ഒരു ചക്കയ്ക്ക് വില ഒന്നര ലക്ഷത്തിനടുത്ത്; ലേലത്തിലെ താരം

എഡിൻബറോ: ചക്കയും മലയാളികളും തമ്മിലുള്ള ബന്ധം വല്ലാത്തൊരു ബന്ധം തന്നെയാണ്. ലോക്ഡൗൺ പ്രഖ്യാപിച്ച സമയത്ത് ചക്ക കൊണ്ട് പരീക്ഷിക്കാത്ത സാധനങ്ങൾ കുറവായിരുന്നു. ഹൽവ തൊട്ട് ജ്യൂസ് വരെ. എന്നാൽ ഇനി പറയാൻ പോകുന്നത്. വിദേശത്ത് താരമായ ചക്കയെക്കുറിച്ചാണ്. സ്കോട്‌ലൻഡിലെ എഡിൻബറോയിലെ സിറോ മലബാർ പള്ളിയിൽ ലേലത്തിന് വെച്ച ചക്കയാണ് ആ താരം.

അതെ, ആ ചക്കയെക്കുറിച്ചാണ് പറയാൻ പോകുന്നത്. ഈ ചക്ക ലേലത്തിന് വച്ചപ്പോൾ കിട്ടിയ തുക 1400 പൗണ്ട് ആണ്. ഏകദേശം 1,40,000 ഇന്ത്യൻ രൂപ. എഡിൻബറോ സെന്റ് അൽഫോൻസാ ആൻഡ് അന്തോണി പള്ളിയിലാണ് ലേലം നടന്നത്. ലേലത്തിന്റെ വെറും 29 സെക്കൻഡ് മാത്രം ദൈർഘ്യം ഉള്ള വിഡിയോ സോഷ്യൽ മീഡിയയിൽ ഇപ്പോൾ വൈറൽ ആണ്. പള്ളിയുടെ ഔദ്യോഗിക ഫെയ്സ്ബുക്ക്‌ പേജിലാണ് വീഡിയോ പോസ്റ്റ്‌ ചെയ്തിട്ടുള്ളത്.

ലേലത്തിലൂടെ ലഭിച്ച തുക ചാരിറ്റി പ്രവർത്തനങ്ങൾക്കായി ഉപയോഗിക്കുമെന്ന് പള്ളി ഭാരവാഹികൾപറഞ്ഞു. യുകെയിൽ ചക്ക ഇത്ര വലിയ വിലയ്ക്കേ ലേലത്തിന് പോവുന്നത് ഇത് പുതിയ കാര്യമല്ല. ഏറ്റവും കുറഞ്ഞത് ഇരുപത് മുതൽ 50 പൗണ്ടിന് വരെ വിറ്റു പോകുന്ന ചക്കകൾ ബ്രിട്ടനിലെ കടകളിലും ഓപ്പൺ മാർക്കറ്റുകളിലും ലഭ്യമാണ്. കഴിഞ്ഞ വർഷം ഓപ്പൺ മാർക്കറ്റുകളിൽ 160 പൗണ്ടിന് വരെ വിൽപന നടന്നത് ബിബിസി ഉൾപ്പെടെയുള്ള മാധ്യമങ്ങൾ വാർത്തയാക്കിയിരുന്നു.

ബ്രസീലിൽ നിന്നും ലണ്ടനിൽ വിൽപനയ്ക്ക് എത്തിച്ച ചക്കയെ കുറിച്ചായിരുന്നു ആ വാർത്ത. ചക്കയെന്ന മാജിക് പഴത്തിൽ ഒളിഞ്ഞിരിക്കുന്നത് എന്താണെന്ന അന്വേഷണവുമായി ദി ഗാർഡിയൻ പത്രവും വാർത്ത ചെയ്തത് കഴിഞ്ഞ വർഷമാണ്.സാധാരണ ശ്രീലങ്ക, തായ്‌ലൻഡ് എന്നിവിടങ്ങളിൽ നിന്നെത്തുന്ന ചക്കകളാണ് മലയാളികൾ യുകെയിൽ വാങ്ങുന്നത്.

മലേഷ്യയിൽ നിന്ന വരുന്ന ചക്ക പത്തു പൗണ്ടിന് വരെ ലഭിക്കുമ്പോൾ ഫിലിപ്പീൻസ് ചക്ക നാലര പൗണ്ടിനും കഴിഞ്ഞ വർഷങ്ങളിൽ ലഭ്യമായിരുന്നു. ശ്രീലങ്കൻ ചക്കകൾ കഴിഞ്ഞ സീസണിൽ ആറുമുതൽ ഏഴു വരെ പൗണ്ടിനാണ് വിറ്റു പോയിരുന്നത്. നാലോ അഞ്ചോ കിലോ തൂക്കമുള്ള ചക്കകൾ 20 മുതൽ 50 പൗണ്ട് വരെയുള്ള വിലയിൽ മലയാളി കടകളിൽ മുറിക്കാതെ വാങ്ങാൻ സാധിക്കുമായിരുന്നു.

ചക്ക ചുളകൾ പ്രത്യേക പായ്ക്കറ്റിലാക്കി 3 മുതൽ അഞ്ച് പൗണ്ട് വരെ വിലയ്ക്ക് യുകെയിൽ ലഭ്യമാണ്. ഫ്രോസൺ ചെയ്ത ചക്കയും ചക്കക്കുരുവും ഇടി ചക്കയും യുകെയിലെ മലയാളി കടകളിൽ നിങ്ങൾക്ക് വാങ്ങാൻ കിട്ടും. ചക്ക കൊണ്ട് ഉണ്ടാക്കുന്ന വിവിധ വിഭവങ്ങൾ നിങ്ങൾക്ക് വാങ്ങിക്കാനും ലഭിക്കും.

English summary

1,40,000 Indian rupee was obtained when one jackfruit was auctioned