എല്ലാ വിദേശ സഹായങ്ങളും മരവിപ്പിച്ച് ട്രംപ് ഭരണകൂടം; ഈ രണ്ട് രാജ്യങ്ങള്ക്ക് മാത്രം ഇളവ്
വാഷിംഗ്ടണ്: പ്രസിഡന്റായി അധികാരമേറ്റതിന് പിന്നാലെ വിദേശരാജ്യങ്ങള്ക്ക് യുഎസ് നല്കിയിരുന്ന എല്ലാ സഹായങ്ങളും മരവിപ്പിച്ച് ഡൊണാള്ഡ് ട്രംപ്. യുദ്ധക്കെടുതി നേരിടുന്ന ഉക്രെയ്ന് അടക്കമുള്ള രാജ്യങ്ങള്ക്ക് നല്കിയിരുന്ന സഹായങ്ങളാണ് ട്രംപ് ഭരണകൂടം മരവിപ്പിച്ചിരിക്കുന്നത്. എന്നാല് ഈ നടപടിയില് നിന്ന് ഇസ്രയേലിനും ഈജിപ്തിനും ട്രംപ് ഇളവ് നല്കുകയും ചെയ്തിട്ടുണ്ട്.
ലോകത്തിലെ ഏറ്റവും വലിയ ദാതാവായ അമേരിക്ക, ഇസ്രായേലിനും ഈജിപ്തിനുമുള്ള അടിയന്തര ഭക്ഷണവും സൈനിക ധനസഹായവും മരവിപ്പിച്ചിട്ടില്ലെന്ന് വാര്ത്താ ഏജന്സിയായ എഎഫ്പി റിപ്പോര്ട്ട് ചെയ്യുന്നു. വിദേശ സഹായം കര്ശനമായി നിയന്ത്രിക്കുന്ന 'അമേരിക്ക ഫസ്റ്റ്' നയമാണ് ട്രംപ് പിന്തുടരുന്നത്. ഇതിന്റെ ഭാഗമായാണ് ഈ നടപടിയും. റഷ്യന് അധിനിവേശത്തിനെതിരെ പോരാടുന്ന ഉക്രെയ്നിന് മുന് പ്രസിഡന്റ് ജോ ബൈഡന്റെ കീഴില് കോടിക്കണക്കിന് ഡോളര് വിലവരുന്ന ആയുധങ്ങള് നല്കിയിരുന്നു.
ഇതെല്ലാം ഇനി മരവിക്കും. ആഫ്രിക്കയില് രോഗം ചികിത്സിക്കുന്നതിനായി ആന്റി-റിട്രോവൈറല് മരുന്നുകള് വാങ്ങുന്ന എച്ച്ഐവി/എയ്ഡ്സ് വിരുദ്ധ സംരംഭമായ പെപ്ഫാറിനുള്ള യുഎസ് ഫണ്ടിംഗും നിര്ത്തിവെക്കപ്പെടും. 2003 ല് പ്രസിഡന്റ് ജോര്ജ്ജ് ഡബ്ല്യു. ബുഷിന്റെ കീഴില് ആരംഭിച്ച പെപ്ഫാര് ഏകദേശം 26 ദശലക്ഷം ജീവന് രക്ഷിച്ചതായി പറയപ്പെടുന്നു. അടുത്തിടെ വരെ ഈ പദ്ധതിക്ക് വാഷിംഗ്ടണില് വലിയ ജനപിന്തുണ ലഭിച്ചിരുന്നു.
എന്നാല് ഇസ്രായേലിനേയും ഈജിപ്തിനേയും ഈ നടപടിയില് നിന്ന് ഒഴിവാക്കിയതും ശ്രദ്ധേയമാണ്. ഗാസ യുദ്ധത്തിന് ശേഷം അമേരിക്കയില് നിന്ന് ദീര്ഘകാല ആയുധ പാക്കേജുകള് ഇസ്രായേലിന് ലഭിച്ചിട്ടുണ്ട്. 1979 ല് ഇസ്രയേലുമായി സമാധാന ഉടമ്പടി ഒപ്പുവച്ചതു മുതല് ഉദാരമായ യുഎസ് പ്രതിരോധ ധനസഹായം ലഭിക്കുന്ന രാജ്യമാണ് ഈജിപ്ത്.
പുതിയ മെമ്മോ സ്റ്റേറ്റ് ഡിപ്പാര്ട്ട്മെന്റിനെ മറ്റ് ഓരോ കേസും ഒഴിവാക്കാനും ജീവനക്കാര്ക്കും മറ്റ് ഭരണപരമായ ചെലവുകള്ക്കും താല്ക്കാലികമായി ശമ്പളം നല്കാനും അനുവദിക്കുന്നതാണ് എന്നാണ് യുഎസ് സ്റ്റേറ്റ് സെക്രട്ടറി മാര്ക്കോ റൂബിയോ പറയുന്നത്. 85 ദിവസത്തിനകം എല്ലാ വിദേശ സഹായങ്ങളും ആഭ്യന്തര അവലോകനം നടത്തണമെന്ന് മെമ്മോയില് ആവശ്യപ്പെട്ടിരുന്നു.
നിരവധി യൂറോപ്യന് രാജ്യങ്ങള് അവരുടെ സമ്പദ്വ്യവസ്ഥയുടെ ഒരു ശതമാനത്തില് കൂടുതല് സംഭാവന നല്കുന്നുണ്ട്. എന്നാല് ഡോളറിന്റെ അടിസ്ഥാനത്തില് യുഎസ് ആണ് ലോകത്തിലെ ഏറ്റവും മികച്ച സംഭാവന ദാതാക്കള്. ഓര്ഗനൈസേഷന് ഫോര് ഇക്കണോമിക് കോഓപ്പറേഷന് ആന്ഡ് ഡെവലപ്മെന്റ് പ്രകാരം 2023-ല് യുഎസ് 64 ബില്യണ് ഡോളറിലധികം വിദേശ സഹായം നല്കിയിരുന്നു. 2024 ലെ രേഖകള് ലഭ്യമല്ല.
Click it and Unblock the Notifications
Sign in with Google