ഭര്ത്താവിനെ ഉപേക്ഷിച്ച് മുങ്ങി...യുവതിയെയും കാമുകനെയും നാട്ടുകാര് നഗ്നരാക്കി കെട്ടിയിട്ടു...
ഉദയ്പൂര്: ഭര്ത്താവിനെ ഉപേക്ഷിച്ച് ഒളിച്ചോടിയ യുവതിയെയും കാമുകനെയും നാട്ടുകാര് നഗ്നരാക്കി കെട്ടിയിട്ടു. രണ്ട് ദിവസമാണ് ഭര്ത്താവിന്റെ നേതൃത്വത്തില് നാട്ടുകാര് യുവതിയെയും കാമുകനെയും നഗ്നരാക്കി കെട്ടിയിട്ടത്. രാജസ്ഥാനിലെ ഉദയ്പൂരിലാണ് സംഭവം നടന്നത്.
കാമുകനൊത്ത് യുവതി മുങ്ങിയതില് പ്രകോപിതനായ യുവതിയുടെ ഭര്ത്താവ് ഭന്വാല് ലാല് മീന നാട്ടുകാരെ കൂട്ടി ഇരുവരെയും പിടികൂടുകയായിരുന്നു. തുടര്ന്ന് ഇവരെ നഗ്നരാക്കി ഒരു തൂണില് കെട്ടിയിട്ടു. യുവതിയുടെയും കാമുകന്റെയും നഗ്ന ചിത്രങ്ങളെടുത്ത് സോഷ്യല് മീഡിയയിലും പ്രചരിപ്പിച്ചു.
ഈ അക്രമമെല്ലാം അരങ്ങേറിയത് പ്രദേശത്തെ സര്ക്കാര് ഓഫീസിനും സ്കൂളിനുമടുത്താണ്. എന്നാല് സംഭവമറിഞ്ഞിട്ടും ഉദ്യോഗസ്ഥരോ അധ്യാപകരോ വിവരം പോലീസില് അറിയിക്കാന് തയ്യാറായില്ലെന്നതാണ് ഞെട്ടിപ്പിക്കുന്നത്. നഗ്ന ചിത്രങ്ങള് സോഷ്യല് മീഡിയയില് വൈറലായതോടെയാണ് പോലീസും വിഷയത്തിലിടപെട്ടത്.
സംഭവമറിഞ്ഞ് യുവതിയുടെ കാമുകന്റെ ബന്ധുക്കള് സ്ഥലത്തെത്തിയെങ്കിലും നാട്ടുകാര് യുവാവിനെ അഴിച്ച് വിടാന് തയ്യാറായില്ല. 80,000 രൂപ നല്കിയതിന് ശേഷമാണത്രേ യുവാവിനെ കെട്ടഴിച്ച് വിട്ടത് യുവാവിന്റെ ബന്ധുക്കള് വിവരമറിയിച്ചതിനെ തുടര്ന്ന് പോലീസ് സ്ഥലത്തെത്തിയാണ് സ്ഥിതിഗതികള് നിയന്ത്രിച്ചത്.
നാട്ടുകാരോട് പോലീസ് ചര്ച്ച നടത്തിയതിന് ശേഷമാണ് യുവതിയെ മോചിപ്പിക്കാനായത്. സംഭവത്തില് യുവതിയുടെ ഭര്ത്താവ് ഭന്വാല്ലാലിനെ അടക്കം 13 പേര്ക്കെതിരെ പോലീസ് കേസെടുത്തിട്ടുണ്ട്. സ്ത്രീകളുള്പ്പടെയുള്ളവര്ക്കെതിരെ കേസെടുത്തതോടെ ഉദയ്പൂരില് നാട്ടുകാര് പോലീസിനെതിരെ തിരിഞ്ഞു. ഇതോടെ എസ്പി അടക്കമുള്ള പോലീസ് സംഘം പ്രദേശത്ത് തമ്പടിച്ചിരിക്കുകയാണ്.
അതേസമയം നാട്ടുകാര് നിയമം കയ്യിലെടുത്തിട്ടും ഒരു സ്ത്രീയ്ക്ക് നേരെ അതിക്രമമുണ്ടായിട്ടും അടിയന്തര നടപടിയെടുക്കാത്ത പോലീസ് നിലപാടിനെതിരെ വലിയ പ്രതിഷേധമുയര്ന്നിട്ടുണ്ട്.