ഭരണം പിടിക്കാൻ വിജയ്, കൈപിടിക്കാൻ കോൺഗ്രസ്! തമിഴ്നാട്ടിൽ പുതിയ രാഷ്ട്രീയ സമവാക്യങ്ങൾ

തമിഴ്‌നാട് രാഷ്ട്രീയത്തിൽ പതിറ്റാണ്ടുകൾ നീണ്ട ദ്രാവിഡ പാർട്ടികളുടെ ആധിപത്യത്തിന് അന്ത്യം കുറിച്ചുകൊണ്ട് നടൻ വിജയുടെ തമിഴക വെട്രി കഴകം (TVK) വിജയക്കൊടി പാറിച്ചിരിക്കുകയാണ്. 2026-ലെ നിയമസഭാ തിരഞ്ഞെടുപ്പിൽ 108 സീറ്റുകൾ നേടി ഏറ്റവും വലിയ ഒറ്റകക്ഷിയായി മാറിയ ടിവികെ, ഇപ്പോൾ സർക്കാർ രൂപീകരിക്കാനുള്ള നീക്കങ്ങൾ ഊർജ്ജിതമാക്കിയിരിക്കുകയാണ്. ഭൂരിപക്ഷത്തിന് ആവശ്യമായ 118 തികയ്ക്കാൻ കോൺഗ്രസിന്റെ പിന്തുണ തേടിയിരിക്കുകയാണ് ടിവികെ.

കോൺഗ്രസിന്റെ ചുവടുമാറ്റം

ഡിഎംകെ സഖ്യത്തിന്റെ ഭാഗമായി മത്സരിച്ച കോൺഗ്രസിന് ഇത്തവണ തമിഴ്നാട്ടിൽ 5 സീറ്റുകളാണ് ലഭിച്ചത്. വിജയുടെ പിതാവ് എസ്.എ. ചന്ദ്രശേഖർ നേരത്തെ തന്നെ കോൺഗ്രസിനോട് പിന്തുണ ആവശ്യപ്പെട്ട് രംഗത്തെത്തിയിരുന്നു. "കോൺഗ്രസിന് നഷ്ടപ്പെട്ട അധികാരം വിജയ് തിരികെ നൽകും" എന്നായിരുന്നു അദ്ദേഹത്തിന്റെ വാക്കുകൾ. നിലവിൽ കോൺഗ്രസ് ഹൈക്കമാൻഡ് ഈ വിഷയത്തിൽ അന്തിമ തീരുമാനമെടുക്കാൻ തമിഴ്‌നാട് ഘടകത്തിന നിർദ്ദേശം നൽകിയിട്ടുണ്ട്. ബിജെപിയെയും എഐഎഡിഎംകെയെയും അധികാരത്തിൽ നിന്ന് മാറ്റിനിർത്തുക എന്ന ലക്ഷ്യത്തോടെ ടിവികെയെ പിന്തുണയ്ക്കുന്ന കാര്യത്തിൽ കോൺഗ്രസിനുള്ളിൽ സജീവമായ ചർച്ചകൾ നടക്കുകയാണ്.

സ്റ്റാലിന്റെ പരാജയവും ഡിഎംകെയുടെ തകർച്ചയും

ഇത്തവണത്തെ തിരഞ്ഞെടുപ്പിലെ ഏറ്റവും വലിയ അമ്പരപ്പ് മുഖ്യമന്ത്രി എം.കെ. സ്റ്റാലിന്റെ പരാജയമാണ്. തന്റെ മണ്ഡലമായ കൊളത്തൂരിൽ ടിവികെ സ്ഥാനാർത്ഥി വി.എസ്. ബാബുവിനോടാണ് സ്റ്റാലിൻ പരാജയപ്പെട്ടത്. ഡിഎംകെ വെറും 59 സീറ്റുകളിലേക്ക് ഒതുങ്ങിയതോടെ പ്രതിപക്ഷ നിരയിലേക്ക് മാറേണ്ടി വന്നിരിക്കുകയാണ്. ഉദയനിധി സ്റ്റാലിനെ പ്രതിപക്ഷ നേതാവായി സ്റ്റാലിൻ നിർദ്ദേശിച്ചതായും റിപ്പോർട്ടുകളുണ്ട്. 30 വർഷത്തിന് ശേഷം തമിഴ്നാട്ടിൽ ഡിഎംകെ-എഐഎഡിഎംകെ ഇതര സർക്കാർ അധികാരത്തിലേക്ക് വരുന്നത് ഇന്ത്യൻ രാഷ്ട്രീയത്തിൽ തന്നെ വലിയ ചലനമുണ്ടാക്കും.

സഖ്യസാധ്യതകൾ

കോൺഗ്രസിനൊപ്പം ഇടത് പാർട്ടികളുടെയും (CPI, CPM), വിസികെയുടെയും (VCK) പിന്തുണ കൂടി വിജയ് പ്രതീക്ഷിക്കുന്നുണ്ട്. ഈ പാർട്ടികൾ കൂടി പിന്തുണ നൽകിയാൽ 118 എന്ന മാന്ത്രിക സംഖ്യ കടക്കാൻ വിജയ്ക്ക് സാധിക്കും. മെയ് 7-ന് പുതിയ മുഖ്യമന്ത്രിയായി വിജയ് സത്യപ്രതിജ്ഞ ചെയ്യുമെന്നാണ് സൂചന. അഴിമതി വിരുദ്ധ മുദ്രാവാക്യവും തമിഴ് വികാരവും ഉയർത്തിപ്പിടിച്ച വിജയിന്റെ ഈ പടയോട്ടം തമിഴ് ജനത പുതിയൊരു രാഷ്ട്രീയ സംസ്കാരത്തെ സ്വീകരിച്ചു എന്നതിന്റെ തെളിവാണ്.