കൊക്കെയ്ന്‍ ഗുളിക കഴിപ്പിച്ച് മയക്കുമരുന്ന് കടത്ത്, 11 കാരിയെ അച്ഛന്‍ ചതിച്ചത് ഇങ്ങനെ

ബൊഗോട്ട: 11കാരിയായ മകളെ മയക്കുമരുന്ന് കടത്തിന് ഉപയോഗിച്ച പിതാവിനെ 14.5 വര്‍ഷം തടവ് ശിക്ഷ. കൊളംബിയക്കാരനായ ഡിയാഗോ മാന്ഡസില്ല ഓഗിലാര്‍ ആണ് മകളെ കൊക്കെയ്ന്‍ കടത്തിന് ഉപയോഗിച്ചത്. കൊക്കെയ്ന്‍ അടങ്ങിയ ഗുളികള്‍ പെണ്‍കുട്ടിയെക്കൊണ്ട് കഴിപ്പിച്ച ശേഷം കുട്ടിയേയും കൂട്ടി വിവിധ ഇടങ്ങളിലേയ്ക്ക് പോവുകയായിരുന്നു ഇയാളുടെ പതിവ്.

കഴിഞ്ഞ നവംബറിലാണ് ഡിയേഗോ പിടിയിലാകുന്നത്. 500 ഗ്രാം മുതല്‍ 600 ഗ്രാം വരെ കൊക്കെയ്ന്‍ അടങ്ങിയ ഗുളികകളാണ് ഇയാള്‍ മകളെക്കൊണ്ട് കഴിപ്പിച്ചത്. 104 ഗുളികകളാണ് ഇത്തരത്തില്‍ പെണ്‍കുട്ടിയുടെ വയറ്റില്‍ നിന്നും കണ്ടെടുത്തത്. അച്ഛനൊപ്പം യാത്ര ചെയ്ത ശേഷം തിരികെ അമ്മയുടെ വീട്ടിലെത്തിയത് മുതല്‍ പെണ്‍കുട്ടിയ്ക്ക് കഠിനമായ വയറുവേദനയായിരുന്നു.

തുടര്‍ന്ന് ആശുപത്രിയില്‍ പ്രവേശിപ്പിച്ചപ്പോഴാണ് വയറില്‍ നിന്നും കൊക്കെയ്ന്‍ ഗുളികകള്‍ കണ്ടെടുക്കുന്നത്. സ്‌പെയിന്‍ ഉള്‍പ്പടെയുള്ള സ്ഥലങ്ങളില്‍ കുട്ടിയുമായി അച്ഛന്‍ യാത്ര ചെയ്തിരുന്നു. കൊലപാതക ശ്രമം, മയക്കുമരുന്ന് കടത്തല്‍, ലഹരി കടത്തുന്നതിന് പ്രായപൂര്‍ത്തിയാകാത്തയാളെ ഉപയോഗിയ്ക്കുക എന്നിങ്ങനെ വിവിധ കുറ്റങ്ങള്‍ ചുമത്തിയാണ് ഇയാള്‍ക്ക് 14.5 വര്‍ഷം തടവ് ശിക്ഷ വിധിച്ചത്.

English summary

Colombian dad used daughter as drug mule .