ഭാര്യയ്ക്ക് മരുന്ന് വാങ്ങാന്‍ ശന്പളം ചോദിച്ച തൊഴിലാളിയെ മുതലാളി നായ്ക്കളെ കൊണ്ട് കടിപ്പിച്ചു

ഫൈസലാബാദ്: പാകിസ്താനില്‍ ശമ്പളം ചോദിച്ച തൊഴിലാളിയെ മുതലാളി വളര്‍ത്ത് നായ്ക്കളെ കൊണ്ട് കടിപ്പിച്ചു. ചില സിനിമകളില്‍ മാത്രം കണ്ട് ശീലിച്ച ഏറെ ക്രൂരമായ രംഗങ്ങള്‍ക്കാണ് അബ്ബാസ്പുരയിലെ നാട്ടുകാര്‍ സാക്ഷികളായത്.മസ്ഹര്‍ ഇക്ബാല്‍ എന്ന തൊഴിലാളിയ്ക്കാണ് പട്ടികളുടെ കടിയേറ്റ് ഗുരുതരമായി പരിക്കേറ്റത്.

അഞ്ച് വര്‍ഷത്തോളമായ മുഹമ്മദ് യൂസുഫ് എന്നയാളുടെ വയലിലെ പണിക്കാരനാണ് ഇക്ബാല്‍. ഏറെ ദാരിദ്ര്യത്തിലാണ് ഇക്ബാലും കുടുംബവും താമസിയ്ക്കുന്നത്. ഭാര്യയ്ക്ക് രോഗം പിടിപെട്ടതോടെ കുടുംബത്തിന്റെ സ്ഥിതി ഏറെ ദയനീയമായി. തുടര്‍ന്നാണ് യൂസുഫിനോട് ശമ്പളം ചോദിയ്ക്കാന്‍ ഇക്ബാല്‍ തീരുമാനിച്ചത്.

യൂസുഫിനോട് ശമ്പളം ചോദിയ്ക്കാന്‍ ഇക്ബാല്‍ എത്തുകയും ചെയ്തു. എന്നാല്‍ തൊഴിലാളി തന്നോട് ശമ്പളം ചോദിച്ചത് മുതലാളിയ്ക്ക് അത്ര പിടിച്ചില്ല. മകനോട് വളര്‍ത്ത് നായ്ക്കളെ അഴിച്ച് വിടാന്‍ പറഞ്ഞു. നിമിഷങ്ങള്‍ക്കുള്ളില്‍ പാഞ്ഞെത്തിയ വളര്‍ത്തുനായ്ക്കള്‍ ഇക്ബാലിനെ കടിച്ച് അവശനാക്കി.

ഈ രംഗങ്ങള്‍ കണ്ട് യൂസുഫും മകനും ആര്‍ത്ത് ചിരിയ്ക്കുകയായിരുന്നു. ഓടിക്കൂടിയ നാട്ടുകാരാണ് പട്ടികളില്‍ നിന്നും ഇക്ബാലിനെ രക്ഷിച്ച് ആശുപത്രിയിലാക്കിയത്. ഇത്രയും ക്രൂരമായി തൊഴിലാളിയോട് പെരുമാറിയിട്ടും യൂസുഫിനേയോ മകനെയോ പൊലീസ് ഇതുവരേയും അറസ്റ്റ് ചെയ്തിട്ടില്ല.

English summary

Brutal attack: Landlord sets dogs onto labourer for asking for wages