സുപ്രീം കോടതി ജഡ്ജിമാരെത്തി... മോദി ഇനിയെന്ന് മണിപ്പൂരിലെത്തും? കോണ്ഗ്രസ്
ന്യൂഡല്ഹി: പ്രധാനമന്ത്രി നരേന്ദ്ര മോദി എന്തുകൊണ്ടാണ് കലാപ ബാധിതമായ മണിപ്പൂര് സന്ദര്ശിക്കാത്തത് എന്ന് കോണ്ഗ്രസ്. മണിപ്പൂരിലേക്കുള്ള സുപ്രീം കോടതി ജഡ്ജിമാരുടെ ഒരു സംഘത്തിന്റെ സന്ദര്ശനത്തെ സ്വാഗതം ചെയ്ത് കൊണ്ടായിരുന്നു അദ്ദേഹത്തിന്റെ പ്രതികരണം. മണിപ്പൂര് സന്ദര്ശിക്കാന് പോയ ആറ് ജഡ്ജിമാരെ കോണ്ഗ്രസ് പാര്ട്ടി സ്വാഗതം ചെയ്യുന്നുവെന്ന് അദ്ദേഹം പറഞ്ഞു.
കഴിഞ്ഞ 22 മാസത്തിനിടെ മണിപ്പൂരില് നൂറുകണക്കിന് ആളുകള് മരിച്ചുവെന്നും ഏകദേശം 60,000 പേര് കുടിയിറക്കപ്പെട്ടുവെന്നും ഷെല്ട്ടര് ഹോമുകളിലും ദുരിതാശ്വാസ ക്യാമ്പുകളിലും കഴിയുന്നുണ്ടെന്നും അദ്ദേഹം ചൂണ്ടിക്കാട്ടി. ഫെബ്രുവരി 13 നാണ് സംസ്ഥാനത്ത് രാഷ്ട്രപതി ഭരണം ഏര്പ്പെടുത്തിയത്. എന്നാല് 2023 ഓഗസ്റ്റ് 1 ന് സുപ്രീം കോടതി തന്നെ മണിപ്പൂരിലെ ഭരണഘടനാ സംവിധാനം പൂര്ണ്ണമായും തകര്ന്നുവെന്ന് പറഞ്ഞിരുന്നു.
അതിനുശേഷവും, രാഷ്ട്രപതി ഭരണം ഏര്പ്പെടുത്താന് 18 മാസമെടുത്തത് എന്തുകൊണ്ടാണ് എന്നും സുപ്രീം കോടതി ജഡ്ജിമാര് പോയത് നല്ലതാണെങ്കിലും ഏറ്റവും വലിയ ചോദ്യം പ്രധാനമന്ത്രി എപ്പോള് സന്ദര്ശിക്കുമെന്നതാണ് എന്നും ജയ്റാം രമേശ് ചൂണ്ടിക്കാട്ടി. ജസ്റ്റിസുമാരായ ബി ആര് ഗവായ്, സൂര്യകാന്ത്, വിക്രം നാഥ്, എം എം സുന്ദരേഷ്, കെ വി വിശ്വനാഥന്, എന് കോടീശ്വര് എന്നിവരുള്പ്പെടെ സുപ്രീം കോടതി ജഡ്ജിമാരുടെ ഒരു സംഘം ഇന്ന് മണിപ്പൂരിലെ ചുരാചന്ദ്പൂരിലെ ഒരു ദുരിതാശ്വാസ ക്യാമ്പ് സന്ദര്ശിച്ചിരുന്നു.
ഈ പശ്ചാത്തലത്തിലാണ് അദ്ദേഹത്തിന്റെ പ്രതികരണം. പാര്ലമെന്റില് തന്റെ മന്ത്രാലയത്തിന്റെ പ്രവര്ത്തനങ്ങളെക്കുറിച്ചുള്ള ചര്ച്ചകളില് മണിപ്പൂരിലെ സ്ഥിതിയെക്കുറിച്ച് സംസാരിക്കാത്തതിന് ആഭ്യന്തരമന്ത്രി അമിത് ഷായെയും അദ്ദേഹം വിമര്ശിച്ചു. 'ഇന്നലെ, ആഭ്യന്തരമന്ത്രി രാജ്യസഭയില് തന്റെ മന്ത്രാലയത്തിന്റെ പ്രവര്ത്തനങ്ങളെക്കുറിച്ച് ഏകദേശം നാല് മണിക്കൂര് മറുപടി നല്കി.
പക്ഷേ മണിപ്പൂരിനെക്കുറിച്ച് അദ്ദേഹം കൂടുതലൊന്നും പറഞ്ഞില്ല. 2022 ഫെബ്രുവരിയില്, എന്ഡിഎ വന് ഭൂരിപക്ഷത്തോടെ തിരഞ്ഞെടുപ്പില് വിജയിച്ചു, പക്ഷേ 15 മാസത്തിനുള്ളില് മണിപ്പൂര് കത്താന് തുടങ്ങി. അതിന് ഉത്തരമില്ല. പ്രധാനമന്ത്രി എന്തുകൊണ്ട് പോയില്ല എന്നതിന് ഉത്തരമില്ല,' അദ്ദേഹം കൂട്ടിച്ചേര്ത്തു. സംസ്ഥാനത്ത് രാഷ്ട്രപതി ഭരണം ഏര്പ്പെടുത്തുന്നതിലെ കാലതാമസത്തെയും അദ്ദേഹം ചോദ്യം ചെയ്തു.
അമിത് ഷാ മണിപ്പൂര് സന്ദര്ശിക്കാതെ മിസോറാം സന്ദര്ശിച്ചതിനെയും അദ്ദേഹം വിമര്ശിച്ചു. ആഭ്യന്തരമന്ത്രി മിസോറാമിലേക്ക് പോകുന്നു, എന്തുകൊണ്ട് അദ്ദേഹം മണിപ്പൂരിലേക്ക് പോയില്ല. അമേരിക്കയിലേക്ക് പോയതിനുശേഷം മിസോറാം മുഖ്യമന്ത്രി പറഞ്ഞ കാര്യങ്ങള് നിരവധി ചോദ്യങ്ങള് ഉയര്ത്തുന്നതാണ് എന്നും ജയ്റാം രമേശ് എഎന്ഐയോട് പറഞ്ഞു. ബാങ്കോക്കിലേക്ക് പോകുന്നതിനു മുമ്പോ തിരിച്ചെത്തിയിട്ടോ പ്രധാനമന്ത്രി മണിപ്പൂര് സന്ദര്ശിക്കണമെന്നും അദ്ദേഹം ആവശ്യപ്പെട്ടു.
Click it and Unblock the Notifications
Sign in with Google