അത് ഏപ്രില് ഫൂള് ആയിരുന്നില്ല, ടിയാനക്ക് കിട്ടിയത് പുത്തന് ബിഎംഡബ്ല്യൂ!
വെല്ലിംഗ്ടണ്: ഏപ്രില് 1 ന് ആളുകളെ ഫൂളാക്കാന് പലരും പല പരിപാടികളും ഒപ്പിക്കാറുണ്ട്. അങ്ങനെയാകും ഇതും എന്നാണ് ന്യൂസിലാന്റുകാര് ആദ്യം കരുതിയത്... ക്ഷമിക്കണം, കാര്യം എന്താണെന്ന് പറഞ്ഞില്ലല്ലോ അല്ലേ!
ഏപ്രില് ഒന്നിന് പുറത്തിറങ്ങിയ ന്യൂസിലാന്റ് ഹെറാള്ഡ് പത്രത്തിന്റെ ഒന്നാം പേജില് ഒരു പരസ്യം ഉണ്ടായിരുന്നു. ബിഎംഡബ്ല്യൂ കാര് ഡീലറുടേതായിരുന്നു അത്. 'നിങ്ങളുടെ പഴയ കാറില് രാവിലെ തന്നെ ഷോറൂമില് എത്തൂ, എന്നിട്ട് ടോമിനെ അന്വേഷിക്കൂ... പുത്തന് ബിഎംഡബ്ല്യൂ കാര് സ്വന്തമാക്കൂ' എന്നായിരുന്നു പരസ്യം.
ഏപ്രില് ഫൂള് എന്ന് എഴുതിയിട്ടും ഉണ്ടായിരുന്നു. മിക്കവരും ഇതിനെ ഒരു ഫൂളാക്കല് പരിപാടിയായിട്ട് തന്നെയാണ് കണ്ടത്. എന്നാല് ടിയാന മാര്ഷ് എന്ന സ്ത്രീ ഇതല്പം സീരിയസ്സ് ആയിത്തന്നെ എടുത്തു.
പരസ്യം കണ്ടതിന്റെ ആവേശത്തില് തന്റെ 15 വര്ഷം പഴക്കമുള്ള നിസാന് കാറുമായി ടിയാന ബിഎംഡബ്ല്യൂ ഷോറൂമില് എത്തി. പത്രത്തിലെ പരസ്യത്തിനൊപ്പം ഒരു കൂപ്പണും ഉണ്ടായിരുന്നു. ടിയാന രഹസ്യ കോഡ് പറഞ്ഞു... മറ്റൊന്നും ആയിരുന്നില്ല അത് 'ടോം എവിടെ' എന്നായിരുന്നു.
ഇതോടെ റിസപ്ഷനിസ്റ്റ് ടോമിനെ കാണിച്ചുകൊടുത്തു. ടിയാന വന്നം കാര്യം പറഞ്ഞു. ഉടന് തന്നെ 'ടോം' ആ പുത്തന് ബിഎംഡബ്ല്യൂവിന്റെ താക്കോലും കൊടുത്തു. അമ്പതിനായിരം ഡോളര് ആണ് ഈ കാറിന്റെ വില. ഏതാണ്ട് 31 ലക്ഷം രൂപ.