെ പ്രവചിക്കുന്നു. മായാവതിയുടെ ബിഎസ്‌പി 15 ശതമാനം വോട്ടും കോൺഗ്രസ് മൂന്ന് ശതമാനം വോട്ടും മറ്റുള്ളവർ ചേർന്ന് നാല് ശതമാനം വോട്ടും നേടുമെന്ന് സർവെ ഫലം പറയുന്നു.

English summary

UP assemble election Akhilesh yadav calls party workers as sepoys of democracy