വിവാഹ വാഗ്ദാനം നല്കി ഐപിഎസ് ഓഫീസര് ലൈംഗിക ചൂഷണം ചെയ്തു
ജബല്പുര്: വിവാഹ വാഗ്ദാനം നല്കി ഐപിഎസ് ഓഫീസര് ബലാത്സംഗം ചെയ്തതായി യുവതിയുടെ പരാതി. ഇന്ഡോറിലെ തുക്കോഗഞ്ച് പോലീസ് സ്റ്റേഷനിലാണ് കേസ് രജിസ്റ്റര് ചെയ്തിരിക്കുന്നത്. ജബല്പുര് പോലീസ് സ്റ്റേഷനില് രജിസ്റ്റര് ചെയ്ത കേസ് പിന്നീട് തുക്കോഗഞ്ച് പോലീസ് സ്റ്റേഷനിലേക്ക് മാറ്റുകയായിരുന്നു. സംഭവം നടന്നത് ഇവിടെവെച്ചായതിനാലാണ് കേസ് മാറ്റിയത്. പരാതിയില് ഓഫീസര്ക്കെതിരെ കേസ് രജിസ്റ്റര് ചെയ്തുകഴിഞ്ഞു.
ഫേസ്ബുക്ക് വഴിയാണ് ഐപിഎസ് ഓഫീസറായ ലോഹിത് മതാനി പെണ്കുട്ടിയെ പരിചയപ്പെടുന്നത്. യുപിഎസ്സി പരീക്ഷയ്ക്ക് തയ്യാറെടുക്കുകയായിരുന്ന പെണ്കുട്ടിയെ അതിന് സഹായിക്കാമെന്ന് ലോഹിത് മതാനി വാഗ്ദാനം ചെയ്തു. ഇതിനായി പെണ്കുട്ടിയെ ഇന്ഡോറിലേക്ക് വിളിച്ചുവരുത്തുകയും വിവാഹ വാഗ്ദാനം നല്കിയശേഷം ലൈംഗിക ചൂഷണത്തിന് ഇരയാക്കുകയുമായിരുന്നെന്ന് തുക്കോഗഞ്ച് പോലീസ് ഉദ്യോഗസ്ഥനായ ദിലീപ് ചൗധരി പറഞ്ഞു.
ഐപിഎസ് ഓഫീസറായി തെരഞ്ഞെടുക്കപ്പെട്ട താന് മഹാരാഷ്ട്രയില് നിയമിതനാകുമെന്നും യു പി എസ് സി പരീക്ഷയില് സഹായിക്കാമെന്നുമായിരുന്നു ലോഹിത്തിന്റെ വാഗ്ദാനം. വാഗ്ദാനത്തില് വിശ്വസിച്ച പെണ്കുട്ടി കുറച്ചുദിവസം കൂടി ഇയാള്ക്കൊപ്പം താമസിച്ചതായി പരാതിയില് പറയുന്നു. കൂടാതെ ഇരുവരും പല സ്ഥലങ്ങളിലും ചുറ്റിയടിക്കുകയും ചെയ്തു.
ഐപിഎസ് ഓഫീസറുടെ വിവാഹ വാഗ്ദാനം പെണ്കുട്ടി പിന്നീട് വീട്ടുകാരെ അറിയിച്ചു. എന്നാല്, വീട്ടുകാര് മതാനിയുടെ അടുത്ത് വിവാഹ ആലോചനയുമായി എത്തിയപ്പോള് ഓഫീസര് വിവാഹ വാഗ്ദാനം നിരസിക്കുകയായിരുന്നു. പെണ്കുട്ടിക്ക് താന് വിവാഹ വാഗ്ദാനം നല്കിയിട്ടില്ലെന്നും ലൈംഗിക ചൂഷണം നടത്തിയിട്ടില്ലെന്നും മതാനി പറഞ്ഞു. ഇതോടെ പെണ്കുട്ടി പോലീസിനെ സമീപിക്കുകയായിരുന്നു.