സര്‍ക്കസില്‍ നിന്ന് 3പിടിയാനകള്‍ ഒളിച്ചോടി

ജെഫേഴ്‌സണ്‍ സിറ്റി: ഒളിച്ചോട്ടം എന്ന വാക്ക് കേള്‍ക്കുന്പോള്‍ ആദ്യം വിചാരിയ്ക്കുക പ്രണയത്തെത്തുടര്‍ന്നുള്ള ഒളിച്ചോട്ടമാകുമെന്നല്ലേ. എന്നാല്‍ അങ്ങനെ അല്ലാതെയും ചില ഒളിച്ചോട്ടങ്ങള്‍ നടക്കും. മൃഗങ്ങള്‍ക്കിടയില്‍. അത്തരമൊരു സംഭവം അമേരിയ്ക്കയില്‍ നടന്നു. അമേരിക്കയിലെ ഒരു സര്‍ക്കസ് കൂടാരത്തില്‍ നിന്നും മൂന്ന് പിടിയാനകള്‍ ഓടിപ്പോയി.

ഒട്ടേറെ നാശ നഷ്ടങ്ങള്‍ വരുത്തിയ ശേഷമാണ് ആനകളെ തിരിച്ച് പിടിയ്ക്കാനായത്. പാര്‍ക്ക് ചെയ്തിരുന്ന ഓട്ടേറെ വാഹനങ്ങള്‍ ആനകള്‍ തകര്‍ത്തു.മിസോറിയിലെ ഒരു സര്‍ക്കസ് കൂടാരത്തില്‍ നിന്ന് രക്ഷപ്പെട്ട ആനകളാണ് നഗരത്തില്‍ നാശം വിതച്ചത്. മൂലാഹ് ഷ്രൈന്‍ സര്‍ക്കസിലെ ആനകളാണ് ഓടിപ്പോയത്. ചില്‍ഡ്രന്‍സ് റൈഡ് സെക്ഷനിലുണ്ടായിരുന്ന ആനകളാണിവ.

യുഎസ് മാധ്യമങ്ങളാണ് സംഭവം റിപ്പോര്‍ട്ട് ചെയ്തത്. സര്‍ക്കസ് കൂടാരത്തില്‍ നിന്നും പുറത്തിറങ്ങിയതിന്റെ ആവേശത്തില്‍ ആനകള്‍ വരുത്തിയ നാശ നഷ്ടം ചില്ലറയല്ല. കടകളുടെ വാതിലുകള്‍ ഉള്‍പ്പടെ ഒട്ടേറെ സാധനങ്ങള്‍ മൂന്ന് ആനകളും ചേര്‍ന്ന് നശിപ്പിച്ചിരുന്നു. ആനകളെ പിടികൂടി തിരികെ ഉടമസ്ഥര്‍ക്ക് തന്നെ ഏല്‍പ്പിച്ചു. ഇപ്പോള്‍ എന്തായാലും നഗരം ചുറ്റി വന്ന ആനകള്‍ സര്‍ക്കസ് കൂടാരത്തിനുളളില്‍ വിശ്രമത്തിലാണ്.

English summary

Circus elephants escape, run riot