ബ്രസീല് ഫുട്ബോള് താരം കൊക്കെയ്ന് വാങ്ങാന് ലോകകപ്പ് മെഡല് വിറ്റു!
റിയോഡി ജെനീറോ: ബ്രസീലിന്റെ ഫുട്ബോള് താരമായിരുന്ന പൗലോ സീസര് തന്റെ ലോകകപ്പ് മെഡല് വിറ്റു. എന്തിനെന്നോ കൊക്കെയ്ന് വാങ്ങാന് വേണ്ടി. 1970 ലെ ലോകകപ്പ് കിരീടം നേടിയ ബ്രസീല് ടീമിന്റെ ഭാഗമായിരുന്ന സീസര് തന്നെയാണ് ഇക്കാര്യം തുറന്നുപറഞ്ഞത്. വിലമതിക്കാനാകാത്ത ഈ മെഡല് വിറ്റതില് വേദനയുണ്ട് എന്നും സീസര് പറയുന്നു.
65 കാരനായ സീസര് വാര്ത്താ ഏജന്സിയോട് സംസാരിക്കവേയാണ് മയക്കുമരുന്ന് വാങ്ങാന് വേണ്ടി ലോകകപ്പ് ഫുട്ബോളില് വിജയിച്ച് കിട്ടിയ സ്വര്ണമെഡല് വിറ്റ കാര്യം പറഞ്ഞത്. 1970 ലും 74 ലും ബ്രസീലിന് വേണ്ടി ലോകകപ്പ് ടീമുകളില് സീസര് കളിച്ചു. കാജു എന്ന പേരിലാണ് പൗലോ സീസര് ലിമ പരക്കെ അറിയപ്പെട്ടിരുന്നത്.
ബ്രസീലിന് വേണ്ടി 57 മത്സരങ്ങളില് കളിക്കാനിറങ്ങിയ കാജു 10 അന്താരാഷ്ട്ര ഗോളുകളും സ്വന്തം പേരില് കുറിച്ചിട്ടുണ്ട്. ഫുട്ബോള് ഇതിഹാസമായ പെലെ മികച്ച ഫോമില് കളിച്ചിരുന്ന കാലത്താണ് കാജുവിന്റെ ഈ നേട്ടം. പെലെ അടക്കമുള്ള കരുത്തര് കളിച്ചിരുന്നപ്പോഴും ദേശീയ ടീമില് തുടര്ച്ചയായി ഇടം പിടിക്കാന് കാജുവിന് സാധിച്ചു. പ്രശസ്ത ബ്രസീലിയന് ക്ലബ്ബായ ബോട്ടഫോഗോയ്ക്ക് വേണ്ടി കളിച്ചാണ് പൗലോ സീസര് കളി തുടങ്ങിയത്.