Year Ender 2024: അംബാനി ഒരിക്കലും 2024 മറക്കില്ല; സ്വന്തം കമ്പനിയെ 'കുത്തുപാള' എടുപ്പിച്ച വര്ഷം
2024 മുകേഷ് അംബാനിയുടെ നേതൃത്വത്തിലുള്ള റിലയന്സ് ഇന്ഡസ്ട്രീസിനെ സംബന്ധിച്ചിടത്തോളം മറക്കാനാകാത്ത വര്ഷമായിരിക്കും. റിലയന്സ് ഇന്ഡസ്ട്രീസിന്റെ ഓഹരികള് നെഗറ്റീവ് റിട്ടേണുകളോടെ ആയിരിക്കും ഈ വര്ഷം അവസാനിപ്പിക്കുക. കഴിഞ്ഞ 10 വര്ഷത്തിനിടെ ഇതാദ്യമായാണ് കമ്പനി ഇത്രയും തകര്ച്ച നേരിടുന്നത്. റിലയന്സ് ഇന്ഡസ്ട്രീസിന്റെ മാര്ക്കറ്റ് ക്യാപിറ്റലൈസേഷന് ജൂലൈയിലെ ഏറ്റവും ഉയര്ന്ന നിലയില് നിന്ന് 4.4 ലക്ഷം കോടി രൂപ കുറഞ്ഞിരിക്കുകയാണ്.
കമ്പനി ഓഹരികള് അവരുടെ ഏറ്റവും ഉയര്ന്ന പോയിന്റായ 1608.95 രൂപയില് നിന്ന് ഏകദേശം 21% ഇടിവാണ് രേഖപ്പെടുത്തിയിരിക്കുന്നത്. 2017ലെ 70.55% റിട്ടേണും 2018 മുതല് 2020 വരെയുള്ള സ്ഥിരമായ വളര്ച്ചയും ഉള്പ്പെടെ മുന് വര്ഷങ്ങളിലെ ശക്തമായ പ്രകടനങ്ങള്ക്ക് ശേഷമാണ് കമ്പനിയുടെ വളര്ച്ച മന്ദഗതിയിലാകാന് തുടങ്ങിയത്. വരുമാനം 2021-ല് 19.32%, 2022-ല് 7.60%, 2023-ല് 1.44% എന്നിങ്ങനെയായി കുറഞ്ഞു.
റിലയന്സ് റീട്ടെയ്ല് 2024 ല് കാര്യമായ തടസങ്ങള് നേരിട്ടിരുന്നു. ദുര്ബലമായ ഡിമാന്ഡ് കാരണം കമ്പനിയുടെ 1185 സ്റ്റോറുകള് അടച്ചുപൂട്ടേണ്ടിവന്നു. ഫൂട്ട്പ്രിന്റ് വര്ധിച്ചിട്ടും മന്ദഗതിയിലുള്ള വരുമാന വളര്ച്ചയാണ് കമ്പനിക്ക് നേരിടേണ്ടി വന്നത്. റീട്ടെയില് വിപണിയിലെ മത്സരം ശക്തമാക്കുന്ന ക്വിക്ക് കൊമേഴ്സ് കമ്പനികളുടെ ഉയര്ച്ച ഈ പ്രശ്നങ്ങളെ സങ്കീര്ണ്ണമാക്കി എന്നാണ് വിലയിരുത്തല്.
റിലയന്സ് ഇന്ഡസ്ട്രീസിന് ഒന്നുകില് ശക്തമായ റിഫൈനിംഗ്/പെറ്റ്കെം മാര്ജിനുകളോ റീട്ടെയില് വിഭാഗത്തിന് ഉയര്ന്ന മൂല്യനിര്ണയമോ ആണ് കരകയറാന് ആവശ്യം. ഡിമാര്ട്ട് പോലുള്ള സമകാലികരുമായി താരതമ്യം ചെയ്യുമ്പോള് റിലയന്സ് റീട്ടെയിലിന്റെ മൂല്യം കുറവാണ്. അതിനാല് റീട്ടെയില് മൂല്യനിര്ണ്ണയത്തിലെ ഏതെങ്കിലും വ്യതിയാനം ഓഹരി വില്പ്പനയില് നിന്ന് കമ്പനിയുടെ സ്റ്റോക്ക് വര്ധിപ്പിക്കും.
ചരിത്രപരമായി, റിഫൈനിംഗ്, കെമിക്കല്സ് അല്ലെങ്കില് മാര്ജിന് സൈക്കിളുകളിലെ മൂലധന ചെലവ് (കാപെക്സ്) ആണ് റിലയന്സ് ഇന്ഡസ്ട്രീസിന്റെ വളര്ച്ചയെ നയിച്ചത്. കമ്പനിയുടെ മോശം പ്രകടനം ഏഷ്യയിലെ ഏറ്റവും ധനികനായ മുകേഷ് അംബാനിയുടെ സമ്പത്തിലും പ്രതിഫലിക്കുന്നു. ജൂലൈയില് മകന് അനന്ത് അംബാനിയുടെ വിവാഹസമയത്ത് 120.8 ബില്യണ് ഡോളറായിരുന്നു അദ്ദേഹത്തിന്റെ ആസ്തി.
എന്നാല് ഡിസംബര് 13 ആയപ്പോഴേക്കും അദ്ദേഹത്തിന്റെ ആസ്തി 96.7 ബില്യണ് ഡോളറായി കുറഞ്ഞു. ഭാവിയിലെ വളര്ച്ചയെ നയിക്കുന്നതിനായി ഡിജിറ്റല് പ്ലാറ്റ്ഫോമുകള്, റീട്ടെയില് ബ്രാന്ഡുകള്, പുനരുപയോഗ ഊര്ജം എന്നിവയിലേക്കുള്ള തന്ത്രപരമായ മാറ്റത്തിലാണ് അംബാനി ഇപ്പോള് ശ്രദ്ധ കേന്ദ്രീകരിക്കുന്നത്. ഇന്ത്യയുടെ സാറ്റലൈറ്റ് ബ്രോഡ്ബാന്ഡ് വിപണിയിലേക്കുള്ള എലോണ് മസ്കിന്റെ സ്റ്റാര്ലിങ്കിന്റെ പ്രവേശനം അംബാനിക്ക് വെല്ലുവിളിയാണ്.
അംബാനിയുടെ കീഴിലുള്ള ഡിജിറ്റല്, ടെലികോം വിഭാഗമായ ജിയോ പ്ലാറ്റ്ഫോമുകളുടെ വളര്ച്ചയ്ക്ക് മസ്കിന്റെ വരവ് ഭീഷണിയാണ്. എന്നിരുന്നാലും, ഇന്ത്യയുടെ സ്ട്രീമിംഗ് വിപണിയെ ലക്ഷ്യമിട്ട് 8.5 ബില്യണ് ഡോളര് നിക്ഷേപം, ഇന്ത്യയില് എഐ കമ്പ്യൂട്ടിംഗ് ഇന്ഫ്രാസ്ട്രക്ചര് നിര്മ്മിക്കുന്നതിന് എന്വിഡിയയുമായുള്ള പങ്കാളിത്തം ശക്തിപ്പെടുത്തല്, വാള്ട്ട് ഡിസ്നിയുമായി സംയുക്ത സംരംഭം ഉള്പ്പെടെയുള്ള പദ്ധതികളുമായി റിലയന്സ് മുന്നോട്ട് പോകുന്നു.
100 ബില്യണ് ഡോളറിലധികം മൂല്യമുള്ള ജിയോയുടെ 2025 ലിസ്റ്റിംഗ് അംബാനി ലക്ഷ്യമിടുന്നു. അതേസമയം റീട്ടെയില് യൂണിറ്റിന്റെ ഐപിഒ പിന്നീടായിരിക്കും. ജിയോയും റിലയന്സ് റീട്ടെയ്ലും അഞ്ച് വര്ഷത്തിനുള്ളില് ലിസ്റ്റിംഗിലേക്ക് നീങ്ങുമെന്ന് 2019 ല് അംബാനി സൂചിപ്പിച്ചിരുന്നു.
Click it and Unblock the Notifications
Sign in with Google