നിയമന അഴിമതി; മമത സർക്കാരിന് തിരിച്ചടി; 25000ൽ അധികം അധ്യാപകരുടെ നിയമനം റദ്ദാക്കി സുപ്രീംകോടതി

ന്യൂഡൽ​ഹി: ബം​ഗാളിലെ 25000ൽ അധികം അധ്യാപകരുടെയും അനധ്യാപകരുടെയും നിയമനം റദ്ദ് ചെയ്ത് സുപ്രീംകോടതി. സ്കൂൾ ജോലികളുമായി ബന്ധപ്പെട്ട് 2026 ൽ പശ്ചിമ ബം​ഗാൾ സ്കൂൾ സർവീസ് കമ്മീഷൻ നടത്തിയ 25,753 അധ്യാപക - അനധ്യാപക ജീവനക്കാരുടെ നിയമനങ്ങൾ‌ റദ്ദാക്കിയ ഹൈക്കോടതി ഉത്തരവ് സുപ്രീകോടതി ശരിവെച്ചു. മമത ബാനർജി സർക്കാരിന് കനത്ത തിരിച്ചടിയാണ് കോടതി വിധി.

മൂന്ന് മാസത്തിനകം പുതിയ നിയമന നടപടികൾ പൂർത്തിയാക്കണമെന്നും കോടതി ഉത്തരവിട്ടു. നിയമനങ്ങൾ ക‍ൃത്രിമവും വഞ്ചനയും മൂലമാണെന്ന് ചൂണ്ടിക്കാട്ടി ഹൈക്കോടതി വിധിയിൽ ഇടപെടാൻ‌ വിസമ്മതിച്ചു.

പശ്ചിമ ബം​ഗാൾ സർക്കാർ സ്പോൺസേഡ്, എയ്ഡഡ് സ്കൂളുകളിലെ 2016 ലെ മുഴുവൻ അധ്യാപക നിയമനങ്ങളും കൊൽക്കത്ത ഹൈക്കോടതി റദ്ദാക്കിയിരുന്നു. 2016 ലെ മുഴുവൻ അധ്യാപക നിയമനങ്ങളും ആണ് കൊൽക്കത്ത ഹൈക്കോടതി റദ്ദാക്കിയത്. കോടതി നടപടി മമത സർക്കാരിനെ പ്രതിസന്ധിയിലാക്കുകയും ചെയ്തിരുന്നു.

2016 ൽ നിയമിതരായ 25,753 ഓളം അ​ധ്യാപകർക്കാണ് കോടതി വിധിയെ തുടർന്ന് ജോലി നഷ്ടമാവുക. ശൂന്യമായ ഒ എം ആർ ഷീറ്റുകൾ‌ സമർപ്പിച്ച് നിയമവിരുദ്ധമായി ഇവർ നിയമിക്കപ്പെട്ടു എന്നാണ് ആരോപണം,

അധ്യാപക നിയമന കേസിൽ മുൻ വിദ്യാഭ്യാസമന്ത്രി പാർഥ ചാറ്റർജി ഉൾപ്പെടെ നിരവധി തൃണമൂൽ നേതാക്കളും മുൻ ഉദ്യോ​ഗസ്ഥരും ജയിലിലാണ്. ബി ജെ പി നേതാക്കൾ ജുഡീഷ്യറിയേയും വിധി ന്യായങ്ങളെയും സ്വാധീനിച്ചാണ് കോടതി വിധി സമ്പാദിച്ചത് എന്നായിരുന്നു ഹൈക്കോടതി ഉത്തരവ് പുറത്ത് വന്നപ്പോൾ മുഖ്യമന്ത്രി മമതാ ബാനർജി പറഞ്ഞത്.

അതേ സമയം സുപ്രീംകോടതി വിധി അം​ഗീകരിക്കില്ലെന്നാണ് വിധിയിൽ പ്രതിഷേധിച്ചുള്ള മമത ബാനർജി പറഞ്ഞത്. നിയമന നടപടികൾ ആവർത്തിക്കുമെന്നും പശ്ചിമബം​ഗാൾ മുഖ്യമന്ത്രി പറഞ്ഞു. ബം​ഗാളിലെ വിദ്യാഭ്യാസമേഖല തന്നെ തകർക്കാനാണ് ബി ജെ പിയും സി പി എമ്മും ശ്രമിക്കുന്നതെന്ന ആരോപണവും മമത ഉന്നയിച്ചു. നിയമന കുംഭകോണത്തിൽ മമതക്കും തൃണമൂൽ സർക്കാരിനും അല്ലാതെ മറ്റാർക്കും ഉത്തരവാദിത്തമില്ലെന്നും അഴിമതിയുണ്ടാക്കിയ പ്രതിസന്ധിയാണിതെന്നും പശ്ചിമബം​ഗാളിലെ പ്രതിപക്ഷനേതാവ് സുവേന്ദു അധികാരി കുറ്റപ്പെടുത്തി