അറിയാതെ പോലും ഈ ആപ്പ് ഡൗൺലോഡ് ചെയ്യരുത്..! നിങ്ങളുടെ പണം മൊത്തം നഷ്ടമാകും

രാജ്യത്ത് വ്യാപകമാകുന്ന ഓൺലൈൻ സാമ്പത്തിക തട്ടിപ്പുകൾക്കെതിരെ കർശന നടപടിയുമായി കേന്ദ്ര സർക്കാർ. 'വിംഗോ' (Wingo) എന്ന ആൻഡ്രോയിഡ് ആപ്പ് വഴി ലക്ഷക്കണക്കിന് ആളുകളെ കബളിപ്പിച്ച് കോടികൾ തട്ടിയെടുക്കുന്ന സംഘത്തെ തകർക്കാനായി കേന്ദ്ര ആഭ്യന്തര മന്ത്രാലയത്തിന് കീഴിലുള്ള ഇന്ത്യൻ സൈബർ ക്രൈം കോർഡിനേഷൻ സെന്റർ (I4C) വൻ ഓപ്പറേഷൻ ആരംഭിച്ചു. ഇതിന്റെ ഭാഗമായി തട്ടിപ്പിന് ഉപയോഗിച്ചിരുന്ന ആയിരക്കണക്കിന് ടെലിഗ്രാം ചാനലുകളും ഗ്രൂപ്പുകളും സർക്കാർ ബ്ലോക്ക് ചെയ്തു.

എന്താണ് വിംഗോ ആപ്പ് തട്ടിപ്പ്?
കുറഞ്ഞ നിക്ഷേപത്തിലൂടെ വലിയ ലാഭം വാഗ്ദാനം ചെയ്യുന്ന ഒരു 'കളർ പ്രെഡിക്ഷൻ' (Color Prediction) ഗെയിമായാണ് വിംഗോ പ്രചരിക്കുന്നത്. ഗൂഗിൾ പ്ലേ സ്റ്റോറിലില്ലാത്ത ഈ ആപ്പ് വിവിധ സോഷ്യൽ മീഡിയ ലിങ്കുകൾ വഴിയും ടെലിഗ്രാം ചാനലുകൾ വഴിയുമാണ് പ്രചരിപ്പിക്കുന്നത്. ചുവപ്പ്, പച്ച തുടങ്ങിയ നിറങ്ങൾ തിരഞ്ഞെടുക്കുന്നതിലൂടെ പണം ഇരട്ടിയാക്കാം എന്ന് വിശ്വസിപ്പിച്ച് ആളുകളെ കൊണ്ട് വൻതുകകൾ നിക്ഷേപിപ്പിക്കും. തുടക്കത്തിൽ ചെറിയ ലാഭം നൽകി വിശ്വാസം നേടിയെടുക്കുന്ന തട്ടിപ്പുകാർ, വലിയ തുകകൾ അക്കൗണ്ടിലെത്തിയാൽ ഉടൻ തന്നെ ആപ്പും ടെലിഗ്രാം ചാനലുകളും പ്രവർത്തനരഹിതമാക്കി പണവുമായി മുങ്ങുകയാണ് ചെയ്യുന്നത്.

ടെലിഗ്രാമിന് എതിരെ കടുത്ത നടപടി
തട്ടിപ്പുകാർ പ്രധാനമായും ആശയവിനിമയത്തിനായി ഉപയോഗിക്കുന്നത് ടെലിഗ്രാം ആപ്പാണ്. സൈബർ പോലീസിന്റെ കണ്ണുവെട്ടിക്കാൻ എളുപ്പമാണെന്നതിനാലാണ് ഇവർ ടെലിഗ്രാം തിരഞ്ഞെടുക്കുന്നത്. എന്നാൽ കേന്ദ്ര ഐടി മന്ത്രാലയത്തിന്റെ നിർദ്ദേശപ്രകാരം ഈ തട്ടിപ്പ് സംഘങ്ങൾ നിയന്ത്രിച്ചിരുന്ന അയ്യായിരത്തിലധികം ചാനലുകളാണ് ഇപ്പോൾ നിരോധിച്ചിരിക്കുന്നത്. ഇത്തരം ചാനലുകളിലൂടെ പണം നിക്ഷേപിക്കാൻ ആവശ്യപ്പെടുന്ന 'അഡ്മിൻ'മാരെ കണ്ടെത്താനുള്ള ശ്രമത്തിലാണ് ഏജൻസികൾ.

ജാഗ്രതാ നിർദ്ദേശവുമായി സർക്കാർ
ഓൺലൈൻ ഗെയിമുകളിലൂടെയും ആപ്പുകളിലൂടെയും പണം സമ്പാദിക്കാം എന്ന വാഗ്ദാനങ്ങളിൽ വീഴരുതെന്ന് കേന്ദ്ര സർക്കാർ മുന്നറിയിപ്പ് നൽകി. ഔദ്യോഗിക പ്ലാറ്റ്‌ഫോമുകളിൽ ഇല്ലാത്ത ആപ്പുകൾ ഡൗൺലോഡ് ചെയ്യുന്നത് വഴി നിങ്ങളുടെ ഫോണിലെ വ്യക്തിഗത വിവരങ്ങൾ ചോരാനും സാധ്യതയുണ്ട്. ഇതിനുപുറമെ, ചൈന കേന്ദ്രീകരിച്ച് പ്രവർത്തിക്കുന്ന ചില സൈബർ ലോബികൾക്ക് ഈ തട്ടിപ്പിൽ പങ്കുണ്ടോ എന്നും സൈബർ വിംഗം അന്വേഷിക്കുന്നുണ്ട്.

പണം നഷ്ടപ്പെട്ടാൽ എന്ത് ചെയ്യണം?
നിങ്ങൾക്ക് ഇത്തരത്തിൽ ഏതെങ്കിലും വിധത്തിലുള്ള സാമ്പത്തിക തട്ടിപ്പ് നേരിടേണ്ടി വന്നാൽ ഉടൻ തന്നെ ദേശീയ സൈബർ ക്രൈം ഹെൽപ്പ് ലൈൻ നമ്പറായ 1930-ൽ വിളിക്കുക. തട്ടിപ്പ് നടന്ന് ആദ്യത്തെ രണ്ട് മണിക്കൂറിനുള്ളിൽ (Golden Hour) റിപ്പോർട്ട് ചെയ്താൽ നഷ്ടപ്പെട്ട പണം തിരിച്ചുപിടിക്കാനുള്ള സാധ്യത കൂടുതലാണ്. കൂടാതെ, www.cybercrime.gov.in എന്ന പോർട്ടൽ വഴിയും പരാതികൾ നൽകാവുന്നതാണ്.