ഉത്തരാഖണ്ഡില്‍ ഹെലികോപ്ടർ തകർന്നു വീണു: 6 കേദാർനാഥ് തീർത്ഥാടകർ മരണപ്പെട്ടതായി റിപ്പോർട്ട്

ഡെറാഡൂൺ: ഉത്തരാഖണ്ഡില്‍ കേദാർനാഥ് തീർത്ഥാടകർ സഞ്ചരിച്ച ഹെലികോപ്ടർ അപകടത്തില്‍പ്പെട്ടു. ഡെറാഡൂണില്‍ നിന്നും പുണ്യസ്ഥലമായ കേദാർനാഥ് ക്ഷേത്രത്തിലേക്ക് പുറപ്പെട്ട ഹെലികോപ്റ്റർ ഗൗരികുണ്ഡിനും ത്രിയുഗിനാരായണിനും ഇടയിലുള്ള മേഖലയില്‍ തകർന്നു വീഴുകയായിരുന്നു. തകർന്നു വീണ ഹെലികോപ്ടറിന്റെ അവശിഷ്ടങ്ങള്‍ കണ്ടെത്തിയിട്ടുണ്ട്. ഇവിടെ രക്ഷാപ്രവർത്തനം പുരോഗമിച്ചുകൊണ്ടിരിക്കുകയാണ്.

പൈലറ്റ് ഉൾപ്പെടെ ഏഴ് പേരായിരുന്നു ഹെലികോപ്ടറിലുണ്ടായിരുന്നത്. ഇവരില്‍ അഞ്ചുപേർ മരണപ്പെട്ടെന്നാണ് ദേശീയ മാധ്യമങ്ങള്‍ റിപ്പോർട്ട് ചെയ്യുന്നത്. ആര്യൻ ഏവിയേഷൻ പ്രൈവറ്റ് ലിമിറ്റഡിന്റെ ഉടമസ്ഥതയിലുള്ളതാണ് ഹെലികോപ്റ്റർ, തുറസ്സായ വയലിൽ തീപിടിച്ച് കിടക്കുന്ന ഹെലികോപ്ടറിന്റെ ദൃശ്യങ്ങള്‍ ഇതിനോടകം പുറത്ത് വന്നിട്ടുണ്ട്. മോശം കാലാവസ്ഥയാണ് ഈ ദാരുണമായ സംഭവത്തിന് കാരണമെന്നാണ് പ്രാഥമിക നിഗമനം.

ബെൽ 407 മോഡൽ ഹെലികോപ്റ്റർ ആറ് തീർഥാടകരെയും പൈലറ്റിനെയും വഹിച്ച് പറന്നുയർന്ന് തൊട്ടുപിന്നാലെയാണ് അപകടമുണ്ടായത്. ഗൗരികുണ്ഡിനും ത്രിയുഗിനാരായണിനും ഇടയിലുള്ള മലനിരകളിൽ, ദുഷ്കരമായ ഭൂപ്രദേശവും പ്രതികൂലമായ കാലാവസ്ഥയും ഉള്ള പ്രദേശത്താണ് ഹെലികോപ്റ്റർ തകർന്നത്. മേഘാവൃതമായ ആകാശവും മൂടൽമഞ്ഞും മോശം ദൃശ്യപരതയും അപകടത്തിന് കാരണമായിരിക്കാമെന്ന് വിലയിരുത്തപ്പെടുന്നു.

ഹെലികോപ്റ്റർ നിലത്ത് ഇടിച്ച് വീണതിന് ശേഷം തീപിടിക്കുകയും അവശിഷ്ടങ്ങൾ ചുറ്റുപാടും ചിതറുകയും ചെയ്തുവെന്നാണ് പുറത്ത് വരുന്ന ദൃശ്യങ്ങളില്‍ നിന്നും മനസ്സിലാക്കാന്‍ സാധിക്കുക. ഉത്തരാഖണ്ഡ് സ്റ്റേറ്റ് ഡിസാസ്റ്റർ റെസ്പോൺസ് ഫോഴ്സ് (SDRF) ഉം ക പോലീസും ഉടൻ തന്നെ രക്ഷാപ്രവർത്തനങ്ങൾക്കായി സ്ഥലത്തേക്ക് എത്തിയിട്ടുണ്ട്. എന്നാൽ, മഴയും മഞ്ഞുവീഴ്ചയും ഉൾപ്പെടെയുള്ള പ്രതികൂല കാലാവസ്ഥ രക്ഷാപ്രവർത്തനങ്ങള്‍ക്ക് വിലങ്ങുതടിയാകുന്നുണ്ട്.

ഉത്തരാഖണ്ഡ് മുഖ്യമന്ത്രി പുഷ്കർ സിംഗ് ധാമി അപകടത്തിൽ ആഴമായ ദുഃഖം രേഖപ്പെടുത്തുകയും സംഭവത്തിന്റെ കാരണം കണ്ടെത്താൻ വിശദമായ അന്വേഷണത്തിന് ഉത്തരവിടുകയും ചെയ്തു.'കേദാർനാഥിന് സമീപമുണ്ടായ ഹെലികോപ്റ്റർ അപകടത്തിന്റെ വാർത്ത ഹൃദയഭേദകമാണ്. എസ് ഡി ആർ എഫുംഉം ജില്ലാ ഭരണകൂടവും രക്ഷാപ്രവർത്തനങ്ങൾക്കായി സ്ഥലത്തുണ്ട്. സംഭവത്തെക്കുറിച്ച് വിശദമായ അന്വേഷണം നടത്താൻ നിർദ്ദേശം നൽകിയിട്ടുണ്ട്' ധാമി എക്സിൽ കുറിച്ചു.

ഗർഹ്വാൾ ഹിമാലയത്തിൽ 3,583 മീറ്റർ ഉയരത്തിൽ സ്ഥിതി ചെയ്യുന്ന കേദാർനാഥ് ക്ഷേത്രം, ബദ്രിനാഥ്, ഗംഗോത്രി, യമുനോത്രി എന്നിവയോടൊപ്പം ചാർ ധാം യാത്രയുടെ ഭാഗമായ ഇന്ത്യയിലെ ഏറ്റവും പുണ്യസ്ഥലങ്ങളിലൊന്നാണ്. ഗൗരികുണ്ഡിൽ നിന്ന് 16 കിലോമീറ്റർ ദൂരമുള്ള ദുഷ്കരമായ ട്രെക്കിംഗ് പാതയിലൂടെ എല്ലാ വർഷവും ആയിരക്കണക്കിന് തീർഥാടകരാണ് ഇവിടെ എത്തുന്നത്. ട്രെക്കിങിന് പകരം ഹെലികോപ്റ്റർ സർവീസുകും വ്യാപകമായി ഉപയോഗിക്കപ്പെടുന്നുണ്ട്. എന്നാൽ, മേഖലയിലെ അനിശ്ചിത കാലാവസ്ഥയും ദുഷ്കരമായ ഭൂപ്രകൃതിയും ഹെലികോപ്റ്റർ യാത്രകളെ കൂടുതല്‍ അപകടകരമാക്കുന്നു.