റഷ്യയ്ക്കെതിരെ കടുത്ത സാമ്പത്തിക ഉപരോധവുമായി ബ്രിട്ടൺ; അധിനിവേശത്തെ ന്യായീകരിച്ച് റഷ്യ

Updated: Friday, February 25, 2022, 11:04 [IST]

ദില്ലി; റഷ്യയ്ക്കെതിരെ കടുത്ത സാമ്പത്തിക ഉപരോധം ഏർപ്പെടുത്തുമെന്ന് ബ്രിട്ടൻ പ്രധാനമന്ത്രി ബോറിസ് ജോൺൺ. അന്താരാഷ്ട്ര തലത്തിൽ സാമ്പത്തിക ഇടപാടുകൾക്ക് ആയി ഉപയോഗിക്കുന്ന സ്വിഫ്റ്റ് പേയ്‌മെന്റ് സംവിധാനങ്ങളിൽ നിന്ന് റഷ്യയെ ഒഴിവാക്കുന്നതുൾപ്പെടെയുള്ള നടപടികളിലേക്ക് കടക്കുമെന്നാണ് ഇന്ന് ബ്രിട്ടീഷ് പാർലമെന്റിൽ പ്രധാനമന്ത്രി ബോറിസ് ജോൺസൺ അറിയിച്ചത്.

സ്വിഫ്റ്റ് ഇന്റർനാഷണൽ പേയ്‌മെന്റ് സംവിധാനങ്ങൾ, എല്ലാ പ്രധാന റഷ്യൻ ബാങ്കുകളുടെയും ആസ്തി മരവിപ്പിക്കൽ, യുകെ ബാങ്കുകളിൽ റഷ്യൻ പൗരന്മാരുടെ കൈവശമുള്ള പണം പരിമിതപ്പെടുത്തൽ തുടങ്ങിയ നടപടികൾ കൈക്കൊള്ളുമെന്ന് ബോറിസ് ജോൺസൺ പറഞ്ഞു.

ന്താരാഷ്ട്ര തലത്തിൽ സാമ്പത്തിക ഇടപാടുകൾക്ക് ആയി ഉപയോഗിക്കുന്ന സ്വിഫ്റ്റ് പേയ്‌മെന്റ് സംവിധാനങ്ങളിൽ നിന്ന് റഷ്യയെ ഒഴിവാക്കണമെന്ന് ബോറിസ് ജോൺസൺ യൂറോപ്യൻ നേതാക്കളോട് അഭ്യർത്ഥിച്ചു.ജർമ്മൻ ചാൻസലർ ഒലാഫ് ഷോൾസുമായുള്ള ഫോൺ സംഭാഷണത്തിലും ജി 7 നേതാക്കളുടെ യോഗത്തിലും ബോറിസ് ജോൺസൺ ഇക്കാര്യം ആവർത്തിച്ചു. അതേസമയം യൂറോപ്യൻ യൂണിയൻ രാജ്യങ്ങൾ ഈ നീക്കത്തെ എതിർത്തേക്കുമെന്നാണ് വിലയിരുത്തപ്പെടുന്നത്.

പ്രധാന റഷ്യൻ കമ്പനികളെ യുകെ വിപണികളിൽ ധനസമാഹരണം നടത്തുന്നതിൽ നിന്ന് നിരോധിക്കുന്നതിന് നിയമനിർമ്മാണം കൊണ്ടുവരുമെന്നും ബോറിസ് ജോൺസൺ പറഞ്ഞു.

യുകെ ഉടനടി സ്വീകരിക്കുന്ന 10 നടപടികൾ പ്രധാനമന്ത്രി പ്രഖ്യാപിച്ചു. 154 പൗണ്ട് ബില്യൺ ആസ്തിയുള്ള രാജ്യത്തെ രണ്ടാമത്തെ വലിയ ബാങ്കായ വിടിബി ഉൾപ്പെടെ എല്ലാ പ്രധാന റഷ്യൻ ബാങ്കുകളുടെയും ആസ്തികൾ യുകെ മരവിപ്പിക്കും.പ്രതിവർഷം 10 ബില്യൺ പൗണ്ട് ആയുധങ്ങൾ കയറ്റുമതി ചെയ്യുന്ന രാജ്യത്തെ ഏറ്റവും വലിയ പ്രതിരോധ കമ്പനിയായ റോസ്‌ടെക് ഉൾപ്പെടെ 100-ലധികം വ്യക്തികൾക്കും സ്ഥാപനങ്ങൾക്കും അനുബന്ധ സ്ഥാപനങ്ങൾക്കും മറ്റ് നാല് പ്രതിരോധ കമ്പനികൾക്കും വ്യക്തിഗത ഉപരോധം ഏർപ്പെടുത്തും.'

റഷ്യയിലെ ഏറ്റവും പ്രായം കുറഞ്ഞ ശതകോടീശ്വരൻ പുടിന്റെ മുൻ മരുമകൻ കിറിൽ ഷമലോവ് ഉൾപ്പെടെയുള്ളവർക്കെതിരേയും ഉപരോധം ഏർപ്പെടുത്തും. വിമാനക്കമ്പനിയായ എയ്‌റോഫ്ലോട്ടിന് യുകെയിൽ ഇറങ്ങുന്നതിന് വിലക്കേർപ്പെടുത്തും.റഷ്യയിലേക്കുള്ള എല്ലാ ഇരട്ട ഉപയോഗ കയറ്റുമതി ലൈസൻസുകളും യുകെ താൽക്കാലികമായി നിർത്തുകയും നിരോധിക്കുകയും ചെയ്യും.റോൾസ് റോയ്സ് ജെറ്റ് എഞ്ചിനുകൾ, ഓയിൽ റിഫൈനറി ഉപകരണങ്ങൾ എന്നിവയുൾപ്പെടെ റഷ്യയിലേക്കുള്ള ഹൈടെക് കയറ്റുമതിയുടെ വിപുലമായ ശ്രേണി നിരോധിക്കുന്നതിനുള്ള നിയമനിർമ്മാണവും ഉണ്ടാകും.

എല്ലാ റഷ്യൻ പൗരന്മാർക്കും യുകെ ബാങ്ക് അക്കൗണ്ടുകളിൽ കൈവശം വയ്ക്കാവുന്ന നിക്ഷേപങ്ങൾ പരിമിതപ്പെടുത്തുന്നതിനുള്ള പുതിയ നിയമനിർമ്മാണത്തെക്കുറിച്ച് വരും ദിവസങ്ങളിൽ കൂടുതൽ വിശദമായി ആലോചിക്കുമെന്നും ബോറിസ് പ്രതികരിച്ചു.