ലോകത്തെ ഏറ്റവും തിരക്കേറിയ വിമാനത്താവളം എന്ന പദവി ദുബായിക്ക്; റിപ്പോർട്ട് ഇങ്ങനെ

Updated: Saturday, January 8, 2022, 15:17 [IST]

ദുബായ്: ലോകത്തെ ഏറ്റവും തിരക്കേറിയ വിമാനത്താവളം എന്ന പദവി ദുബായിക്ക് സ്വന്തം . രാജ്യാന്തര വിമാന സർവീസുകൾ മാത്രം നടത്തുന്നവയിലാണ് ദുബായ് ഈ നേട്ടം കരസ്ഥമാക്കിയിരിക്കുന്നത്. കഴിഞ്ഞ വർഷം ആദ്യ പകുതിയിൽ മാത്രം ഒരു കോടി ആറു ലക്ഷം യാത്രക്കാരാണ് ദുബായ് വഴി സഞ്ചരിച്ചത് എന്നാണ് റിപ്പോർട്ട്.

ഡിസംബറിൽ 35 . 42 ലക്ഷം സീറ്റുകളാണ് ദുബായ് നൽകിയത് . എന്നാൽ, വർഷാവസാനം രണ്ടു കോടി 89 ലക്ഷം ആകുമെന്ന് ദുബായ് പ്രതീക്ഷിച്ചിരുന്നു. ഡിസംബർ മധ്യത്തോടെ ദുബായ് വിമാനത്താവളം പൂർണ സജ്ജമായിരുന്നു.

എന്നാൽ, രണ്ടാം സ്ഥാനം കരസ്ഥമാക്കിയത് ലണ്ടൻ ഹീത്രു വിമാനത്താവളം ആണ് . ദുബായിയെ അപേക്ഷിച്ച് പത്തു ലക്ഷം സീറ്റുകൾ കുറവാണ് ഇവർ നൽകിയത്. ആഗോള സഞ്ചാര വിവര ദാതാക്കളായ ഒ എൻ ജി ആണ് ഇക്കാര്യം വ്യക്തമാക്കിയിരിക്കുന്നത്. എത്ര ഷെഡ്യൂൾഡ് സീറ്റുകൾ നൽകിയിരുന്നു എന്നതിനെ അടിസ്ഥാനമാക്കിയാണ് പദവി കണക്കാക്കുന്നത്. ഇത് കോവിഡിന് മുൻപുള്ളതിനെ അപേക്ഷിച്ചുളള റിപ്പോർട്ടാണ്.

ഇതിൽ മൂന്നാം സ്ഥാനത്തുള്ളത് ആംസ്റ്റർഡാം വിമാനത്താവളമാണ്. 24.2 ലക്ഷം സീറ്റുകളാണ് ഇവർ നൽകിയത്. ബാക്കി കണക്കുകൾ ഇങ്ങനെ ;- പാരിസിലെ ചാൾസ് ഡിഗു (22.8 ലക്ഷം), ഇസ്തംബുൾ (20.9ലക്ഷം), ഫ്രാങ്ക്ഫർട്ട് (20.4 ലക്ഷം), ദോഹ (17.65 ലക്ഷം), മഡ്രിഡ് (15.1ലക്ഷം), ന്യുയോർക്ക് ജെഎഫ് കെന്നഡി(13.30ലക്ഷം), മിയാമി (11.2 ലക്ഷം) എന്നിങ്ങനെയാണ് മറ്റ് രാജ്യാന്തര വിമാനത്താവളത്തിലെ കണക്കുകൾ.