നേതാക്കളെ വധിക്കുമെന്ന് ബരാക് ഒബാമയുടെ മുന്നറിയിപ്പ്!!

വാഷിംഗ്ടണ്‍: ഐസിസ് തീവ്രവാദികള്‍ക്ക് അമേരിക്കന്‍ പ്രസിഡന്റ് ബരാക് ഒബാമയുടെ മുന്നറിയിപ്പ്. ഐസിസ് നേതാക്കളെ വധിക്കുമെന്നുള്ള ഭീഷണിയാണ് ബരാക് ഒബാമയുടെ ഭാഗത്തുനിന്ന് ഉണ്ടായിരിക്കുന്നത്. ഐസിസിനെ ഇല്ലാതാക്കാന്‍ അമേരിക്ക ശക്തമായ പോരാട്ടം നടത്തുമെന്നാണ് അദ്ദേഹം വ്യക്തമാക്കിയത്.

കാലിഫോര്‍ണിയയില്‍ ഐസിസ് നടത്തിയ ആക്രമണത്തിന്റെ പശ്ചാത്തലത്തിലാണ് ഒബാമ ആഞ്ഞടിച്ചത്. ഇതിനോടകം ഒട്ടേറെ വ്യോമാക്രമണങ്ങള്‍ അമേരിക്ക ഐസിസ് താവളത്തില്‍ നടത്തി കഴിഞ്ഞു. ഇതിലും വലിയ തിരിച്ചടി ഐസിസ് കാണാനിരിക്കുന്നതേയുള്ളൂവെന്നും ഒബാമ പറയുകയുണ്ടായി. ഇറാഖിലും സിറിയയിലും ഭീകരാക്രമണങ്ങള്‍ അഴിച്ചുവിടുന്ന ഐസിസ് ശക്തമായ തിരിച്ചടി നേരിടേണ്ടി വരുമെന്നും അദ്ദേഹം പറഞ്ഞു.

അമേരിക്കയുടെ ആക്രമണങ്ങളില്‍ ഐസിസിന്റെ സാമ്പത്തിക സ്രോതസ്സായ എണ്ണപ്പാടങ്ങള്‍ തകര്‍ന്നടിഞ്ഞിട്ടുണ്ട്. ഒട്ടേറെ തീവ്രവാദി നേതാക്കള്‍ ആക്രമണങ്ങളില്‍ കൊല്ലപ്പെട്ടതായി റിപ്പോര്‍ട്ടുണ്ടായിരുന്നു. ഐസിസ് ആക്രമണങ്ങള്‍ തുടര്‍ന്നാല്‍ ഇനിയും നേതാക്കള്‍ വധിക്കപ്പെടുമെന്നാണ് ഒബാമ അറിയിച്ചത്.

ഐസിസിനെതിരായ പോരാട്ടങ്ങള്‍ നടത്താന്‍ മറ്റ് രാജ്യങ്ങളുടെ പിന്തുണ തേടുമെന്നും ഒബാമ അറിയിച്ചു. പിശാചിന്റെ പ്രതിരൂപം എന്നാണ് ഒബാമ ഐസിസിനെ വിശേഷിപ്പിച്ചത്. ഇവരെ തകര്‍ക്കാന്‍ ലോകരാജ്യങ്ങള്‍ ഒന്നിക്കണമെന്നും ഒബാമ വ്യക്തമാക്കി.

English summary

Barack Obama sought to reassert himself as commander-in-chief, standing with military top brass at the Pentagon and warning leaders of Islamic State.