ബെക്കാമും, ഭാര്യ വിക്ടോറിയയും 2015ല് നേടിയ വരുമാനം കേട്ടാല് ഞെട്ടും
ലണ്ടന്: ഫുട്ബോളില് തന്നേക്കാള് കേമന്മാരുണ്ടെങ്കിലും പരസ്യവരുമാനത്തിലൂടെയും ബിസിനസിലൂടെയും ഡേവിഡ് ബെക്കാം വര്ഷാവര്ഷം നേടുന്നത് കോടികളാണ്. ഫുട്ബോള് കളിക്കളം വിട്ടാല് വരുമാനത്തില് വന് ഇടിവുണ്ടാകുന്ന ഫുട്ബോളര്മാരില് നിന്നും തീര്ത്തും വ്യത്യസ്ഥനാണ് ബെക്കാം. ഗായികയും മോഡലുമായ ഭാര്യ വിക്ടോറിയ ബെക്കാമും വരുമാനത്തില് പിറകിലല്ല.
2015ല് മാത്രം ബെക്കാം ദമ്പതികള് നേടിയത് 65 മില്യണ് പൗണ്ടാണ്. അതായത്, 591 കോടി രൂപയോളം. 17 മില്യണ് പൗണ്ട് വരുമാനം ഡേവിഡ് ബെക്കാം ഫൂട്വര്ക്ക് എന്ന കമ്പനിയിലൂടെയാണ്. ഫുട്ബോള് ബൂട്ടുകള് ഉള്പ്പെടെ പാദരക്ഷകളും സ്പോര്ട്സ് വസ്ത്രങ്ങളുമെല്ലാം ബെക്കാം തന്റെ ബ്രാന്ഡില് പുറത്തിറക്കുന്നുണ്ട്.
ഫാഷന് ഡിസൈനര് കൂടിയായ വിക്ടോറിയയുടെ വിക്ടോറിയ ഫാഷന് ബ്രാന്ഡ് വഴിയാണ് ഏറ്റവും കൂടുതല് വരുമാനം. 34.1 മില്യണ് പൗണ്ടാണ് ഈവഴി ഇവര് നേടിയത്. മോഡലിങ്ങിലൂടെയും മറ്റും വേറെയും സെലിബ്രിറ്റി ദമ്പതികള് വരുമാനമുണ്ടാക്കി. നിലവില് ഫുട്ബോള് കളിച്ചുകൊണ്ടിരിക്കുന്ന കളിക്കാരനുപോലും ലഭിക്കാത്തത്രയും തുകയാണ് വര്ഷങ്ങള്ക്ക് മുന്പ് വിരമിച്ച ബെക്കാമിന് മോഡലിങ്ങിലൂടെ ലഭിക്കുന്നത്.
ബെക്കാമിന്റെ ജനപ്രിയത തന്നെയാണ് ബ്രാന്ഡുകള് പിറകെ കൂടാന് കാരണം. കോടികള് വര്ഷാവര്ഷം വരുമാനമുണ്ടാക്കുന്നുണ്ടെങ്കിലും അതില് വലിയൊരു പങ്ക് ചാരിറ്റിക്കുവേണ്ടി ചെലവഴിക്കാനും ബെക്കാം മടികാണിക്കാറില്ല. പാവങ്ങളെയും തെരുവില് ജീവിക്കുന്നവരെയുമൊക്കെ സംരക്ഷിക്കാന് ബെക്കാം നേരിട്ട് മുന്നിട്ടിറങ്ങുന്നത് പതിവ് കാഴ്ചയാണ്.