ബംഗാള് മന്ത്രിസഭ പിരിച്ചുവിട്ട് ഗവര്ണര്; മമത ഇനി മുഖ്യമന്ത്രിയല്ല, ചട്ടം പറയുന്നതിങ്ങനെ
കൊല്ക്കത്ത: നിയമസഭാ തിരഞ്ഞെടുപ്പിന് പിന്നാലെ അശാന്തമായ ബംഗാളില് മന്ത്രിസഭ പിരിച്ചുവിട്ട് ഗവര്ണര് ആര് എന് രവി. ബംഗാള് സര്ക്കാരിന്റെ കാലാവധി ഇന്നലെ അവസാനിച്ചു എന്നും അതിനാലാണ് മന്ത്രിസഭ പിരിച്ചുവിട്ടത് എന്നും ഗവര്ണര് വ്യക്തമാക്കി. തിരഞ്ഞെടുപ്പില് സംസ്ഥാനത്ത് തൃണമൂല് കോണ്ഗ്രസിന് ഭരണം നഷ്ടമായിരുന്നു. 200 ലേറെ സീറ്റ് നേടി ബിജെപിയാണ് സംസ്ഥാനത്ത് അധികാരത്തിലെത്തിയത്.
മമത ബാനര്ജി സ്വന്തം മണ്ഡലത്തില് തോല്ക്കുകയും ചെയ്തിരുന്നു. എന്നാല് തിരഞ്ഞെടുപ്പ് ക്രമക്കേട് ആരോപിച്ച് മമത മുഖ്യമന്ത്രി സ്ഥാനം രാജി വെക്കില്ല എന്ന് പറഞ്ഞിരുന്നു. ഇതിന് പിന്നാലെ സംസ്ഥാനത്തുടനീളം ബിജെപി -തൃണമൂല് സംഘര്ഷം അരങ്ങേറുകയാണ്. ഇതിനിടെയാണ് ഗവര്ണര് നിയമസഭ പിരിച്ചുവിട്ടിരിക്കുന്നത്. ഇതോടെ മമതയുടെ മുഖ്യമന്ത്രി സ്ഥാനം എല്ലാ അര്ത്ഥത്തിലും നഷ്ടമായി.
ഇന്ത്യന് ഭരണഘടനയുടെ ആര്ട്ടിക്കിള് 174 (2)(b) പ്രകാരം ഗവര്ണര് തനിക്ക് നല്കിയിട്ടുള്ള ഭരണഘടനാപരമായ അധികാരങ്ങള് ഉപയോഗിച്ചു. '2026 മെയ് 7 മുതല് പ്രാബല്യത്തില് വരുന്ന രീതിയില് പശ്ചിമ ബംഗാള് നിയമസഭ ഞാന് ഇതിനാല് പിരിച്ചുവിടുന്നു,' ആര് എന് രവി ഔദ്യോഗിക നോട്ടീസില് പറഞ്ഞു. 71 കാരിയായ മമത ബാനര്ജി 15 വര്ഷമായി ബംഗാള് മുഖ്യമന്ത്രിയായിരുന്നു.
37 വര്ഷത്തെ ഇടത് ഭരണം അവസാനിപ്പിച്ച് 2011 ല് ആണ് മമത മുഖ്യമന്ത്രിയാകുന്നത്. അതിന് ശേഷം എല്ലാ തിരഞ്ഞെടുപ്പിലും വിജയിച്ച് അധികാരം പിടിച്ചു. എന്നാല് ഇത്തവണ വലിയ പരാജയമാണ് സംസ്ഥാനത്ത് തൃണമൂല് കോണ്ഗ്രസ് നേരിട്ടത്. അതേസമയം തോല്വി സമ്മതിക്കാന് മമത തയ്യാറായില്ല. സംസ്ഥാനത്ത് ബിജെപിയുടെ നിര്ണായകമായ പ്രകടനം വോട്ടുകള് കൊള്ളയടിച്ചതിന്റെയും ഇവിഎം കൃത്രിമത്വത്തിന്റെയും ഫലമാണെന്ന് അവര് ആരോപിച്ചു.
തന്നെ താഴെയിറക്കാന് തിരഞ്ഞെടുപ്പ് കമ്മീഷന് ബിജെപിയുമായി ഒത്തുകളിച്ചുവെന്നും അവര് അവകാശപ്പെട്ടിരുന്നു. അതേസമയം ബംഗാള് സര്ക്കാരിന്റെ കാലാവധി ഇന്നലെ അവസാനിച്ചു എന്നും പുതിയ മുഖ്യമന്ത്രി സത്യപ്രതിജ്ഞ ചെയ്യുന്നതുവരെ ഗവര്ണര് സംസ്ഥാനത്തിന്റെ താല്ക്കാലിക ചുമതല വഹിക്കണമെന്നതാണ് ചട്ടം എന്നും മുന് കേന്ദ്ര സര്ക്കാര് സെക്രട്ടറി ജവഹര് സിര്ക്കാര് പറഞ്ഞു.
വോട്ടെടുപ്പ് ഫലങ്ങള് പ്രഖ്യാപിച്ചതിനുശേഷം സംസ്ഥാനം നാടകീയതകളും വിവാദങ്ങളും കൊണ്ട് നിറഞ്ഞിരുന്നു. വോട്ടെണ്ണലിന്റെ തുടക്കം മുതല് തങ്ങളുടെ സ്ഥാനാര്ത്ഥികള് മുന്നിട്ടുനിന്ന സംസ്ഥാനത്തുടനീളമുള്ള 100 സീറ്റുകളില് വോട്ടുകള് കൊള്ളയടിക്കപ്പെട്ടുവെന്ന് തൃണമൂല് കോണ്ഗ്രസ് അവകാശപ്പെട്ടു. സമാധാനപരമായ പോളിംഗ് ഉറപ്പാക്കാന് സംസ്ഥാനത്ത് നൂറുകണക്കിന് കേന്ദ്ര സേനയെ വിന്യസിച്ചു.
എന്നിരുന്നാലും, സംസ്ഥാനത്തെ പല പ്രദേശങ്ങളിലും വോട്ടെടുപ്പിന് ശേഷമുള്ള അക്രമങ്ങള് പൊട്ടിപ്പുറപ്പെട്ടു. മധ്യഗ്രാമില് വെടിയേറ്റ് മരിച്ച ബിജെപി മുഖ്യമന്ത്രി സുവേന്ദു അധികാരിയുടെ സഹായി ചന്ദ്രനാഥ് രഥ് ഉള്പ്പെടെ ഇതുവരെ അഞ്ചിലധികം പേര് കൊല്ലപ്പെട്ടു. അതേസമയം ബിജെപി ഇതുവരെ മുഖ്യമന്ത്രിയെ പ്രഖ്യാപിച്ചിട്ടില്ല. നിയമസഭാ കക്ഷി നേതാവിനെ തിരഞ്ഞെടുക്കുന്നതിനായി നാളെ ഉച്ചയ്ക്ക് 2 മണിക്ക് ബിജെപി എംഎല്എമാരുടെ യോഗം ചേരും.
Click it and Unblock the Notifications
Sign in with Google