ദുര്‍മന്ത്രവാദം സംശയിച്ച് മരുമകന്‍ സ്ത്രീയെ കൊലപ്പെടുത്തി

റായ്പുര്‍: അടുത്തിടെ ജനിച്ച തന്റെ മകന്റെ മരണത്തിനുത്തരവാദിയാണെന്ന് ആരോപിച്ച് മരുമകന്‍ സ്ത്രീയെ കൊലപ്പെടുത്തി. ഛത്തീസ്ഗഡിലെ കൊറേയ ജില്ലയിലെ സോന്‍ഹത് ഗ്രാമത്തിലാണ് അപൂര്‍വ സംഭവം. സംഭവത്തില്‍ ശിവപ്രകാശ് പൈക്ര(29) എന്നയാള്‍ അറസ്റ്റിലായി. ഇയാളുടെ ബന്ധുവായ മന്‍കി ഭായി(60) ആണ് കൊല്ലപ്പെട്ടത്.

കൊലപാതകത്തിനുശേഷം യുവാവ് പോലീസിന് മുന്‍പാകെ കീഴടങ്ങി. യുവാവ് വടികൊണ്ട് അടിച്ചാണ് സ്ത്രീയെ കൊലപ്പെടുത്തിയതെന്ന് കൊറേയ പോലീസ് സൂപ്രണ്ട് ബിഎസ് ദ്രുവ് അറിയിച്ചു. സംഭവത്തെക്കുറിച്ച് യുവാവ് പോലീസിന് നല്‍കിയ മൊഴി ഇപ്രകാരമാണ്.

ആഗസ്ത് 17ന് ശിവപ്രകാശിന് ഒരു ആണ്‍കുട്ടി ജനിച്ചിരുന്നു. എന്നാല്‍, ജനനസമയം മുതല്‍ കുട്ടിക്ക് അസുഖമായതിനാല്‍ ആശുപത്രിയില്‍ തന്നെ ചികിത്സയിലാക്കി. അംബികാപുരിലെ ആശുപത്രിയില്‍ ചികിത്സയിലായിരുന്ന കുട്ടിയെ രോഗം ഏതാണ്ട് ഭേദമായതിനെ തുടര്‍ന്ന് ആഗസ്ത് 30ന് വീട്ടിലേക്ക് തിരിച്ചയക്കുകയും ചെയ്തു. എന്നാല്‍ വീട്ടിലെത്തിയതിന്റെ പിറ്റേദിവസം കുട്ടി മരണപ്പെട്ടു.

കുട്ടിയുടെ മരണകാരണം മന്‍കി ഭായിയുടെ ദുര്‍മന്ത്രവാദം കൊണ്ടാണെന്നാണ് ശിവപ്രകാശ് സംശയിച്ചത്. സ്ത്രീ മിക്കപ്പോഴും വീട്ടില്‍ വെച്ച് മന്ത്രവാദം ചെയ്യുന്നത് യുവാവ് കാണാറുണ്ടായിരുന്നു. തന്റെ മകനെ ഇല്ലാതാക്കിയ സ്ത്രീയോട് പ്രതികാരം ചെയ്യാന്‍ കാത്തിരുന്ന ശിവപ്രകാശ് അവസരം കിട്ടിയപ്പോള്‍ ആവരെ വടികൊണ്ട് കൊലപ്പെടുത്തുകയായിരുന്നു.

English summary

Chhattisgarh Woman witchcraft, Chhattisgarh Woman allegedly beaten to death by nephew