കല്യാണത്തിന് വധുവിന് പണം നല്‍കുന്ന ഏര്‍പ്പാട് നിരുത്സാഹപ്പെടുത്താന്‍ ചൈന; ഇല്ലെങ്കില്‍ പണികിട്ടും

ചൈനയിൽ ഈ പ്രശ്നം ഇപ്പോൾ വളരെ പ്രകടമാണ്, അത് തുടരാൻ അനുവദിക്കുകയും പുരുഷന്മാർക്ക് വിവാഹം കഴിക്കാനുള്ള സാമ്പത്തിക ശേഷി ഇല്ലാതിരിക്കുകയും ചെയ്താൽ കാര്യങ്ങൾ വഷളാവും

Updated: Sunday, March 5, 2023, 14:07 [IST]

വിവാഹസമയത്ത് വധുവിന്റെ വീട്ടുകാർക്ക് വരന്റെ വീട്ടുകാർ നൽകുന്ന പണം നിർത്തലാക്കാൻ നീക്കങ്ങളുമായി ചൈന. ഈ രീതി കാരണം ആകെ വലഞ്ഞിരിക്കുകയാണ് രാജ്യം തന്നെ. ഒടുവിൽ എങ്ങനെയെങ്കിലും ഇത് അവസാനിപ്പിച്ചാലെ കാര്യങ്ങൾ ട്രാക്കിലാവും എന്ന സ്ഥിതിയിലായി... വളരെ വേഗത്തി ജനസംഖ്യ കുറയുന്നതാണ് ചൈനയെ ആശങ്കയിലാക്കുന്നത്, വധുവിന് നൽകുന്ന ധനം നിർത്തിയാൽ ഈ പ്രശ്‌നം പരിഹരിക്കപ്പെടുമെന്ന് ചൈന കരുതുന്നു. അത് എങ്ങനെയാണെന്നല്ല...

അടുത്തിടെ നടന്ന ഒരു സർവേ പ്രകാരം 30 വയസ്സിനു മുകളിലുള്ള അവിവാഹിതരായ യുവാക്കൾ ചൈനയിൽ കൂടിവരുന്നതായാണ്പുറത്തുവരുന്ന വിവരം. നഗരങ്ങളിലെ അനേകം യുവാക്കളും യുവതികളും അവിവാഹിതരായിരിക്കാൻ തിരഞ്ഞെടുക്കുന്നു, അതേസമയം ഗ്രാമപ്രദേശങ്ങളിലെ നിരവധി യുവാക്കൾ വിവാഹ വിപണിയിൽ നിന്ന് ഒഴിവാക്കപ്പെടുന്നുവെന്ന് ചൈനീസ് മൈക്രോബ്ലോഗിംഗ് വെബ്സൈറ്റായ സിന വെയ്ബോ റിപ്പോർട്ട് ചെയ്തു

ആറ് പതിറ്റാണ്ടിലേറെയായി 2022-ൽ ചൈനയുടെ ജനസംഖ്യ ആദ്യമായി ചുരുങ്ങുകയാണ്, ഇത് രാജ്യത്തിന്റെ മന്ദഗതിയിലുള്ള സമ്പദ്‌വ്യവസ്ഥയ്ക്ക് കാര്യമായ പ്രത്യാഘാതങ്ങളുള്ള ഗുരുതരമായ ജനസംഖ്യാപരമായ പ്രതിസന്ധിയാണ്, സിഎൻഎൻ ബിസിനസ് റിപ്പോർട്ട് ചെയ്തു. കഴിഞ്ഞ മാസം ജനുവരി അവസാനം നടത്തിയ സർവേ പ്രകാരം 30 വയസ്സിനു മുകളിലുള്ള അവിവാഹിതരായ യുവാക്കൾ പുരുഷന്മാരിലും സ്ത്രീകളിലും ഏറെയാണ്.

പൊതു സാംസ്കാരിക-ധാർമ്മിക മാനദണ്ഡങ്ങളുടെ നിർമ്മാണം ശക്തിപ്പെടുത്തുന്നതിനുള്ള രാജ്യവ്യാപകമായ ശ്രമങ്ങളുടെ ഭാഗമായി അമിതമായ "വധുവില", അതിരുകടന്ന വിവാഹ ചടങ്ങുകൾ എന്നിവയുൾപ്പെടെയുള്ള പ്രശ്നങ്ങൾക്കെതിരെ ഒരു പ്രത്യേക കാമ്പെയ്‌ൻ ആരംഭിക്കുമെന്ന് പ്രതിജ്ഞയെടുത്തുകൊണ്ട് ചൈന അതിന്റെ പ്രധാന നയരേഖ, അല്ലെങ്കിൽ 2023 ലെ നമ്പർ 1 കേന്ദ്ര രേഖ അടുത്തിടെ പുറത്തിറക്കി.

ഗ്രാമപ്രദേശങ്ങളിലോ താഴ്ന്ന വരുമാനമുള്ള കുടുംബങ്ങളിലോ ഉള്ള ചില കുടുംബങ്ങൾ തങ്ങളുടെ സമ്പാദ്യങ്ങൾ മുഴുവനും ഇറക്കി ആൺമക്കളുടെ വിവാഹം നടത്തേണ്ട അവസ്ഥവരുന്നു. ചില യുവദമ്പതികൾ വളരെ ബന്ധത്തിലാണെങ്കിലും വിവാഹനിശ്ചയച്ചെലവിന്റെ പേരിൽ പിണങ്ങേണ്ടി വരുന്നു, ചിലർ ഈ ഒരു കാരണം കൊണ്ട് ബന്ധം തന്നെ ഉപേക്ഷിച്ചതായും വിവരം ഉണ്ട്.

ചൈനയിൽ ഈ പ്രശ്നം ഇപ്പോൾ വളരെ പ്രകടമാണ്, അത് തുടരാൻ അനുവദിക്കുകയും പുരുഷന്മാർക്ക് വിവാഹം കഴിക്കാനുള്ള സാമ്പത്തിക ശേഷി ഇല്ലാതിരിക്കുകയും ചെയ്താൽ കാര്യങ്ങൾ വഷളാവും എന്ന് ഗവൺമെന്റ് ആശങ്കയാലാണ്, അത് ഇതിനകം കുറഞ്ഞുവരുന്ന ജനസംഖ്യയെ പ്രതികൂലമായി ബാധിച്ചേക്കാം എന്നും റിപ്പോർട്ടുകൾ വ്യക്തമാക്കുന്നു.