ഇന്ധനക്ഷാമം രൂക്ഷമാകുന്നു; 'വർക്ക് ഫ്രം ഹോം' വേണമെന്ന ആവശ്യം ശക്തമാകുന്നു

പശ്ചിമേഷ്യയിൽ തുടരുന്ന ഇറാൻ-ഇസ്രായേൽ യുദ്ധം ആഗോള വിപണിയിൽ എണ്ണവില കുതിച്ചുയരാൻ കാരണമായതോടെ ഇന്ത്യയിലും അതിന്റെ പ്രതിഫലനങ്ങൾ കണ്ടുതുടങ്ങി. പെട്രോൾ-ഡീസൽ വില്പന നിയന്ത്രണവും, പാചകവാതക വില വർദ്ധിക്കുകയും പലസ്ഥലതും സിലിണ്ടർ കിട്ടാത്ത സാഹചര്യവും വന്നതോടെ, ഐടി ഉൾപ്പെടെയുള്ള വിവിധ മേഖലകളിലെ ജീവനക്കാർ വീണ്ടും വർക്ക് ഫ്രം ഹോം (WFH) ആവശ്യവുമായി രംഗത്തെത്തിയിരിക്കുകയാണ്. എക്സ് (ട്വിറ്റർ), ലിങ്ക്ഡ്ഇൻ തുടങ്ങിയ പ്ലാറ്റ്‌ഫോമുകളിൽ 'Bring Back WFH' എന്ന ഹാഷ്‌ടാഗ് ഇതിനോടകം ട്രെൻഡിംഗായി മാറിക്കഴിഞ്ഞു.

യാത്രാച്ചെലവ് താങ്ങാനാവുന്നില്ല

യുദ്ധം മൂലം ക്രൂഡ് ഓയിൽ വിതരണം തടസ്സപ്പെട്ടതോടെ ഇന്ത്യയിൽ ഇന്ധന വിതരണത്തിന് നിയന്ത്രണം വരുന്നുണ്ട്. ഓഫീസുകളിലേക്ക് സ്വന്തം വാഹനങ്ങളിലും ടാക്സികളിലും യാത്ര ചെയ്യുന്നവർക്ക് ഇത് ബുദ്ധിമുട്ട് ആവുകയാണ്. അതോടൊപ്പം ഉയർന്ന വിലയും തിരിച്ചടിയാണ്. ഒരു സാധാരണ ഐടി ജീവനക്കാരന്റെ മാസശമ്പളത്തിന്റെ 20 മുതൽ 30 ശതമാനം വരെ നിലവിൽ യാത്രാച്ചെലവിനായി മാത്രം മാറ്റിവയ്ക്കേണ്ടി വരുന്നുവെന്നാണ് കണക്കുകൾ സൂചിപ്പിക്കുന്നത്. ഇതാണ് വീട്ടിലിരുന്ന് ജോലി ചെയ്യാനുള്ള അനുവാദം ചോദിക്കാൻ ജീവനക്കാരെ പ്രേരിപ്പിക്കുന്നത്.

സോഷ്യൽ മീഡിയയിലെ പ്രതിഷേധം

ഹോർമുസ് കടലിടുക്കിലെ സംഘർഷം കാരണം എൽപിജി, പെട്രോൾ വിതരണത്തിൽ തടസ്സം നേരിടുന്നു എന്ന വാർത്തകൾ പുറത്തുവന്നതോടെയാണ് നെറ്റിസൺസ് പ്രതിഷേധം ശക്തമാക്കിയത്. "പെട്രോളിന് 150 രൂപ കടന്നാൽ പിന്നെ ജോലിക്ക് പോകുന്നത് എങ്ങനെ ലാഭകരമാകും?" എന്നാണ് പലരും സോഷ്യൽ മീഡിയയിലൂടെ ചോദിക്കുന്നത്. റോഡിലെ തിരക്കും ഇന്ധന ഉപഭോഗവും കുറയ്ക്കാൻ വർക്ക് ഫ്രം ഹോം അല്ലാതെ മറ്റ് വഴികളില്ലെന്ന് പരിസ്ഥിതി വിദഗ്ധരും ചൂണ്ടിക്കാട്ടുന്നു. 2020-ലെ കോവിഡ് കാലത്തിന് സമാനമായി കമ്പനികൾ വീണ്ടും റിമോട്ട് വർക്ക് ഓപ്ഷനുകൾ നൽകണമെന്നാണ് പ്രധാന ആവശ്യം. മെട്രോ നഗരങ്ങളിലെ വാടകയും ജീവിതച്ചെലവും കൂടി വർദ്ധിച്ചതോടെ പലരും സ്വന്തം നാട്ടിലേക്ക് മടങ്ങിപ്പോകാനും അവിടെയിരുന്ന് ജോലി ചെയ്യാനുമാണ് താൽപ്പര്യപ്പെടുന്നത്..

നിലവിൽ പല മുൻനിര കമ്പനികളും തങ്ങളുടെ ജീവനക്കാരെ ഓഫീസിലേക്ക് തിരികെ വിളിച്ചുകൊണ്ടിരിക്കുന്ന ഘട്ടത്തിലാണ് ഈ പ്രതിസന്ധി ഉണ്ടായിരിക്കുന്നത്. ചില സ്റ്റാർട്ടപ്പുകൾ ഇന്ധന അലവൻസ് വർദ്ധിപ്പിക്കാൻ ആലോചിക്കുന്നുണ്ടെങ്കിലും, ഭൂരിഭാഗം ജീവനക്കാരും താൽപ്പര്യപ്പെടുന്നത് വീട്ടിലിരുന്ന് ജോലി ചെയ്യാനാണ്. വൈദ്യുതി നിരക്കിലെ വർദ്ധനവ് ഒരു വശത്തുണ്ടെങ്കിലും, ഇന്ധനത്തിനായി ചിലവാകുന്ന തുകയുമായി താരതമ്യം ചെയ്യുമ്പോൾ അത് കുറവാണെന്ന് ജീവനക്കാർ വാദിക്കുന്നു.

ഗതാഗത മേഖലയിലെ പ്രതിസന്ധി
ഇന്ധനക്ഷാമം പൊതുഗതാഗതത്തെയും സാരമായി ബാധിച്ചിട്ടുണ്ട്. ബസ്, ഓട്ടോ നിരക്കുകൾ വർദ്ധിപ്പിക്കണമെന്ന ആവശ്യവുമായി യൂണിയനുകൾ രംഗത്തെത്തിക്കഴിഞ്ഞു. പാചകവാതക ക്ഷാമം കൂടി രൂക്ഷമായതോടെ സാധാരണക്കാരുടെ ജീവിതച്ചെലവ് കുത്തനെ ഉയർന്നു. ഈ സാഹചര്യത്തിൽ ഓഫീസുകളിലേക്കുള്ള യാത്രകൾ ഒഴിവാക്കുന്നത് പരിസ്ഥിതിക്കും സാമ്പത്തിക സുരക്ഷിതത്വത്തിനും നല്ലതാണെന്നാണ് പൊതുജനാഭിപ്രായം.

വരും ദിവസങ്ങളിൽ യുദ്ധം അവസാനിച്ചില്ലെങ്കിൽ, കമ്പനികൾക്ക് തങ്ങളുടെ നയങ്ങളിൽ മാറ്റം വരുത്തേണ്ടി വരുമെന്നാണ് സാമ്പത്തിക നിരീക്ഷകർ വിലയിരുത്തുന്നത്. ഇന്ധന വിലയിലെ അനിശ്ചിതത്വം നിലനിൽക്കുന്നിടത്തോളം കാലം 'വർക്ക് ഫ്രം ഹോം' എന്ന ആവശ്യം സജീവമായി തന്നെ തുടരും.