നന്ദിഗ്രാമില്‍ വച്ച് മമത ബാനര്‍ജിക്ക് നേരെ ആക്രമണം; കാലിന് പരിക്കേറ്റെന്ന് റിപ്പോർട്ട്, പരാതി നൽകും

കൊല്‍ക്കത്ത: നന്ദിഗ്രാമില്‍ വച്ച് തനിക്ക് നേരെ ആക്രമണമുണ്ടായെന്ന് പശ്ചിമബംഗാള്‍ മുഖ്യമന്ത്രിയും തൃണമൂല്‍ കോണ്‍ഗ്രസ് മേധാവിയുമായ മമത ബാനര്‍ജി ആരോപിച്ചു. ആക്രമണത്തില്‍ കാലിന് പരിക്കേറ്റെന്ന റിപ്പോര്‍ട്ടുകളും പുറത്തുവരുന്നുണ്ട്.നന്ദിഗ്രാമില്‍ എത്തിയ മമതയെ മൂന്ന് നാല് പേര്‍ ചേര്‍ന്ന് തള്ളിയിടുകയായിരുന്നെന്നാണ് റിപ്പോര്‍ട്ട്.

ആക്രമണവുമായി ബന്ധപ്പെട്ട് തിരഞ്ഞെടുപ്പ് കമ്മിഷന് പരാതി നല്‍കുമെന്ന് മമത ബാനര്‍ജി അറിയിച്ചു. ഈ തിരഞ്ഞെടുപ്പില്‍ മത്സരിക്കുമെന്ന് നന്ദിഗ്രാമില്‍ വച്ച് കഴിഞ്ഞ ദിവസങ്ങളില്‍ മമത ബാനര്‍ജി അറിയിച്ചിരുന്നു. തുടര്‍ന്ന് നാമനിര്‍ദ്ദേശ പത്രിക സമര്‍പ്പിക്കുന്നതിന് വേണ്ടിയാണ് മമത നന്ദിഗ്രാമില്‍ എത്തിയത്. കാറിലേക്ക് കയറുന്നതിനിടെ ഒരു സംഘം തന്നെ ആക്രമിക്കുകയായിരുന്നെന്നാണ് മമത പറയുന്നത്. ഇത് ആസൂത്രണം ചെയ്ത ആക്രമണം ആണോ എന്ന മാധ്യമപ്രവര്‍ത്തകരുടെ ചോദ്യത്തിന്, അതെയെന്നും ഒരു സംഘത്തിന്റെ ഗൂഡാലോചനയാണിതെന്നും മമത കൂട്ടിച്ചേര്‍ത്തു.

#WATCH West Bengal CM Mamata Banerjee shifted to the back seat of her vehicle after she claimed she was pushed by a few people and suffered a leg injury in Nandigram pic.twitter.com/49wTQ5ye5S

— ANI (@ANI) March 10, 2021

ബംഗാളിലെ തിരഞ്ഞെടുപ്പില്‍ ഏറ്റവും ശ്രദ്ധേയമായ മണ്ഡലങ്ങളില്‍ ഒന്നാണ് നന്ദിഗ്രാം. മമതയുടെ അടുത്ത അനുയായിലും മുന്‍ മന്ത്രിയുമായിരുന്ന സുവേന്ദു അധികാരിയെയാണ് മമത നന്ദിഗ്രാമില്‍ നേരിടുന്നത്. മമത ഭവാനിപൂരില്‍ മാത്രമായിരുന്നു നേരത്തെ മത്സരിച്ചിരുന്നത്. എന്നാല്‍ ഇപ്പോള്‍ നന്ദിഗ്രാമില്‍ എത്തി സുവേന്ദുവിനെ നേരിടുകയാണ്.

English summary

West Bengal Chief Minister Mamata Banerjee Says, She was attacked in Nandigram