മകന്റെ സെഞ്ച്വറിയില് സന്തോഷം; ധോണിക്കു മാപ്പു നല്കിയതായി യുവരാജിന്റെ പിതാവ്
ദില്ലി: ആറു വര്ഷത്തിനുശേഷം മകന് ഏകദിന ക്രിക്കറ്റില് സെഞ്ച്വറി നേടിയത് യുവരാജിന്റെ പിതാവ് ആഘോഷിച്ചത് ധോണിക്ക് മാപ്പു നല്കിക്കൊണ്ട്. ഡക്കാന് ക്രോണിക്കലിനു നല്കിയ അഭിമുഖത്തിലാണ് യുവിയുടെ പിതാവ് യോഗ്രാജ് സിങ് ധോണിക്കും ധോണിയുടെ പൈശാചികമായ തീരുമാനങ്ങള്ക്കും മാപ്പു നല്കിയത്.
നേരത്തെ യുവരാജ് സിങ് ഇന്ത്യന് ടീമില് നിന്നും പുറത്താകാന് കാരണം ധോണിയാണെന്ന് യോഗ് രാജ് വിമര്ശിച്ചിരുന്നു. ധോണിയെ രൂക്ഷമായ ഭാഷയില് യുവിയുടെ പിതാവ് അധിക്ഷേപിക്കുകയും ചെയ്തു. എന്നാല്, അതെല്ലാം താന് മറന്നെന്നും ധോണിയെ ദൈവം തുണയ്ക്കുമെന്നുമാണ് കട്ടക്കിലെ പ്രകടനത്തിനുശേഷം യോഗ്രാജ് പറയുന്നത്.
ധോണി ക്യാപ്റ്റന് സ്ഥാനമൊഴിഞ്ഞശേഷമാണ് യുവരാജ് വീണ്ടും ഏകദിനം ടീമില് ഇടം നേടിയത്. യുവരാജ് സെഞ്ച്വറി നേടണമെന്നത് തന്റെ വലിയ ആഗ്രഹമായിരുന്നു. ധോണിയുടെ ചെയ്തികള്ക്ക് ദൈവം മാപ്പു നല്കാന് താന് പ്രാര്ഥിക്കുന്നുണ്ടെന്നും യോഗ്രാജ് പറഞ്ഞു.
ഇംഗ്ലണ്ടിനെതിരെ കട്ടക്കില് നടന്ന മത്സരത്തില് യുവരാജ് തന്റെ കരിയറിലെ മികച്ച ഇന്നിങ്സാണ് കാഴ്ചവെച്ചത്. ധോണിക്കൊപ്പം ഇരട്ട സെഞ്ച്വറി കൂട്ടുകെട്ട് കാഴ്ചവെച്ച യുവരാജ് 150 റണ്സെടുത്ത് ഇന്ത്യന് വിജയത്തില് നിര്ണായക പങ്കു വഹിച്ചു. 134 റണ്സെടുത്ത ധോണിയും യുവരാജ് ചേര്ന്നാണ് 25 റണ്സെടുക്കുന്നതിനിടയില് മൂന്നു വിക്കറ്റ് നഷ്ടപ്പെട്ട ഇന്ത്യയെ കരകയറ്റിയത്.