ജയലളിതയുടെ മന്ത്രിസഭയിൽ മന്ത്രി, പിന്നീട് ബിജെപിയിലേക്ക്,ഒടുവിൽ തലപ്പത്ത്; ആരാണ് നൈനാർ നാ​ഗേന്ദ്രൻ?

ചെന്നൈ: തമിഴ്നാട് ബി ജെ പിയെ ഇനി നൈനാർ നാ​ഗേന്ദ്രൻ നയിക്കും. കെ അണ്ണാമലൈയുടെ പിൻ​ഗാമിയായി എ ഐ എ ഡി എം കെയിൽ നിന്ന് കൂറ് മാറിയ നൈനാർ നാ​ഗേന്ദ്രൻ തമിഴ്നാട് ബി ജെ പിയുടെ പതിമൂന്നാമത്തെ പ്രസി‍ഡന്റായി ചുമതലയേൽക്കും. ദ്രാവിഡ രാഷ്ട്രീയ ആധിപത്യം പുലർത്തുന്ന സംസ്ഥാനത്ത് ബി ജെ പിയുടെ മുന്നേറ്റം ലക്ഷ്യമിട്ടുള്ള നീക്കങ്ങൾ ആരംഭിച്ചുകഴിഞ്ഞു. തമിഴ്നാട്ടിൽ ആധിപത്യം ഉറപ്പിക്കാൻ ലക്ഷ്യമിട്ട്, ബി ജെ പിയുടെ ഭാവി തീരുമാനിക്കുന്ന 2026 ൽ നടക്കുന്ന തിരഞ്ഞെടുപ്പിലേക്ക് പാർട്ടിയെ നയിക്കാനുള്ള കഠിനമായ ജോലി നൈനാർ നാ​ഗേന്ദ്രനായിരിക്കും.

ആരാണ് നൈനാർ നാ​ഗേന്ദ്രൻ?

തമിഴ്നാട്ടിലെ ബി ജെ പി നിയമസഭാ കക്ഷി അധ്യക്ഷനാണ് നൈനാർ നാ​ഗേന്ദ്രൻ.2001 മുതൽ 2006 വരെ എ ഐ ഡി എം കെ സർക്കാരിലും മന്ത്രിയായിരുന്നു. 1960 ഒക്ടോബർ 16 ന് വടിവീശ്വരത്ത് ജനിച്ച നാ​ഗേന്ദ്രൻ ജെ ജയലളിതയുടെ നേതൃത്വത്തിലുള്ള എ ഐ എ ഡി എം കെയിൽ തിരുനെൽവേലി നിയോജക മണ്ഡലത്തിൽ നിന്നുള്ള നിയമസഭാം​ഗമായി സേവനമനുഷ്ഠിച്ചുകൊണ്ടാണ് തന്റെ ഔദ്യോ​ഗിക ജീവിതം ആരംഭിച്ചത്. 2001 മുതൽ 2006 വരെ ജയലളിത മുഖ്യമന്ത്രിയായിരുന്നപ്പോൾ അദ്ദേഹം മന്ത്രിയായി, വൈദ്യുതി, വ്യവസായം, ​ഗതാ​ഗതം എന്നീ വകുപ്പുകൾ വഹിച്ചു.

2011 ൽ എ ഐ എ ഡി എം കെ വീണ്ടും അധികാരത്തിൽ വന്നപ്പോൾ നാ​ഗേന്ദ്രനെ മന്ത്രി സഭയിൽ നിന്ന് ഒഴിവാക്കി. 2017 ൽ ബി ജെ പിയിൽ ചേരാൻ പാർട്ടി വിട്ടു. നൈനാർ നാ​ഗേന്ദ്രൻ 2020 മുതൽ തമിഴ്നാട് ബി ജെ പിയുടെ വൈസ് പ്രസിഡന്റ് ആയിരുന്നു. 2021 ലെ നിയമസഭാ തിര‍ഞ്ഞെടുപ്പിൽ‌ തിരുനെൽവേലി മണ്ഡലത്തിൽ നിന്ന് പാർ‌ട്ടി ടിക്കറ്റിൽ വിജയിക്കുകയും ചെയ്തു.

നൈനാൻ നാ​ഗേന്ദ്രൻ വിവാദങ്ങൾ പെട്ടിട്ടുണ്ട്. 2006 ൽ അദ്ദേഹം മന്ത്രിയായിരിക്കെ വരുമാനത്തേക്കാൾ സ്വത്ത് സമ്പാദിച്ചതായി അന്വേഷണത്തിൽ കണ്ടെത്തിയ 2010 ൽ 3.9 കോടി രൂപയുടെ അനധിക‍ൃത സ്വത്ത് കേസിൽ അഴിമതി നിരോധന നിയമപ്രകാരം അദ്ദേഹത്തിനും ഭാര്യയ്ക്കും മറ്റ് നാല് ബന്ധുക്കൾക്കുമെതിരെ വിജിലൻസ് ഡയറക്ടറേറ്റ് കുറ്റപത്രം സമർപ്പിച്ചതായി ഹിന്ദുസ്ഥാൻ ടൈംസ് റിപ്പോർട്ട് ചെയ്തു.

ആണ്ടാളിനെക്കുറിച്ചുള്ള വിവാ​ദ പരാമർശത്തിന്റെ പേരിൽ 2018 ൽ പ്രശസ്ത തമിഴ്​ഗാനരചയിതാവും എഴുത്തുകാരനുമായ വൈരമുത്തുവിനെതിരെ നൈനാർ നാ​ഗേന്ദ്രൻ വധ ഭീഷണി മുഴക്കി. എഴുത്തുകാരൻ വൈരമുത്തുവിനെ ആരെങ്കിലും കൊന്ന് നാക്ക് മുറിച്ചാൽ 10 കോടി പാരിതോഷികം നൽകാൻ ബി ജെ പി നേതാക്കൾ തയ്യാർ എന്നായിരുന്നു നൈനാർ നാ​ഗേന്ദ്രൻ പറഞ്ഞത്.