രൂപ ഗാംഗുലി ശരിക്കും ദ്രൗപദി.. വലിക്കുന്ന സിഗരറ്റിന്റെ നീളം വരെ അറിയാം.. ഈ മൊല്ല പറയുന്നതെന്ത്?
കൊല്ക്കത്ത: ബി ജെ പി നേതാവ് രൂപ ഗാംഗുലി ജീവിതത്തിലും ഒരു ദ്രൗപദിയാണെന്ന് മുന് മന്ത്രിയും തൃണമൂല് കോണ്ഗ്രസ് സ്ഥാനാര്ഥിയുമായ അബ്ദുള് റസാഖ് മൊല്ല. മഹാഭാരതം സീരിയലില് ദ്രൗപദിയുടെ വേഷമിട്ട രൂപ ഗാംഗുലി അടുത്തിടെയാണ് ബി ജെ പിയില് ചേര്ന്നത്. ഹൗറാ നോര്ത്തില് നിന്നുമാണ് ഇത്തവണ രൂപ ഗാംഗുലി ജനവിധി തേടുന്നത്. ബംഗാളില് ബി ജെ പിയുടെ സെലിബ്രിറ്റി സ്ഥാനാര്ഥികളില് ഒരാളാണ് 49 കാരിയായ ഗാംഗുലി.
രൂപ ഗാംഗുലി ജീവിതത്തിലും ഒരു ദ്രൗപദിയാണ് എന്നാണ് അബ്ദുള് റസാഖ് മൊല്ല പറഞ്ഞത്. ഇവര് ആരുടെ കൂടെയാണ് താമസിക്കുന്നത് എന്ന് തനിക്കറിയാം. എത്ര നീളമുള്ള സിഗരറ്റാണ് ഇവര് വലിക്കുന്നത് എന്ന് വരെ അറിയാം - ഇടതുപക്ഷം ഭരിക്കുന്ന കാലത്ത് ബംഗാളിലെ മന്ത്രിയായിരുന്ന മൊല്ല പറഞ്ഞു. ഇടതുപക്ഷത്തെ വിട്ട് അടുത്തിടെയാണ് ഇയാള് തൃണമൂല് കോണ്ഗ്രസില് ചേര്ന്നത്. ബംഗാറില് നിന്നാണ് ഇയാള് ഇത്തവണ മത്സരിക്കുന്നത്.
ബംഗാളി ന്യൂസ് ചാനലായ എ ബി പി ആനന്ദയ്ക്ക് നല്കിയ അഭിമുഖത്തില് സ്വന്തം പാര്ട്ടിയുടെ സ്ഥാനാര്ഥികളെയും ഇയാള് വെറുതെ വിടുന്നില്ല. തൃണമൂല് സ്ഥാനാര്ഥിയും എം പിയുമായ മൂണ് മൂണ് സിംഗിനെക്കൊണ്ട് ജനങ്ങള്ക്ക് ഒരു ഉപകാരവും ഇല്ല എന്നാണ് ഇയാള് പറയുന്നത്. രൂപ ഗാംഗുലിക്കെതിരായ മൊല്ലയുടെ വാക്കുകള്ക്കെതിരെ നിയമനടപടി സ്വീകരിക്കാനാണ് ബി ജെ പിയുടെ തീരുമാനം.