ബ്രസീലില്‍ ജനവാസ മേഖലയില്‍ വിമാനം തകർന്നു വീണു: 62 യാത്രക്കാർ കൊല്ലപ്പെട്ടു

സാവോപോളോ: ബ്രസീലിലെ സാവോപോളോയില്‍ വിമാനം തകർന്ന് വീണ് 62 യാത്രക്കാർ കൊല്ലപ്പെട്ടു. ബ്രസീലിയൻ എയർലൈനായ വോപാസ് ലിൻഹാസ് ഏരിയസിന്റെ എടിആർ-72 എന്ന വിമാനമാണ് അപകടത്തിൽപ്പെട്ടത്. 58 യാത്രക്കാരും 4 ജീവനക്കാരുമാണ് വിമാനത്തിലുണ്ടായിരുന്നത്. ജനവാസ മേഖലയില്‍ വിമാനം തകർന്ന് വീഴുന്നതിന്റെ ദൃശ്യങ്ങള്‍ പുറതന്ന് വന്നിട്ടുണ്ട്.

വിമാനത്തിലുണ്ടായിരുന്ന എല്ലാവരും മരിച്ചുവെന്ന് അപകടസ്ഥലത്തിനടുത്തുള്ള പ്രാദേശിക ഉദ്യോഗസ്ഥർ പറഞ്ഞുവെന്നാണ് അന്താരാഷ്ട്ര മാധ്യമങ്ങള്‍ റിപ്പോർട്ട് ചെയ്യുന്നത്. എ ടി ആർ വിമാനം വീടുകൾക്ക് സമീപമുള്ള മരക്കൂട്ടങ്ങൾക്ക് പിന്നിലേക്കാണ് നിയന്ത്രണം വിട്ട് വീഴുന്നത്. പിന്നാലെ പ്രദേശത്ത് നിന്നും വലിയ രീതിയിലുള്ള പുക ഉയരുന്നതും പുറത്ത് വന്ന ദൃശ്യങ്ങളില്‍ നിന്ന് കാണാന്‍ സാധിക്കും.

വിമാനം തകർന്ന് വീണ് ഒരു വീടിന് മാത്രമേ കേടുപാടുകൾ സംഭവിച്ചിട്ടുള്ളൂവെന്നും, താമസക്കാർക്ക് ആർക്കും പരിക്കില്ലെന്നും വിൻഹെഡോയ്ക്ക് സമീപമുള്ള വാലിൻഹോസിലെ മുന്‍സിപ്പല്‍ ഉദ്യോഗസ്ഥർ വ്യക്തമാക്കി. സംഭവത്തില്‍ പ്രതികരിച്ചുകൊണ്ട് ബ്രസീല്‍ പ്രസിഡന്റ് ലുല ഡ സില്‍വയും രംഗത്ത് വന്നു.

"ഞാൻ ശരിക്കും ഒരു മോശം വാർത്തയാണ് കേള്‍ക്കുന്നത്. അപകടത്തിൽ മരിച്ചവരോടുള്ള ആദരവിന്റെ ഭാഗമായി എല്ലാവരും ഒരു മിനിറ്റ് മൗനം ആചരിക്കണം" അപകടത്തിന് തൊട്ടുപിന്നാലെ ഒരു പരിപാടിയിൽ സംസാരിച്ച പ്രസിഡൻ്റ് ലൂയിസ് ഇനാസിയോ ലുല ഡ സിൽവ പറഞ്ഞു.

പരാന സംസ്ഥാനത്തെ കാസ്‌കാവലിൽ നിന്ന് സാവോ പോളോയിലെ പ്രധാന അന്താരാഷ്ട്ര വിമാനത്താവളത്തിലേക്ക് പുറപ്പെട്ട വിമാനം സാവോ പോളോയിൽ നിന്ന് 80 കിലോമീറ്റർ (50 മൈൽ) വടക്കുപടിഞ്ഞാറായി വിൻഹെഡോ പട്ടണത്തിലാണ് തകർന്ന് വീണതെന്നാണ് എയർലൈൻ കമ്പനിയായ വോപാസ് വ്യക്തമാക്കുന്നത്.

പിഎസ്-വിപിബി രജിസ്‌ട്രേഷനുള്ള വിമാനം തകരാൻ കാരണമെന്തെന്നതിനെക്കുറിച്ചുള്ള കൂടുതൽ വിവരങ്ങൾ ഇപ്പോള്‍ നൽകാൻ കഴിയില്ലെന്നും വിമാന കമ്പനി അറിയിച്ചു. അപകടസ്ഥലത്തേയ്ക്ക് അഗ്നിരക്ഷാ സേന ഉദ്യോഗസ്ഥരടക്കമുള്ള രക്ഷാപ്രവർത്തകർ എത്തിയിട്ടുണ്ട്.

English summary

A tragic plane crash in a residential area of São Paulo, Brazil, leaves 62 dead,