ഇടക്കാല തിരഞ്ഞെടുപ്പില് ട്രംപ് വീഴും? ഇന്ത്യന്-അമേരിക്കക്കാര് ഇനി ഡെമോക്രാറ്റുകള്ക്കൊപ്പം!!
യുഎസ് പ്രസിഡന്റ് ഡൊണാള്ഡ് ട്രംപിനും റിപ്പബ്ലിക്കന് പാര്ട്ടിക്കും നവംബറില് നടക്കാനിരിക്കുന്ന ഇടക്കാല തിരഞ്ഞെടുപ്പില് തിരിച്ചടിയുണ്ടായേക്കും എന്ന് റിപ്പോര്ട്ട്. ഇടക്കാല തിരഞ്ഞെടുപ്പില് ഭൂരിഭാഗം ഇന്ത്യന്-അമേരിക്കക്കാരും ഡെമോക്രാറ്റുകള്ക്ക് വോട്ട് ചെയ്യാന് പദ്ധതിയിടുന്നതായാണ് പുതിയ സര്വേ ഫലം. എഎപിഐ ഡാറ്റ നടത്തിയ സര്വേയിലാണ് ഇത് സംബന്ധിച്ച കണ്ടെത്തല്.
സര്വേ പ്രകാരം ജനപ്രതിനിധി സഭയിലേക്കുള്ള തിരഞ്ഞെടുപ്പില് 66% ഇന്ത്യന്-അമേരിക്കക്കാരും ഡെമോക്രാറ്റിക് സ്ഥാനാര്ത്ഥികള്ക്ക് വോട്ട് ചെയ്യാന് ഉദ്ദേശിക്കുമ്പോള്, 22% പേര് റിപ്പബ്ലിക്കന്മാരെ പിന്തുണയ്ക്കുമെന്ന് വ്യക്തമാക്കി. സെനറ്റ് തിരഞ്ഞെടുപ്പിലും 66% ഇന്ത്യന്-അമേരിക്കക്കാരും ഡെമോക്രാറ്റുകള്ക്ക് വോട്ട് ചെയ്യാന് പദ്ധതിയിടുന്നു. അതേസമയം 18% പേര് റിപ്പബ്ലിക്കന്മാരെ പിന്തുണയ്ക്കാന് ആഗ്രഹിക്കുന്നു.
ഏഷ്യന്-അമേരിക്കന് വിഭാഗങ്ങള്ക്കിടയില് ഡെമോക്രാറ്റുകള്ക്കുള്ള പിന്തുണ പരിശോധിക്കുമ്പോള്, ഇന്ത്യന് വംശജര്ക്കിടയിലുള്ള പിന്തുണ ഏറ്റവും ഉയര്ന്ന നിരക്കിലാണെന്ന് സര്വേ വ്യക്തമാക്കുന്നു. നേരത്തെ ട്രംപിനെ പിന്തുണച്ചിരുന്ന ഒരു വിഭാഗത്തില് നിന്നുള്ള പിന്തുണയില് കുറവുണ്ടായതായാണ് ഈ സര്വേ സൂചിപ്പിക്കുന്നത്. ഏകദേശം 20 ലക്ഷത്തോളം വരുന്ന ഇന്ത്യന്-അമേരിക്കക്കാര് ഡെമോക്രാറ്റിക് പാര്ട്ടിയുടെ ഉറച്ച പിന്തുണക്കാരായി തുടരുന്നുണ്ട്.
എങ്കിലും 2024-ലെ തിരഞ്ഞെടുപ്പിന് തൊട്ടുമുമ്പ് 'കാര്നെഗി എന്ഡോവ്മെന്റ്' നടത്തിയ സര്വേയില്, ഡെമോക്രാറ്റുകള്ക്കുള്ള പിന്തുണ കുറഞ്ഞ സാഹചര്യത്തില് ഈ വിഭാഗത്തിലെ 32% പേര് ട്രംപിനെ പിന്തുണയ്ക്കാന് പദ്ധതിയിട്ടിരുന്നതായി കണ്ടെത്തിയിരുന്നു. ഇന്ത്യന്-അമേരിക്കന് പുരുഷന്മാര്ക്കിടയില് ട്രംപിനുള്ള പിന്തുണ കൂടുതല് പ്രകടമായിരുന്നു. സര്വേയില് പങ്കെടുത്തവരില് ഏകദേശം 40 ശതമാനം പേരും അദ്ദേഹത്തിന് വോട്ട് ചെയ്യാന് ഉദ്ദേശിക്കുന്നതായി വ്യക്തമാക്കി.
പ്രധാനമായും ഏഷ്യന് വംശജരായ വോട്ടര്മാരില് ശ്രദ്ധ കേന്ദ്രീകരിച്ച ഈ സര്വേയില്, ജീവിതച്ചെലവ്, പണപ്പെരുപ്പം തുടങ്ങിയ സാമ്പത്തിക വിഷയങ്ങള്ക്കൊപ്പം ആരോഗ്യം, കുറ്റകൃത്യങ്ങള്, വംശീയത എന്നിവ വോട്ടര്മാരുടെ പ്രധാന ആശങ്കകളില് ഉള്പ്പെടുന്നതായി കണ്ടെത്തി. ഇറാനുമായുള്ള സംഘര്ഷത്തിന്റെ സാഹചര്യത്തില്, യുദ്ധവും വിദേശനയവും തങ്ങള്ക്ക് പ്രധാനപ്പെട്ടതോ അതീവ പ്രധാനപ്പെട്ടതോ ആണെന്ന് സര്വേയില് പങ്കെടുത്ത 78 ശതമാനം പേരും അഭിപ്രായപ്പെട്ടു.
പ്രധാനപ്പെട്ട മറ്റൊരു കാര്യം, തങ്ങളുടെ മിക്ക ആശങ്കകളിലും റിപ്പബ്ലിക്കന്മാരേക്കാള് ഡെമോക്രാറ്റുകളെയാണ് ഏഷ്യന്-അമേരിക്കന് വോട്ടര്മാര് കൂടുതല് വിശ്വസിക്കുന്നത് എന്നതാണ്. ഉദാഹരണത്തിന്, ജീവിതച്ചെലവും പണപ്പെരുപ്പവും കൈകാര്യം ചെയ്യുന്നതില് ഡെമോക്രാറ്റുകള് മികച്ച പ്രവര്ത്തനം കാഴ്ചവെക്കുമെന്ന് 44 ശതമാനം പേര് പ്രതീക്ഷിച്ചപ്പോള്, റിപ്പബ്ലിക്കന്മാര് കാര്യങ്ങള് കൂടുതല് ഫലപ്രദമായി കൈകാര്യം ചെയ്യുമെന്ന് വിശ്വസിച്ചത് 18 ശതമാനം പേര് മാത്രമാണ്.
ഏഷ്യന്-അമേരിക്കന് വോട്ടര്മാര്ക്കിടയില് ട്രംപിന് കാര്യമായ ജനപ്രീതിയില്ല. 70 ശതമാനം പേരും അദ്ദേഹത്തെ അനുകൂലമല്ലാത്ത രീതിയിലാണ് കാണുന്നത്. സര്വേ ഫലങ്ങളെ മറ്റ് അഭിപ്രായ വോട്ടെടുപ്പുകളും ശരിവെക്കുന്നു. വൈറ്റ് ഹൗസിലെ ട്രംപിന്റെ രണ്ടാം ടേമിന്റെ ആദ്യ വര്ഷത്തെ പ്രവര്ത്തനങ്ങളെക്കുറിച്ച് കാര്നെഗി എന്ഡോവ്മെന്റ് നടത്തിയ പഠനത്തില്, സര്വേയില് പങ്കെടുത്ത 71 ശതമാനം ഇന്ത്യന്-അമേരിക്കക്കാരും അദ്ദേഹത്തിന്റെ പ്രവര്ത്തനരീതിയെ അംഗീകരിക്കുന്നില്ലെന്ന് കണ്ടെത്തിയിരുന്നു.
ട്രംപ് ഭരണകൂടത്തിന്റെ പ്രധാന സാമ്പത്തിക നയങ്ങളോടും (തീരുവകള് ഉള്പ്പെടെ) കുടിയേറ്റ വിഷയങ്ങള് കൈകാര്യം ചെയ്ത രീതിയോടും അവരില് ഭൂരിഭാഗം പേരും വിയോജിപ്പ് പ്രകടിപ്പിച്ചു. 2020-നും 2026-നും ഇടയില് ഡെമോക്രാറ്റിക് പാര്ട്ടിയോടുള്ള ആഭിമുഖ്യം 52 ശതമാനത്തില് നിന്ന് 46 ശതമാനമായി കുറഞ്ഞിട്ടുണ്ട്. എന്നിരുന്നാലും, റിപ്പബ്ലിക്കന് പാര്ട്ടിയോടുള്ള ആഭിമുഖ്യത്തേക്കാള് (2026 ല് 19 ശതമാനം) ഇത് വളരെ ഉയര്ന്ന നിലയിലായിരുന്നു.
അമേരിക്കയില് വര്ധിച്ചുവരുന്ന വംശീയതയെക്കുറിച്ചും, പ്രത്യേകിച്ച് ട്രംപിന്റെ സഖ്യത്തിലെ തീവ്ര വലതുപക്ഷ വിഭാഗങ്ങളില് നിന്നുള്ള വംശീയതയെക്കുറിച്ചും ഇന്ത്യന്-അമേരിക്കക്കാര്ക്ക് ആശങ്കയുണ്ട്. റിപ്പബ്ലിക്കന് പാര്ട്ടി അനുഭാവികളല്ലാത്ത ഇന്ത്യന്-അമേരിക്കക്കാരില് 27 ശതമാനം പേരും, ന്യൂനപക്ഷങ്ങളോട് അസഹിഷ്ണുത പുലര്ത്തുന്നതുകൊണ്ടാണ് തങ്ങള് ആ പാര്ട്ടിയെ പിന്തുണയ്ക്കാത്തതെന്ന് വ്യക്തമാക്കി. 2024-നെ അപേക്ഷിച്ച് 10 ശതമാനം പോയിന്റിന്റെ വര്ധനവാണിത്.
Click it and Unblock the Notifications
Sign in with Google