വഖഫ് നിയമം ഇന്ന് മുതൽ പ്രാബല്യത്തിൽ; വിജ്ഞാപനം പുറത്തിറക്കി ന്യൂനപക്ഷ മന്ത്രാലയം

ന്യൂഡൽഹി: വഖഫ് നിയമം ഇന്ന് മുതൽ പ്രാബല്യത്തിൽ വരുത്തുന്നതിന് ന്യൂനപക്ഷകാര്യ മന്ത്രാലയം ഇന്ന് വിജ്ഞാപനം പുറപ്പെടുവിപ്പിച്ചു.
നിയമത്തിന്റെ സെക്ഷൻ ( 12 ) പ്രകാരം പുറപ്പെടുവിപ്പിച്ച വിജ്ഞാപനം അനുസരിച്ച് നിയമത്തിലെ വ്യവസ്ഥകൾ പ്രാബല്യത്തിൽ വരുന്ന തീയതിയായി ഏപ്രിൽ 8 ആണ് നിശ്ചയിച്ചിരിക്കുന്നത്. ഏപ്രിൽ നാലിന് പാർലമെന്റ് പാസാക്കിയ നിയമത്തിന് ഏപ്രിൽ 5 ന് രാഷ്ട്രപതിയുടെ അംഗീകാരം ലഭിച്ചു. അതേ സമയം നിയമത്തിന്റെ ഭരണ ഘടനാ സാധുത ചോദ്യം ചെയ്ത് നിരവധി ഹർജികളാണ് സുപ്രീംകോടതിയിൽ സമർപ്പിച്ചിരിക്കുന്നത്.

നേരത്തെ ലോക്സഭയിൽ 14 മണിക്കൂറോളം നീണ്ട ചർച്ചക്കൊടുവിൽ വോട്ടെടുപ്പിലൂടെയാണ് ബിൽ പാസ്സാക്കിയത്. 288 പേർ ബില്ലിനെ അനുകൂലിച്ച് വോട്ട് ചെയ്തപ്പോൾ 232 പേർ എതിർത്തു. ആകെ 520 പേരാണ് വോട്ട് രേഖപ്പെടുത്തിയത്. രാജ്യസഭയിൽ നടന്ന വോട്ടിം​ഗിൽ ബില്ലിനെ 128 പേർ പിന്തുണച്ചപ്പോൾ 95 പേർ എതിർത്തു. പതിമൂന്നര മണിക്കൂർ നീണ്ട ചർച്ചയ്ക്കൊടുവിലാണ് രാജ്യസഭയിൽ ബിൽ പാസായത്. പ്രതിപക്ഷത്തിന്റെ എല്ലാ ഭേദ​ഗതികളും തള്ളിയാണ് ഇരു സഭകളും ബിൽ പാസാക്കിയത്.

അതേ സമയം നിയമത്തിന്റെ ഭരണഘടനാ സാധുത ചോദ്യം ചെയ്ത് പ്രതിപക്ഷ പാർട്ടികൾ സുപ്രീംകോടതിയെ സമീപിച്ചിട്ടുണ്ട്. വഖഫ് നിയമ ഭേദ​ഗതിക്കെതിരായ ഹർജികളിൽ സുപ്രീംകോടതി ഉടൻ വാദം കേൾക്കില്ല. ഏപ്രിൽ 16 ന് വാദം കേൾക്കാനാണ് സുപ്രീംകോടതിയുടെ തീരുമാനം. നിയമം ചോദ്യം ചെയ്ത് 12 ലധികം ഹർജികളാണ് നിലവിൽ സുപ്രീംകോടതിയുടെ മുന്നിൽ‌ ഉള്ളത്.

അതേ സമയം നിയമം സ്റ്റേ ചെയ്യരുതെന്ന് സുപ്രീ കോടതിയിൽ ആവശ്യപ്പെടാൻ കേന്ദ്രം തീരുമാനിച്ചു. കേസിൽ സുപ്രീംകോടതി കേന്ദ്രം തടസ്സ ഹർജി ഫയൽ ചെയ്തു. വഖഫ് ( ഭേദ​ഗതി ) നിയമത്തിന്റെ ഭരണഘടന സാധുത ചോദ്യം ചെയ്യുന്ന ഹർജികളിൽ എന്തെങ്കിലും ഉത്തരവ് പുറപ്പെടുവിപ്പിക്കുന്നതിന് മുമ്പ് കേന്ദ്രം ചൊവ്വാഴ്ച സുപ്രീം കോടതിയിൽ കേവിയറ്റ് ഫയൽ ചെയ്തു. ഹർജികളിൽ ഉത്തരവ് പുറപ്പെടുവിപ്പിക്കുന്നതിന് മുമ്പ് വാദം കേൾക്കണമെന്ന് ആവശ്യപ്പെട്ടു.

ബിൽ മതപരമായ സ്വയംഭരണത്തെ ദുർബലപ്പെടുത്തുന്നുവെന്നും വഖഫ് സ്വത്തുക്കൾക്ക് ഏകപക്ഷീയമായ നിയന്ത്രണങ്ങൾ ഏർപ്പെടുത്തുന്നുവെന്നും ആരോപിച്ച് കോൺ​ഗ്രസ് എം പി മുഹമ്മദ് ജാവേദും എഐഎംഐഎം പ്രസിഡൻ്റ് ഒവൈസിയും ഹർജി സമർപ്പിച്ചു. വഖഫ് ( ഭേദ​ഗതി ) ബിൽ 2025 ചോദ്യം ചെയ്ത് ആം ആദ്മി പാർട്ടി എം എൽ എ അമാനത്തുള്ള ഖാനും സുപ്രീം കോടതിയെ സമീപിച്ചു.