വിവാഹ ഗൗണ്‍ ; നീളം 4100 മീറ്റര്‍

ചൈന : ജീവിതത്തിലെ സുപ്രധാന ദിനങ്ങളില്‍ അണിയുന്ന വസ്ത്രങ്ങള്‍ക്ക് പുതുമ ആഗ്രഹിക്കാത്തവരുണ്ടോ ? വിവാഹദിനമാണെങ്കില്‍ പിന്നെ പറയുകയേ വേണ്ട. അണിഞ്ഞൊരുങ്ങി നില്‍ക്കുന്ന വധു തന്നെയായിരിക്കും എല്ലാവരുടെയും ശ്രദ്ധാകേന്ദ്രം. 4100 മീറ്റര്‍ നീളമുളള വിവാഹ ഗൗണ്‍ അണിഞ്ഞെത്തുന്ന വധുവിനെ ഒന്നു സങ്കല്പിക്കാമോ ? എന്നാല്‍ അത്തരമൊരു ഗൗണ്‍ ഒരുക്കി ലോകത്തെ അമ്പരപ്പിച്ചിരിക്കുകയാണ് ചൈന.

4100 മീറ്ററാണ് ഈ വിവാഹ ഗൗണിന്റെ നീളം. എന്തിനാണ് ഇത്രയും നീളമുളള വസ്ത്രമൊരുക്കി കാശ് പാഴാക്കുന്നതെന്ന് ചോദിക്കല്ലേ. സംശയം വേണ്ട ലക്ഷ്യം ഗിന്നസ് ബുക്ക് തന്നെ. നിലവില്‍ ഗിന്നസ് ബുക്കിലുളള വിവാഹ വസ്ത്രത്തെക്കാള്‍ 1123 മീറ്റര്‍ നീളം ഈ ഗൗണിന് കൂടുതലുണ്ട്. വിലയെത്രയെന്നാവും അടുത്ത ചോദ്യം. ഞെട്ടണ്ട 40,000 പൗണ്ട്.

ഒരു മാസം പണിപ്പെട്ടാണ് ഷിയാങ് ഷുന്‍ഷഗുവിലെ വസ്ത്രനിര്‍മ്മാതാക്കള്‍ ഇത് നിര്‍മ്മിച്ചത്. നിലത്തിഴയുന്ന ഭാഗം പട്ടുതുണിയിലാണ് തയ്യാറാക്കിയിരിക്കുന്നത്. ഒന്നരമീറ്ററാണ് ഈ പ്രത്യേക വസ്ത്രത്തിന്റെ വീതി.

English summary

4100-meter-long bridal gown has been created in China in a bid to set a new Guinness World Record. it costs around 40,000 pounds.The creators spent a month to create this wedding masterpiece