ഹൃത്വിക് റോഷനൊപ്പം ഡിന്നര് നല്കിയില്ല; കൊക്കകോളയ്ക്കെതിരെ യുവതിയുടെ ഹര്ജി
പഞ്ച്ഗുള: ബോളിവുഡ് നടന് ഹൃത്വിക് റോഷനൊപ്പം ഡിന്നര് വാഗ്ദാനം ചെയ്ത് വഞ്ചിച്ചെന്നു കാട്ടി യുവതി കൊക്കകോളയ്ക്കെതിരെ കോടതിയില് പരാതി നല്കി. ഹരിയാണയിലെ പഞ്ചകുള സ്വദേശിനിയായ ശിഖ മൊംഗ ആണ് പരാതിക്കാരി. 2.5കോടി രൂപ തനിക്ക് നഷ്ടപരിഹാരമായി നല്കണമെന്നാണ് യുവതി പരാതിയില് ആവശ്യപ്പെട്ടിരിക്കുന്നത്.
2000ല് കൊക്കകോള നടത്തിയ ഒരു മത്സരത്തില് ഒന്നാംസ്ഥാനം നേടിയത് ശിഖ ആയിരുന്നു. ഒന്നാം സ്ഥാനത്തെത്തുന്നവര്ക്ക് ഹൃത്വിക്കിനൊപ്പം ഡിന്നര് എന്നായിരുന്നു കമ്പനിയുടെ വാഗ്ദാനം. എന്നാല് 15 വര്ഷങ്ങള് കഴിഞ്ഞിട്ടും നടനൊപ്പം ഡിന്നര് കഴിക്കാനുള്ള അവസരം തനിക്ക് ഒരുക്കി തരുന്നതിന് കമ്പനിക്ക് സാധിച്ചിട്ടില്ലെന്ന് ശിഖ ചൂണ്ടിക്കാട്ടുന്നു.
ശിഖയുടെ ഹര്ജി സ്വീകരിച്ച ചണ്ഡീഗഡ് കോടതി കൊക്കകോളയ്ക്ക് നോട്ടീസ് അയച്ചു. പരാതിയില് മറുപടി നല്കാനാണ് കോടതി കൊക്കകോളയ്ക്ക് നോട്ടീസ് അയച്ചിരിക്കുന്നത്. ഇത്തരം മത്സരങ്ങള്ക്കായി ടിവിയിലൂടെ വന് പ്രചാരം നല്കുകയും ശേഷം മത്സര വിജയി ആകാത്തവര്ക്ക് സമ്മാനം നല്കാതെ മുങ്ങുകയും ചെയ്യുന്ന കമ്പനികള്ക്ക് താക്കീതാണ് ശിഖയുടെ പരാതി.
പരസ്യത്തിലൂടെ ഉപഭോക്താക്കള് ആകര്ഷിക്കപ്പെട്ടുകഴിഞ്ഞാല് തങ്ങളുടെ വാഗ്ദാനം മറക്കുകയാണ് മിക്ക കമ്പനികളുടെയും രീതി. വന്കിടക്കാര് ആയതുകൊണ്ടുതന്നെ ഇവര്ക്കെതിരെ കോടതി നടപടിക്ക് പലരും തയ്യാറാകാറില്ല. കോടതിവിധി തനിക്ക് അനുകൂലമാകുകയാണെങ്കില് കമ്പനികളുടെ ഇത്തരം തട്ടിപ്പുകള്ക്ക് വിരമമാകുമെന്നാണ് ശിഖയുടെ പക്ഷം.