ഓണ്ലൈന് കാസിനോ; ഇരുട്ടിവെളുക്കും മുന്പ് 129 കോടിയുടെ അധിപനായി ഒരു സൈനികന്
ലണ്ടന്: കണ്ണടച്ചു തുറക്കുംമുന്പ് 100 കോടിരൂപയിലധികം ലഭിച്ചാല് എങ്ങിനെയയിരിക്കും ഒരു സാധാരണക്കാരന് പ്രതികരിക്കുക. ബ്രിട്ടനിലെ ഒരു സൈനികനെയാണ് ഇത്തരത്തിലൊരു അപൂര്വമായ ഭാഗ്യം തേടിയെത്തിയത്. ഒരു ഓണ്ലൈന് കാസിനോ ഗെയിമില് ഭാഗ്യം പരീക്ഷിച്ച ഹെവുഡ് എന്ന ചീഷെയര് സ്വദേശിക്ക് ലഭിക്കുന്നത് 13.2 മില്യണ് പൗണ്ട് ആണ് (ഏകദേശം 129 കോടി രൂപ).
ഇരുപത്തിയാറുകാരനായ ഹെവുഡിനെ ഭാഗ്യം തേടിയെത്തിയിരിക്കുന്നത് ജീവത്തില് പ്രതിസന്ധി നേരിടുന്ന ഘട്ടത്തിലാണ്. അടുത്തിടെയാണ് യുവാവിന്റെ അമ്മൂമ്മ മരണപ്പെട്ടത്. പിതാവ് ഗുരുതരമായ രോഗത്തിനടിമയായി ചികിത്സയിലാണ്. ഹൃദയവും ശ്വാസകോശവും മാറ്റിവെക്കേണ്ട അവസ്ഥയിലാണ് ഹെവുഡിന്റെ പിതാവ്.
ലഭിച്ച കോടികള് കൊണ്ട് എന്താണ് ചെയ്യുകയെന്നത് തീരുമാനിച്ചിട്ടില്ലെന്ന് അദ്ദേഹം പറഞ്ഞു. പ്രഥമ പരിഗണന പിതാവിന്റെ ചികിത്സയിലാണ്. എത്ര തുക ചെലവഴിച്ചും പിതാവിനെ ജീവിതത്തിലേക്ക് മടക്കിക്കൊണ്ടുവരണം. കൂടാതെ, ബന്ധുക്കളെയെല്ലാം കൂട്ടി മെഡിറ്ററേനിയന് ആഡംബര കപ്പലില് ഒരു യാത്ര പോകണം. പിന്നീട് ഒരു ബെന്റ്ലി കാറും വാങ്ങണം. അതിനപ്പുറം താന് ചിന്തിച്ചിട്ടില്ലെന്ന് ഹെവുഡ് പറഞ്ഞു.
ഒക്ടോബര് ആറിനാണ് ബെറ്റ്വെ(betway.com) എന്ന സൈറ്റില് ഓണ്ലൈന് മൈക്രോഗെമിങ് ആയ മെഗാ മൂലാഹ് കളിച്ചത്. കളിക്കുശേഷം ഭാഗ്യം ലഭിക്കുമോ എന്നൊന്നും അറിയാതെ മറ്റു ജോലികള് ഏര്പ്പെടുകയും ചെയ്തു. എന്നാല് അപ്രതീക്ഷിതമായി യുവാവിന് ജാക്പോട്ട് അടിക്കുകയായിരുന്നു. ഒരു ഓണ്ലൈന് ഗെയിമിങ്ങിലൂടെ ലഭിക്കുന്ന ഏറ്റവും വലിയ തുകയാണ് ഇതെന്ന് ബെറ്റ്വെ അധികൃതര് പറഞ്ഞു. യൂറോയില് നിന്നും പൗണ്ടിലേക്ക് മാറ്റുമ്പോഴുള്ള മികച്ച റേറ്റും യുവാവിന് തുണയായി.