മറഡോണ മാധ്യമ പ്രവര്ത്തകന്റെ കരണത്തടിച്ചു... വീഡിയോ കാണാം
ബ്യൂണസ് അയേഴ്സ്: ഫുട്ബോള് ഇതിഹാസം ഡീഗോ മറഡോണ വീണ്ടും വിവാദത്തില്. മാധ്യമ പ്രവര്ത്തകന്റെ കരണത്തടിച്ചതാണ് പുതിയ വിവാദം. ഇതിന്റെ വീഡിയോ ഇപ്പോള് സോഷ്യല് മീഡിയകളില് വൈറല് ആയിക്കൊണ്ടിരിക്കുകയാണ് .
ആഗസ്റ്റ് 10 ന് അര്ജന്റീനയിലെ ബ്യൂണസ് അയേഴ്സിലാണ് സംഭവം. തന്റെ മകനും അവന്റെ അമ്മക്കും ഒപ്പം ഒരു സിനിമ കണ്ടിറങ്ങുകയായിരുന്നു മറഡോണ. ചൊടിപ്പിക്കുന്ന ചോദ്യം ചോദിച്ച മാധ്യമ പ്രവര്ത്തകനെ ആദ്യം ശകാരിക്കുകയും പിന്നെ മര്ദ്ദിക്കുകയും ആയിരുന്നു.
മറഡോണ തന്റെ മുന് കാമുകി വെറോണിക്ക ഓജെഡക്കും മകന് ഡീഗോ ഫെര്ണാണ്ടോക്കും ഒപ്പമാണ് ബ്യൂണസ് അയേഴ്സില് എത്തിയത്. അവിടത്തെ ശിശുദിനാഘോഷങ്ങളില് പങ്കെടുക്കാനായിരുന്നു ഇത്. ഇതിനിടെയാണ് ഒഡേജയെപ്പറ്റി മാധ്യമ പ്രവര്ത്തകന്റെ ചോദ്യം.
'ഇഡിയറ്റ്' എന്ന് വിളിച്ച് ശകാരിച്ചായിരുന്നു മറഡോണ പ്രതികരിച്ചത്. ഉടന് തന്നെ മാധ്യമ പ്രവര്ത്തകന്റെ ചെവിടടച്ച് ഒരു അടിയും കൊടുത്തു. ഇതിന്റെ ദൃശ്യങ്ങള് ഉടന് തന്നെ അര്ജന്റീനയിലെ മാധ്യമങ്ങള് ഏറ്റെടുക്കുകയും ചെയ്തു.
എന്നും വിവാദങ്ങളുടെ കൂട്ടുകാരനാണ് ഡിഗോ മറഡോണ. 1986 ലോകകപ്പിലെ ദൈവത്തിന്റെ കൈകൊണ്ട് നേടി ഗോളില് തുടങ്ങുന്നു വിവാദങ്ങള്. പിന്നീട് മദ്യത്തിനും മയക്കുമരുന്നിനും അടിമയായ മറഡോണ 1994 ലെ ലോകകപ്പില് നിന്ന് പുറത്താക്കപ്പെട്ടു.
മാധ്യമ പ്രവര്ത്തകര്ക്ക് നേരെ മറഡേണ ആദ്യമായി നടത്തുന്ന ആക്രമണമല്ലത്രെ ഇത്. പണ്ട് വേറൊരു മാധ്യമ പ്രവര്ത്തകനെ എയര് ഗണ് കൊണ്ട് വെടിവക്കാന് നോക്കിയ സംഭവവും ഉണ്ടായിട്ടുണ്ട്.