കള്ളനും പോലീസും കളിക്കുന്നതിനിടെ ആറു വയസുകാരന്‍ സഹോദരനെ വെടിവെച്ചു കൊന്നു

ചിക്കാഗോ: വീട്ടില്‍ നിന്നും കള്ളനും പോലീസും കളിക്കുന്നതിനിടെ ആറു വയസുകാരന്‍ സ്വന്തം സഹോദരനെ വെടിവെച്ചു കൊന്നു. കളിക്കുന്നതിനിടെ കുട്ടി അച്ഛന്റെ തോക്ക് എടുക്കുകയും അബദ്ധത്തില്‍ അനുജനു നേരെ വെടിയുതിര്‍ക്കുകയുമായിരുന്നു. ചിക്കാഗോയിലാണ് സംഭവം നടന്നത്.

മൂന്ന് വയസുകാരനാണ് ദാരുണമായി സഹോദരന്റെ വെടിയേറ്റു മരിച്ചത്. കളിക്കുന്നതിനിടെ കുട്ടി ഫ്രിഡ്ജിനു മുകളിലിരുന്ന തോക്ക് എടുത്ത് അനുജനായ ഇയാന്‍ സാന്റിയാഗോവിന്റെ ശരീരത്തില്‍ വെടിയുതിര്‍ക്കുകയായിരുന്നുവെന്ന് ചിക്കാഗോ പോലീസ് വ്യക്തമാക്കുന്നു. ഗുരുതരമായി പരിക്കേറ്റ കുട്ടിയെ ഉടനെ ആശുപത്രിയില്‍ എത്തിച്ചെങ്കിലും രക്ഷിക്കാനായില്ല.

സംഭവത്തില്‍ പോലീസ് കുട്ടിയുടെ അച്ഛനെ അറസ്റ്റ് ചെയ്തു. കാരണം, സംഭവം നടക്കുമ്പോള്‍ രക്ഷിതാക്കള്‍ വീട്ടിലുണ്ടായിരുന്നില്ല. കൂടാതെ, കുട്ടികള്‍ക്ക് എടുക്കാന്‍ കഴിയുന്ന വിധത്തില്‍ ഉത്തരവാദിത്വമില്ലാതെ തോക്ക് വെച്ചതാണ് കൊലപാതകത്തിനു ഇടയാക്കിയതെന്നും പോലീസ് പറയുന്നു. തുടര്‍ന്ന് കുട്ടിയുടെ അച്ഛന്‍ മൈക്കള്‍ സാന്റിയാഗോവിനെതിരെ പോലീസ് കേസ് രജിസ്റ്റര്‍ ചെയ്യുകയായിരുന്നു.

25കാരനായ മൈക്കള്‍ സാന്റിയാഗോ തന്റെ സംരക്ഷണത്തിനു വേണ്ടിയാണ് തോക്ക് കൈവശം വെച്ചിരുന്നത്. ഇയാള്‍ കൊലപാതക സംഘത്തിലെ ഒരു അംഗമാണെന്നാണ് പോലീസ് പറയുന്നത്.

English summary

A 6-year-old boy accidentally shot and killed his 3-year-old brother while playing 'cops and robbers' with a gun their father told investigators he had obtained illegally from a gang member.