ട്രംപ് വീണ്ടും വരും...? 2024 ല്‍ പ്രസിഡന്റ് സ്ഥാനത്തേക്ക് മത്സരിക്കുമെന്ന സൂചന നല്‍കി ട്രംപ്

Updated: Sunday, October 23, 2022, 17:29 [IST]

വാഷിംഗ്ടണ്‍: അമേരിക്കന്‍ മുന്‍ പ്രസിഡന്റ് ഡൊണാള്‍ഡ് ട്രംപ് അടുത്ത തവണയും പ്രസിഡന്റ് സ്ഥാനത്തേക്ക് മത്സരിച്ചേക്കുമെന്ന് റിപ്പോര്‍ട്ട്. ശനിയാഴ്ച ഒരു പരിപാടിയില്‍ സംസാരിക്കവെ ഡൊണാള്‍ഡ് ട്രംപ് തന്നെയാണ് ഇക്കാര്യം സൂചിപ്പിച്ചത്. തന്റെ പ്രസംഗം കേള്‍ക്കാന്‍ തടിച്ചുകൂടിയ ആയിരക്കണക്കിന് ജനക്കൂട്ടത്തെ അഭിസംബോധന ചെയ്ത് കൊണ്ടായിരുന്നു ഡൊണാള്‍ഡ് ട്രംപിന്റെ പരാമര്‍ശം.

ഞാന്‍ രണ്ട് തവണ മത്സരിച്ചു, രണ്ട് തവണ വിജയിച്ചു. രണ്ടാം വട്ടം ആദ്യത്തേതിനേക്കാള്‍ മികച്ച പ്രകടനം കാഴ്ച വെക്കാനായി. 2020 ല്‍ 2016-നെ അപേക്ഷിച്ച് ദശലക്ഷക്കണക്കിന് വോട്ടുകള്‍ നേടാനായി. നമ്മുടെ രാജ്യത്തിന്റെ ചരിത്രത്തില്‍ തന്നെ ഇതുവരെ ഏതൊരു സിറ്റിംഗ് പ്രസിഡന്റിനെക്കാളും കൂടുതല്‍ വോട്ടുകള്‍ 2020 ല്‍ എനിക്ക് ലഭിച്ചു.

നമ്മുടെ രാജ്യത്തെ വിജയകരവും സുരക്ഷിതവും മഹത്വപൂര്‍ണവുമാക്കുന്നതിന് ഞാന്‍ അത് വീണ്ടും ചെയ്യേണ്ടിവരും എന്നാണ് എനിക്ക് തോന്നുന്നത് എന്നായിരുന്നു ട്രംപ് പറഞ്ഞത്. എന്നാല്‍ അതിന് ആദ്യം ഈ നവംബറില്‍ റിപ്പബ്ലിക്കന്‍ പാര്‍ട്ടിക്ക് ചരിത്രപരമായ വിജയം നേടാനാകണം എന്നും ട്രംപ് പറഞ്ഞു. 2020 ലെ അമേരിക്കന്‍ തെരഞ്ഞെടുപ്പിലെ തോല്‍വി ഇപ്പോഴും ഡൊണാള്‍ഡ് ട്രംപ് സമ്മതിച്ചിട്ടില്ല.

ജോ ബൈഡന്‍ പ്രസിഡന്റായി തെരഞ്ഞെടുക്കപ്പെട്ടെങ്കിലും താന്‍ ഇത് അംഗീകരിക്കില്ല എന്നാണ് ഡൊണാള്‍ഡ് ട്രംപ് ഇപ്പോഴും പറയുന്നത്. ട്രംപിന്റെ പരാജയം അംഗീകരിക്കാതെ 2021 ജനുവരി 6 ന് യു എസ് ക്യാപിറ്റലില്‍ ട്രംപിന്റെ അനുയായികള്‍ ആക്രമണം നടത്തിയിരുന്നു. ഈ സംഭവത്തില്‍ ട്രംപിനെതിരെ നിയമനിര്‍മാണ സഭ നടപടിക്കും ശുപാര്‍ശ ചെയ്തിരുന്നു.

നവംബര്‍ 4-നകം രേഖകള്‍ പാനലിന് സമര്‍പ്പിക്കണമെന്നും നവംബര്‍ 14 ന് ശേഷം ആരംഭിക്കുന്ന തെളിവെടുപ്പിന് ഹാജരാകണമെന്നും ആവശ്യപ്പെട്ട് ഡൊണാള്‍ഡ് ട്രംപിന് നോട്ടീസ് അയച്ചിട്ടുണ്ട്. അതേസമയം ഇക്കഴിഞ്ഞ ആഗസ്റ്റില്‍ ട്രംപിന്റെ വീട്ടില്‍ എഫ് ബി ഐ പരിശോധന നടത്തിയിരുന്നു. ഫ്ളോറിഡയിലെ മാര്‍ അലാഗോയിലുളള വസതിയിലായിരുന്നു പരിശോധന.

ട്രംപ് അമേരിക്കന്‍ പ്രസിഡന്റായിരുന്ന സമയത്തുളള ചില സുപ്രധാന രേഖകളുമായി ബന്ധപ്പെട്ടാണ് എഫ് ബി ഐ പരിശോധന നടത്തിയിരുന്നത്. പ്രസിഡന്റിന്റെ ഓഫീസില്‍ നിന്നും ചില രേഖകള്‍ ട്രംപ് വീട്ടിലേക്ക് കടത്തിയെന്ന് നേരത്തെ തന്നെ റിപ്പോര്‍ട്ടുകളുണ്ടായിരുന്നു.