ഫേസ്ബുക്ക് സുഹൃത്തിന്റെ പ്രൈസ് മണി സെല്ഫി ഉപയോഗിച്ച് തട്ടിയെടുത്തു
മെല്ബണ്: അതിസാമര്ഥ്യം കാട്ടിയ ഒരു ഫേസ്ബുക്ക് സുഹൃത്ത്, ഫേസ്ബുക്കിലെ സെല്ഫി ഉപയോഗിച്ച് പ്രൈസ് മണി തട്ടിയെടുത്തു. ഓസ്ട്രേലിയയിലെ മെല്ബണിലാണ് സംഭവം. ലോകത്തുതന്നെ ഇത്തരത്തില് നടക്കുന്ന ആദ്യ സംഭവമായിരിക്കും ഇത്. യുവതി തന്നെയാണ് ഫേസ്ബുക്ക് സുഹൃത്ത് പണം തട്ടിയകാര്യം തന്റെ പോസ്റ്റിലൂടെ അറിയിക്കുന്നത്.
പെര്ത്തില് നടക്കുന്ന മെല്ബണ് കപ്പ് കുതിരപ്പന്തയം കാണാനായി സുഹൃത്തുക്കള്ക്കൊപ്പം എത്തിയതായിരുന്നു ഷാന്റലെ എന്ന യുവതി. പന്തയത്തില് താന് തെരഞ്ഞെടുത്ത കുതിര വിജയിച്ചതിനെ തുടര്ന്ന് യുവതിക്ക് 900 ഡോളര് സമ്മാനം ലഭിച്ചു. സമ്മാനം ലഭിച്ച സന്തോഷത്തില് ടിക്കറ്റ് പിടിച്ചു നില്കുന്ന ഒരു സെല്ഫിയും ഇവര് ഫേസ്ബുക്കില് പോസ്റ്റു ചെയ്തു.
'Winner winner chicken dinner' എന്നായിരുന്നു ചിത്രത്തിന് നല്കിയ കാപ്ഷന്. സുഹൃത്തുക്കള്ക്കൊപ്പം ഡിന്നര് അടിച്ചുപൊളിക്കാമെന്നു കരുതിയ യുവതിക്ക് സന്തോഷം ഇല്ലാതാകാന് മിനിറ്റുകളേ വേണ്ടിവന്നുള്ളൂ. സെല്ഫി പോസ്റ്റ് ചെയ്ത് 15 മിനിറ്റിനുശേഷം കൗണ്ടറില് പണം മാറാന് ചെന്നപ്പോഴാണ് അറിയുന്നത് പ്രൈസ് മണി നേരത്തെ മറ്റാരോ വാങ്ങിയെന്ന്.
യുവതിയുടെ സെല്ഫിയില് നിന്നും ടിക്കറ്റുമാത്രം വ്യക്തമാക്കി പ്രിന്റ് എടുത്തശേഷം ഓട്ടോമാറ്റിക് മെഷീനിലൂടെ പണം പിന്വലിക്കുകയായിരുന്നു എന്നാണ് കരുതുന്നത്. പണം പിന്വലിക്കാന് ചിത്രത്തിലെ ബാര്കോഡ് ധാരാളമായിരുന്നു. എന്തായാലും ഒരു സെല്ഫികൊണ്ട് യുവതിക്ക് 900 ഡോളര് നഷ്ടമായി. ഒപ്പം ഫേസ്ബുക്ക് സുഹൃത്തുക്കളിലുള്ള വിശ്വാസവും.