ദുബായിലും മന്ത്രവാദം, പക്ഷെ അത്രപോരെന്ന്...! മന്ത്രങ്ങളെഴുതിയ കുമ്പളം നശിപ്പിച്ചു
പുറംതോടില് അറബിയില് എഴുത്തുകളോട് കൂടിയ കുമ്പളങ്ങയാണ് കണ്ടെത്തിയിരിക്കുന്നത്. ഇതില് ആണിയും തറച്ചിട്ടുണ്ട്. ചില മനുഷ്യരൂപങ്ങളും കുമ്പളങ്ങയുടെ പുറത്ത് വരച്ചു ചേര്ത്തിട്ടുമുണ്ട്.
ദുബായ് : കാര്യ സിദ്ധിക്കും ശത്രുസംഹാരത്തിനും മന്ത്രവാദത്തെ കൂട്ടുപിടിക്കുന്നവര് മനുഷ്യനുള്ളിടത്തോളം കാലം ഉണ്ടാകും. കൂടോത്രവും മന്ത്രവാദവും കേരളീയര്ക്ക് സുപരിചിതമാണ്. എന്നാലിതൊക്കെ കേരളീയരുടെ കുത്തകയാണെന്ന് കരുതിയാല് തെറ്റി. ദുബായിലും ഇത്തരം കുബുദ്ധിക്കാര് ഉണ്ട്. അതിനുദാഹരണമാണ് അല്ഖാന് ബീച്ചില് ശനിയാഴ്ച കണ്ടെത്തിയ മന്ത്രവാദം ചെയ്ത മഞ്ഞ കുമ്പളം.
പുറംതോടില് അറബിയില് എഴുത്തുകളോട് കൂടിയ കുമ്പളങ്ങയാണ് കണ്ടെത്തിയിരിക്കുന്നത്. ഇതില് ആണിയും തറച്ചിട്ടുണ്ട്. ചില മനുഷ്യരൂപങ്ങളും കുമ്പളങ്ങയുടെ പുറത്ത് വരച്ചു ചേര്ത്തിട്ടുമുണ്ട്. ബീച്ചിലെത്തിയവരാണ് മന്ത്രവാദം ചെയ്ത കുമ്പളങ്ങ ആദ്യം കണ്ടത്. പിന്നീട് പോലീസില് അറിയിക്കുകയായിരുന്നു. പോലീസ് ഇക്കാര്യം ഇസ്ലാമിക വകുപ്പിന്റെ ശ്രദ്ധയില്പ്പെടുത്തി.
ഇസ്ലാമിക വകുപ്പിന്റെ നിര്ദേശ പ്രകാരം പുരോഹിതനെ കൊണ്ടു വന്ന് കുമ്പളങ്ങ നശിപ്പിക്കുകയായിരുന്നു. ആഭിചാരത്തിന് ഉപയോഗിക്കുന്ന ശമാം വെള്ളരിയാണിത്. ഇതിലെ മന്ത്രങ്ങള് അപകടകരമല്ലെന്നാണ് പുരോഹിതന് പറയുന്നത്. ആണികളും മന്ത്രങ്ങളും നീക്കം ചെയ്ത ശേഷം പുരോഹിതന് കുമ്പളം കത്തി ഉപയോഗിച്ച് മുറിച്ച് നശിപ്പിക്കുകയായിരുന്നു. ഇതിന്റെ ദൃശ്യങ്ങള് പൊലീസ് തന്നെ പുറത്തു വിട്ടു.