‌എന്താണ് ബ്ലാക് ബോക്സ്; ഗുജറാത്ത് വിമാന അപകടത്തിൽ എന്തുകൊണ്ടാണ് ഇവ നിർണായകമാകുന്നത്?

ഗുജറാത്തിൽ എയർ ഇന്ത്യ വിമാനം തകർന്ന് വീണുണ്ടായ അപകടത്തിൽ 160 ലേറെ പേർ കൊല്ലപ്പെട്ടാണ് പ്രാഥമിക വിവരം. അഹമ്മദാബാദിൽ നിന്നും ലണ്ടനിലേക്ക് പുറപ്പെട്ട എയർ ഇന്ത്യയുടെ ബോയിംഗ് 787-8 ഡ്രീംലൈനർ വിമാനമാണ് (രജിസ്ട്രേഷൻ നമ്പർ VT-ANB) അപകടത്തില്‍പ്പെട്ടത്. 230 യാത്രക്കാരും 12 ജീവനക്കാരുമായിരുന്നു (2 പൈലറ്റുമാർ, 10 ക്യാബിൻ ക്രൂ) വിമാനത്തിലുണ്ടായിരുന്നത്.

ടേക്ക് ഓഫിന് പിന്നാലെ മിനിറ്റുകൾക്കുള്ളിലാണ് വിമാനം തകർന്നത്. വിമാനത്താവളത്തിന് സമീപമുള്ള ബിജെ മെഡിക്കൽ കോളേജിന്റെ ഹോസ്റ്റലിലേക്കാണ് വിമാനം ഇടിച്ച് കയറിയത്. അതേസമയം അപകട കാരണം എന്താണെന്ന് ഇതുവരേയും വ്യക്തമല്ല. പരിചയ സമ്പന്നരായ പൈലറ്റുമാരാണ് വിമാനം പറത്തിയതെന്നാണ് എയർ ഇന്ത്യ വാർത്ത കുറിപ്പിൽ അറിയിച്ചത്. അപകടത്തിൽ ഡി ജി സി എ അന്വേഷണം പ്രഖ്യാപിച്ചിട്ടുണ്ട്. അന്വേഷണത്തിൽ ഏറ്റവും നിർണായകമാകുക വിമാനത്തിന്റെ ബ്ലാക് ബോക്സ് ആണ്. എന്താണ് ബ്ലാക് ബോക്സ് എങ്ങനെയാണ് ഇത് അന്വേഷണത്തെ സഹായിക്കുക തുടങ്ങിയ വിവരങ്ങൾ പരിശോധിക്കാം.

എന്താണ് ബ്ലാക് ബോക്സ്

വിമാനങ്ങളിൽ ഉപയോഗിക്കുന്ന ഇലക്ട്രോണിക് റെക്കോർഡിംഗ് ഉപകരണമാണ് ബ്ലാക്ക് ബോക്സ്. വിമാനാപകടങ്ങളുടെ കാരണങ്ങൾ കണ്ടെത്തുന്നതിന് അന്വേഷണ സംഘങ്ങൾക്ക് നിർണായകമായ വിവരങ്ങൾ നൽകാൻ ഇവ സഹായിക്കും.

ബ്ലാക് ബോക്സ് എന്നാണ് പേരെങ്കിലും ഇവയുടെ നിറം ഓറഞ്ചാണ്. അപകടസ്ഥലത്ത് എളുപ്പത്തിൽ കണ്ടെത്താൻ വേണ്ടി സ്റ്റീൽ അല്ലെങ്കിൽ ടൈറ്റാനിയം കൊണ്ട് നിർമ്മിച്ച, ശക്തമായ ലോഹ കവചമാണ് ഇവയ്ക്കുണ്ടായകുക. തീ, വെള്ളം എന്നിവയിൽ നിന്നും പ്രതിരോധിക്കാനാണിത്. കാരണം അപകടസമയത്ത് പിൻ ഭാഗത്ത് ആഘാതം കുറവായിരിക്കും എന്നതിനാൽ ഇവിടയാണ് ബ്ലാക് ബോക്സുകൾ സൂക്ഷിക്കുക.

എഫ് ഡി ആറും സി വി ആറും

ബ്ലാക്ക് ബോക്സ് എന്നത് രണ്ട് പ്രധാന ഉപകരണങ്ങൾ ഉൾക്കൊള്ളുന്നതാണ്.

1. ഫ്ലൈറ്റ് ഡാറ്റ റെക്കോർഡർ (FDR)

2. കോക്പിറ്റ് വോയിസ് റെക്കോർഡർ (CVR)

ഫ്ലൈറ്റ് ഡാറ്റ റെക്കോർഡർ (FDR) - വിമാനത്തിന്റെ സാങ്കേതിക വിവരങ്ങൾ, ഉയരം, വേഗത, ദിശ, എഞ്ചിൻ പ്രവർത്തനം, നിയന്ത്രണ ഉപകരണങ്ങളുടെ സ്ഥാനം തുടങ്ങിയ 80-ലധികം ഡാറ്റ പോയിന്റുകൾ റെക്കോർഡ് ചെയ്യുന്നതാണ് ഇത്.

കോക്പിറ്റ് വോയിസ് റെക്കോർഡർ (CVR)- പൈലറ്റുമാരുടെ സംഭാഷണങ്ങൾ, റേഡിയോ ആശയവിനിമയങ്ങൾ, മുന്നറിയിപ്പ് ശബ്ദങ്ങൾ, എഞ്ചിൻ ശബ്ദങ്ങൾ തുടങ്ങിയ കോക്പിറ്റിലെ ശബ്ദങ്ങൾ റെക്കോഡ് ചെയ്യുന്ന ഉപകരമാണിത്.

ബ്ലാക് ബോക്സിലൂടെ എന്തൊക്കെ കണ്ടെത്താം

മെക്കാനിക്കൽ തകരാർ, പൈലറ്റിന്റെ പിഴവ്, കാലാവസ്ഥാ പ്രശ്നങ്ങൾ, അല്ലെങ്കിൽ മറ്റ് ബാഹ്യ ഘടകങ്ങൾ (ഉദാ: പക്ഷി ആഘാതം) എന്നിവയാണോ അപകടത്തിന്റെ കാരണമന്ന് ബ്ലാക് ബോക്സ് പരിശോധിക്കുന്നതിലൂടെ കണ്ടെത്താൻ സാധിക്കും.

നിയമപരമായ സഹായങ്ങൾ ഉറപ്പാക്കാൻ

ബ്ലാക്ക് ബോക്സ് ഡാറ്റ എയർലൈനിന്റെ അശ്രദ്ധ തെളിയിക്കാൻ ഉപയോഗിക്കാം, ഇത് ബാധിത കുടുംബങ്ങൾക്ക് നഷ്ടപരിഹാരം തേടാൻ സഹായിക്കും

മുൻകാല ഉദാഹരണങ്ങൾ ഇങ്ങനെ

2009-ലെ എയർ ഫ്രാൻസ് ഫ്ലൈറ്റ് 447 അപകടത്തിൽ, 10,000 അടിയിലധികം ആഴത്തിൽ നിന്ന് കണ്ടെടുത്ത ബ്ലാക്ക് ബോക്സ്, വേഗത സെൻസറുകളുടെ പരാജയവും പൈലറ്റിന്റെ പ്രതികരണവും അപകടത്തിന് കാരണമായതായി കണ്ടെത്തിയിരുന്നു.

2015-ലെ ജർമൻവിംഗ്സ് ക്രാഷിലും മലേഷ്യ എയർലൈൻസ് MH370, MH17 സംഭവങ്ങളിലും ബ്ലാക്ക് ബോക്സ് ഡാറ്റ നിർണായകമായിരുന്നു.

ഡിജിസിഎയുടെ നടപടിയെന്താകും?

ബ്ലാക്ക് ബോക്സ് ഡാറ്റ ഡയറക്ടറേറ്റ് ജനറൽ ഓഫ് സിവിൽ ഏവിയേഷൻ (DGCA) അല്ലെങ്കിൽ എയർക്രാഫ്റ്റ് ആക്സിഡന്റ് ഇൻവെസ്റ്റിഗേഷൻ ബ്യൂറോ (AAIB) ഫോറൻസിക് ലാബിലേക്ക് അയക്കും.

ഡാറ്റ വിശകലനത്തിന് ദിവസങ്ങളെടുത്തേക്കും. ബ്ലാക്ക് ബോക്സിന് സംഭവിച്ച കേടുപാടുകൾ കൂടി ആശ്രയിച്ചായിരിക്കും ഇത്.