വിജയ് പ്രായം തെറ്റിച്ചു; ആസ്തിയിലും വൈരുധ്യം, ടിവികെ നേതാവ് മാത്രമല്ല, മറ്റുള്ളവരും പെട്ടു

വിജയുടെ തമിഴക വെട്രി കഴകം (ടി.വി.കെ) സത്യവാങ്മൂലം സംബന്ധിച്ച പ്രതിസന്ധിയിൽ. സ്ഥാനാർത്ഥി പത്രിക സമർപ്പിക്കാനുള്ള അവസാന ദിവസമായ ഇന്ന്, പാർട്ടിയും അതിൻ്റെ നേതാവ് വിജയും കടുത്ത വെല്ലുവിളികളാണ് നേരിടുന്നത്. രണ്ട് വ്യത്യസ്ത മണ്ഡലങ്ങളിൽ വിജയ് സമർപ്പിച്ച അപേക്ഷകളിലെ പൊരുത്തക്കേടുകൾ രാഷ്ട്രീയ വൃത്തങ്ങളിൽ വലിയ ചർച്ചാ വിഷയമായി.

പെരമ്പൂർ, തിരുച്ചി കിഴക്ക് എന്നീ രണ്ട് മണ്ഡലങ്ങളിൽ മത്സരിക്കാൻ അദ്ദേഹം സമർപ്പിച്ച സത്യവാങ്മൂലങ്ങളിലെ വൈരുധ്യങ്ങൾ തിരഞ്ഞെടുപ്പ് ഉദ്യോഗസ്ഥരെ പോലും അമ്പരപ്പിച്ചിരിക്കുകയാണ്. വിവരങ്ങളിലെ അന്തരമാണ് ടി.വി.കെ-ക്ക് അപ്രതീക്ഷിത തിരിച്ചടി നൽകുന്നത്. പത്രിക തള്ളുന്നതിന് വരെ കാരണമായേക്കാവുന്ന വൈരുധ്യമാണുള്ളത്.

വിജയിയുടെ പ്രായം സംബന്ധിച്ചാണ് പ്രധാന പൊരുത്തക്കേടുകളിലൊന്ന്. പെരമ്പൂർ മണ്ഡലത്തിൽ സമർപ്പിച്ച സത്യവാങ്മൂലത്തിൽ തൻ്റെ വയസ്സ് 52 എന്ന് രേഖപ്പെടുത്തിയ വിജയ്, തിരുച്ചി കിഴക്കിലെ സത്യവാങ്മൂലത്തിൽ അത് 51 എന്ന് കുറിച്ചു. "ഒരേ വർഷത്തിൽ രണ്ട് വയസ്സോ?" എന്ന് ചോദിച്ച് സമൂഹമാധ്യമങ്ങളിൽ ട്രോളുകൾ നിറയുകയാണ്, ഇത് പാർട്ടി പ്രവർത്തകരെയും വെട്ടിലാക്കിയിട്ടുണ്ട്.

പ്രായത്തിലെ ഈ പിഴവുകൾ കൂടാതെ, സ്വത്ത് വിവരങ്ങളിലും വലിയ പൊരുത്തക്കേടുകൾ കണ്ടെത്തിയിട്ടുണ്ട്. പെരമ്പൂരിലെ സത്യവാങ്മൂലത്തിൽ തൻ്റെ സ്ഥാവര സ്വത്തുക്കളുടെ വിപണി മൂല്യം ഏകദേശം 115 കോടി രൂപയാണെന്ന് രേഖപ്പെടുത്തിയപ്പോൾ, തിരുച്ചി കിഴക്കിലെ അപേക്ഷയിൽ ഇതേ സ്വത്തുക്കളുടെ മൂല്യം 220 കോടി രൂപയായി പെട്ടെന്ന് ഉയർത്തി കാണിച്ചിരിക്കുന്നു.

കൂടാതെ, പെരമ്പൂർ അപേക്ഷയിൽ ഭാര്യ സംഗീത, മകൻ സഞ്ജയ്, മകൾ ദിവ്യ എന്നിവരുടെ സ്വത്ത് വിവരങ്ങൾ ചേർത്തിരുന്നില്ല. എന്നാൽ, തിരുച്ചി കിഴക്കിലെ സത്യവാങ്മൂലത്തിൽ ഈ വിവരങ്ങൾ വിശദമായി രേഖപ്പെടുത്തിയിട്ടുണ്ട്. "പെരമ്പൂരിൽ കാണിക്കാത്ത ശ്രദ്ധ തിരുച്ചിയിൽ എന്തിന്?" എന്ന് ചോദിച്ച് പ്രതിപക്ഷ പാർട്ടികൾ ഇതിനെതിരെ വിമർശനം ആരംഭിച്ചു കഴിഞ്ഞു.

തനിക്കെതിരെ നിലവിലുണ്ടായിരുന്ന കേസുകളെക്കുറിച്ചുള്ള വിവരങ്ങളിലും വിജയ് വൈരുധ്യം കാണിച്ചു. പെരമ്പൂർ അപേക്ഷയിൽ തനിക്കെതിരെ കേസുകൾ ഒന്നുമില്ല (Nil) എന്ന് വ്യക്തമാക്കിയപ്പോൾ, തിരുച്ചി കിഴക്കിലെ സത്യവാങ്മൂലത്തിൽ രണ്ട് കേസുകൾ പട്ടികപ്പെടുത്തിയിരിക്കുന്നു. 2025-ൽ മധുരയിൽ നടന്ന പാർട്ടി സമ്മേളനത്തിനിടെയുണ്ടായ സംഘർഷത്തിൽ രജിസ്റ്റർ ചെയ്ത കേസും, പെരമ്പൂരിലെ പ്രചാരണത്തിനിടെ നിയമലംഘനം നടത്തിയതിന് രജിസ്റ്റർ ചെയ്ത കേസുകളുമാണ് ഇവയിൽ ഉൾപ്പെടുന്നത്.

നേരത്തെ അറിയാമായിരുന്നിട്ടും എന്തുകൊണ്ടാണ് ഈ കേസുകൾ പെരമ്പൂരിലെ സത്യവാങ്മൂലത്തിൽ മറച്ചുവെച്ചത് എന്നതാണ് ഇപ്പോൾ ഉയരുന്ന പ്രധാന ചോദ്യം. ഈ വിവരങ്ങളിലെ വൈരുധ്യങ്ങൾ തിരഞ്ഞെടുപ്പ് കമ്മീഷൻ ഗൗരവമായി കാണാനുള്ള സാധ്യതയുണ്ടെന്നും ഇത് വിജയുടെ സ്ഥാനാർത്ഥിത്വത്തെ തന്നെ ബാധിക്കുമെന്നും ചൂണ്ടിക്കാണിക്കപ്പെടുന്നു.

പാർട്ടി നേതാവിന് തന്നെ ഇങ്ങനെയൊരു അവസ്ഥയാണെങ്കിൽ, ജില്ലാ സെക്രട്ടറിമാരായിരുന്ന ടി.വി.കെ സ്ഥാനാർത്ഥികളുടെ സ്ഥിതി കൂടുതൽ മോശമാണ്. സത്യവാങ്മൂലങ്ങൾ കൃത്യമായി പൂരിപ്പിക്കാൻ അറിയാത്തതിനാൽ പലയിടത്തും ഡമ്മി സ്ഥാനാർത്ഥികളെ പോലും നിർത്താൻ ടി.വി.കെ പാടുപെടുന്നുണ്ട്. മറ്റു പല മണ്ഡലങ്ങളിലും സ്ഥാനാർത്ഥികൾ അപേക്ഷാ ഫോമുകൾ പോലും പൂരിപ്പിച്ച് നൽകിയിട്ടില്ല. പാളിച്ച മനസ്സിലാക്കിയ വിജയ്, പെരമ്പൂരിലും തിരുച്ചിയിലും തിരുത്തിയ സത്യവാങ്മൂലങ്ങൾ ഇപ്പോൾ സമർപ്പിച്ചിട്ടുണ്ട്.

English summary

Vijay Age, Asset Are Different In Nomination Papers; How It Happened, Then Actor What Did