നേപ്പാളിൽ കമ്മ്യൂണിസ്റ്റ് പാർട്ടിക്ക് വൻ പ്രഹരം; മുൻ പ്രധാനമന്ത്രിയെ നിലംപരിശാക്കി ബലേന്ദ്ര ഷാ

നേപ്പാൾ കമ്മ്യൂണിസ്റ്റ് പാർട്ടി നേതാവും മുൻ പ്രധാനമന്ത്രിയുമായ കെ പി ശർമ്മ ഒലിക്ക് തെരഞ്ഞെടുപ്പിൽ വൻ പരാജയം. ജെൻസി പ്രക്ഷോഭത്തിന്റെ മുൻനിര പോരാളിയും റാപ്പറുമായ ബലേന്ദ്ര ഷായാണ് കമ്മ്യൂണിസ്റ്റ് പാർട്ടിയുടെ അതികായനെ അമ്പതിനായിരത്തോളം വോട്ടുകൾക്ക് അട്ടിമറിച്ചത്. നേപ്പാളിലെ ജാപ്പ 5 മണ്ഡലത്തിൽ നടന്ന പോരാട്ടത്തിലാണ് രാഷ്ട്രീയ സ്വതന്ത്രതാ പാർട്ടിയുടെ യുവ നേതാവായ ബലേന്ദ്ര ഷാ ചരിത്ര വിജയം കുറിച്ചത്.

തിരിച്ചടിയായി ജെൻസി പ്രക്ഷോഭം

നേപ്പാളിനെ പിടിച്ചുകുലുക്കിയ ജെൻസി പ്രക്ഷോഭത്തിന് ശേഷമുള്ള ആദ്യ പൊതുതെരഞ്ഞെടുപ്പായിരുന്നു ഇത്. ഭരണകൂടത്തിന്റെ അഴിമതിക്കും തൊഴിലില്ലായ്മയ്ക്കും എതിരെ യുവാക്കൾ നടത്തിയ ഈ പ്രക്ഷോഭത്തെ സൈന്യത്തെ ഉപയോഗിച്ചാണ് ഒലി സർക്കാർ നേരിട്ടത്. പ്രക്ഷോഭത്തിനിടെ 77 പേർ കൊല്ലപ്പെട്ടത് ജനങ്ങൾക്കിടയിൽ വലിയ പ്രതിഷേധത്തിന് കാരണമായിരുന്നു. ഈ ജനരോഷമാണ് ഇപ്പോൾ ബാലറ്റിലൂടെ പ്രതിഫലിച്ചിരിക്കുന്നത്. വിദേശശക്തികളുടെ ഇടപെടലാണ് പ്രക്ഷോഭത്തിന് പിന്നിലെന്ന് ഒലി ആരോപിച്ചെങ്കിലും ജനങ്ങൾ അത് മുഖവിലയ്ക്കെടുത്തില്ലെന്ന് ഫലങ്ങൾ വ്യക്തമാക്കുന്നു.

വോട്ട് നില ഇങ്ങനെ

അതീവ നിർണ്ണായകമായ ജാപ്പ 5 മണ്ഡലത്തിൽ ബലേന്ദ്ര ഷാ 68,348 വോട്ടുകൾ നേടിയപ്പോൾ, നേപ്പാൾ കമ്മ്യൂണിസ്റ്റ് പാർട്ടി ചെയർമാനായ കെ പി ശർമ്മ ഒലിക്ക് കേവലം 18,734 വോട്ടുകൾ മാത്രമാണ് നേടാനായത്. 49,614 വോട്ടുകളുടെ കൂറ്റൻ ഭൂരിപക്ഷത്തിലാണ് ഷാ വിജയിച്ചത്. 2022-ൽ ഇതേ മണ്ഡലത്തിൽ 28,000 വോട്ടുകളുടെ ഭൂരിപക്ഷത്തിൽ വിജയിച്ച ഒലിക്കാണ് ഇത്തവണ ദയനീയ പരാജയം ഏറ്റുവാങ്ങേണ്ടി വന്നത്.

സിവിൽ എൻജിനീയറിങ് ബിരുദധാരിയായ ബലേന്ദ്ര ഷാ 2012-ൽ ഒരു റാപ്പറായാണ് പൊതുരംഗത്ത് ശ്രദ്ധിക്കപ്പെടുന്നത്. പിന്നീട് 2022-ൽ കാഠ്മണ്ഡു മേയറായി തെരഞ്ഞെടുക്കപ്പെട്ടതോടെയാണ് അദ്ദേഹം ദേശീയ രാഷ്ട്രീയത്തിൽ ശ്രദ്ധാകേന്ദ്രമായത്. ദേശീയ രാഷ്ട്രീയത്തിലേക്ക് ചുവടുവെക്കുന്നതിന്റെ ഭാഗമായി മേയർ സ്ഥാനം രാജിവെക്കുകയും രാഷ്ട്രീയ സ്വതന്ത്രതാ പാർട്ടിയിൽ ചേരുകയും ചെയ്തു. യുവാക്കളുടെയും മാറ്റം ആഗ്രഹിക്കുന്നവരുടെയും വലിയ പിന്തുണയാണ് അദ്ദേഹത്തിനുള്ളത്.

മാർച്ച് 5-ന് നടന്ന വോട്ടെടുപ്പിൽ കമ്മ്യൂണിസ്റ്റ് പാർട്ടികൾക്ക് നേപ്പാളിലുടനീളം വലിയ തിരിച്ചടിയാണ് നേരിടുന്നത്. 275 അംഗങ്ങളുള്ള പ്രതിനിധി സഭയിലേക്ക് നടന്ന തെരഞ്ഞെടുപ്പിൽ ഈ ഫലം പുതിയ രാഷ്ട്രീയ സമവാക്യങ്ങൾക്ക് വഴിമാറുമെന്നുറപ്പാണ്. അഴിമതിക്കെതിരായ യുവാക്കളുടെ പോരാട്ടത്തിന്റെ വിജയമായാണ് രാഷ്ട്രീയ നിരീക്ഷകർ ബലേന്ദ്ര ഷായുടെ ഈ അട്ടിമറിയെ വിലയിരുത്തുന്നത്.