ചൈനയില്‍ പര്‍ദ്ദ നിരോധിച്ചു

ബീജിങ്: ചൈന കമ്യൂണിസ്റ്റ് രാഷ്ട്രമാണെന്നാണ് അവകാശപ്പെടുന്നത്. കമ്യൂണിസ്റ്റുകള്‍ക്ക് മതവിശ്വാസമില്ലല്ലോ. അപ്പോള്‍ പിന്നെ മതവിശ്വാസികളുടെ താത്പര്യങ്ങള്‍ അവര്‍ അംഗീകരിച്ചോളണം എന്നും ഇല്ല.

മുസ്ലീം സ്ത്രീകള്‍ പര്‍ദ്ദ ധരിക്കുന്നത് നിരോധിച്ചു എന്ന വാര്‍ത്തയാണ് ചൈനയില്‍ നിന്ന് വരുന്നത്. എന്നാല്‍ ചൈനയില്‍ മൊത്തം ഈ നിരോധനം ഇല്ല. ചിന്‍ജിയാങ് പ്രവിശ്യയില്‍ മാത്രമാണ് നിരോധനം.

ഇസ്ലാമിക മതമൗലികവാദം ശക്തി പ്രാപിച്ചുകൊണ്ടിരിക്കുന്ന പ്രദേശമാണ് ചിന്‍ജിയാങ് പ്രവിശ്യ. കഴിഞ്ഞ മാസം തന്നെ പാര്‍ട്ടി നേതൃത്വം പര്‍ദ്ദക്ക് വിലക്കേര്‍പ്പെടുത്തുന്നത് സംബന്ധിച്ച് തീരുമാനത്തില്‍ എത്തിയിരുന്നു എന്നാണ് റിപ്പോര്‍ട്ടുകള്‍.

മധ്യേഷ്യയിലെ ഇസ്ലാമിക രാഷ്ട്രങ്ങളുമായി അതിര്‍ത്തി പങ്കിടുന്ന ചൈനീസ് പ്രദേശമാണ് ചിന്‍ജിയാങ്. അതുകൊണ്ട് തന്നെയാണ് ഇവിടെ ഇസ്ലാമിക തീവ്രവാദ പ്രവര്‍ത്തനങ്ങള്‍ ശക്തമാകുന്നതെന്നാണ് ചൈനയുടെ വിലയിരുത്തല്‍. മേഖലയില്‍ സുരക്ഷാ സൈനികരും തീവ്രവാദികളും തമ്മില്‍ സംഘര്‍ഷം പതിവാണ്.

തീവ്രവാദം വളരുന്നത് തടയാനാണ് പര്‍ദ്ദക്ക് വിലക്കേര്‍പ്പെടുത്തിയിരിക്കുന്നതെന്നാണ് ഔദ്യോഗിക വിശദീകരണം. ഉഗ്വര്‍ മേഖലയില്‍ തീവ്രവാദത്തിന്റെ വളര്‍ച്ച സ്ത്രീകളുടെ വസ്ത്രധാരണ സ്വാതന്ത്ര്യത്തിന് പോലും തടസ്സമായിട്ടുണ്ടെന്നാണ് പറയുന്നത്. വര്‍ണ വസ്ത്രങ്ങള്‍ ധരിച്ചിരുന്ന സ്ത്രീകളെ കറുത്ത പര്‍ദ്ദമാത്രം ധരിക്കാന്‍ നിര്‍ബന്ധിതരാക്കിയത് മതമൗലിക വാദികളാണെന്ന് ഔദ്യോഗിക വാര്‍ത്താ ഏജന്‍സി റിപ്പോര്‍ട്ട് ചെയ്യുന്നുണ്ട്.

ബുര്‍ഖ എന്നത് മുസ്ലീം സ്ത്രീകളുടെ ഔദ്യോഗിക വസ്ത്രമൊന്നും അല്ലെന്നാണ് ചൈനയുടെ വിലയിരുത്തല്‍. ബെല്‍ജിയവും ഫ്രാന്‍സും ഒക്കെ നേരത്തെ തന്നെ പര്‍ദ്ദ നിരോധിച്ചിട്ടുണ്ട്.

English summary

China Xinjiang province bans burqa for Muslim women